Alkitab Mobile SABDA
[VER] : [TORAJA]     [PL]  [PB] 
 <<  Kejadian 27 >> 

Yakub umpakena ambe’na la unnala katonganan anak pa’bunga’

1Den pissan tonna matuamo tu Ishak sia maraunmo, anna tang pakitamo, natambaimi tu Esau, anak pa’bunga’na, anna kuanni nakua: E anakku! Mebalimi nakua: Inde siana’.

2Ma’kadami nakua: Matuamo’, tae’ kuissan tu sunga’ku.

3Totemo baai tu pareamu, tambilamu anna panamu, ammu sun lako padang umpangularanna’.

4Ammu posarasanna’ kande mammi’ susitu kuporainna, baanna’ mai angku kandei sia anna ponno penaangku umpassakkeko kumane mate.

5Narangimi Ribka tu apa napokada Ishak lako Esau, anakna. Malemi tu Esau lako padang la moasu tu la napakandeanni.

6Nakuami tu Ribka lako Yakub, anakna: Kurangi tu ambe’mu ma’kada lako Esau, siulu’mu, nakua:

7Banna’ pangula’mu sia posarasanna’ kande mammi’, angku kandei kupassakkeko dio oloNa PUANG kumane mate.

8Iamoto totemo, e anakku, perangii tu kadangku ammu pogau’i tu apa kupokadangko.

9Laoko lako to’ bembe’ ma’baanan, alanna’ da’ dua anak bembe’ laki malompo dio mai, angku posarasanni kande mammi’ tu ambe’mu susitu naporainna.

10La mubaan ambe’mu, anna kandei, napassakkeko, namane mate.

11Nakuami tu Yakub lako Ribka, indo’na: Iatu Esau, kakangku kebulu tu kalena, na aku te malana tu kuli’ku.

12Nakaka’na’ manii ambe’ku angku butung to ma’telle dio olona, angku pabu’tuammo tampak ropu kaleku, tangia rongko’.

13Nakuami ungkuanni: Lu lako ia kaleku tu tampak ropummu, e anakku, perangii siai tu kadangku ammu lao unnalanna’.

14Malemi naala nabaai lako indo’na, naposarasanni indo’na kande mammi’ susitu naporainna ambe’na.

15Naalami Ribka tu tamangkalena Esau, anak pa’bunga’na, iamotu me’lokna tu napalanna banua, anna papasangi tu Yakub anak bongsunna.

16Na iatu limanna patomali sia kale malananna lan barokona nasapu’ balulang anak bembe’ laki iato.

17Napatangkeimi kande mammi’ sia roti, to naposara’, tu Yakub, anakna.

18Saemi lako ambe’na, anna ma’kada nakua: O ambe’! Nakuami tu Ishak: Inde siana’, mindaroko, e anakku?

19Nakuami tu Yakub lako ambe’na: Akumo Esau te, anak pa’bunga’mi, kupogau’mo susitu mipokadanna’. Millikmokomi unno’ko’, ammi kandei tu pangula’ku, anna ponno penaammi umpassakkena’.

20Nakuami tu Ishak lako: Umba mukua madomi’ unnappa’i, e, anakku! Mebalimi: Belanna, Napasiappa’na’ PUANG, Kapenombammi.

21Nakuami tu Ishak lako Yakub: Inde-indeko, angku kaka’ko, e anakku, ba’tu la tongannai ikomo anakku Esau, ba’tu tangiaraka.

22Nareke’mi Yakub tu Ishak, ambe’na, anna kaka’i Ishak, nama’kada nakua: Iate gamara, gamaranna bang Yakub, apa iatu limanna, limanna Esau.

23Apa tae’ anna tandai, belanna iatu limanna kebulu duka, susi limanna Esau, kakanna, napassakkemi.

24Nakuami Ishak: Tongannaraka iko siamo anakku Esau te? Nakuami: Tonganna.

25Nakuami Ishak: Painde-indeanna’, angku kandei tu pangula’na anakku sia anna ponno penaangku umpassakkeko. Napadio-dioammi, anna kandei Ishak. Nabenmi uai anggoro’, anna iru’i.

26Nakuami lako tu Ishak, ambe’na: Inde-indeko, udungna’, e anakku.

27Nareke’mi anna udungi tu ambe’na. Naudukmi Ishak tu bau busarungngu’na tamangkalena, napassakkemi, nakua: Iatu busarungngu’na baunna anakku susi busarungngu’na padang, tu Napamasakkemo PUANG.

28Na Puang Matuamora la umpasaeangko ambun dao mai langi’ sia lompona padang sia gandung manglokkon sia uai anggoro’!

29Anna ba’tu pira-pira bangsa la mengkaunan lako kalemu sia ba’tu pira-pira to sangpetayanan la tunduk dio olomu; sia la dadiko puangna mintu’ siulu’mu. Anna la tunduk tu mintu’ to nadadian indo’mu dio olomu. La narua tampak ropu tu to untampakkiko ropu. Na minda-minda umpassakkeko la rongko’!

30Iatonna mangkamo tu Ishak umpassakke Yakub sia mane ra’pa’ mallai tu Yakub dio mai tingayona Ishak, ambe’na, ta’kala anna saemo tu Esau sule moasu.

31Naposara’mi tu kande mammi’, anna baai lako ambe’na sia ma’kada nakua: Millikmokomi, ambe’, ammi kandei te pangula’na anakmi, anna ponno penaammi umpassakkena’.

32Nakuami lako tu Ishak, ambe’na: Mindaroko? Mebalimi nakua: Akumo Esau anak pa’bunga’mi.

33Lendu’ tonganmi tirambanna tu Ishak, nama’kada nakua: Iake susii to, mindamo ia to moasu, anna sae umbanna’? Belanna mangka nasangmo kukande to, mumane sae sia mangka kupassakke, inang la rongko’ ia.

34Iatonna rangimi Esau tu kadanna ambe’na susito, unnurruk-urrukmi tumangi’, na ma’kada lako ambe’na, nakua: Passakkena’, passakke dukana’, ambe’!

35Nakuami tu ambe’na: Mangkamo sae ma’pakena tu adimmu, naalaimoko tu rongko’mu.

36Mebalimi: Tang sipato’raka nasanga tau Yakub? Belanna totemo penduanmo’ napakena: naalaimo’ tu katonganangku anak pa’bunga’, na totemo naalaiomo’ tu rongko’ku! Ma’kadami tu Esau: Tae’moraka pa’passakke minannanna’

37Nabalimi Ishak, nakua lako Esau: Kuangka’mo mendadi puangmu sia mintu’ siulu’na kupadadi kaunanna sia kupaguntu’i gandung sola uai anggoro’; naapapa la kupogaurangko, e anakku?

38Nakuami tu Esau lako ambe’na: Ia mannaraka te misa’ tu pa’passakke miampui, o ambe’? Passakkena’, passakke dukana’! Unnurruk-urrukmi tu Esau tumangi’.

39Nabalimi Ishak, ambe’na nakua: Manassa iatu padang mupa’tondokki la sikambela padang malompo, tae’ na la unto’doi ambun dao mai langi’;

40sangadinna pa’dangmuri la munii tuo sia la mengkaunanko lako adimmu. Sia la dadi undinna, ke umberong-berongko, la mulendokan tu ayokana dao mai sokkongmu!

Yakub mallai lako Mesopotamia

41Ta’kala anna kabiri’i Esau tu Yakub tu diona pa’passakke nabenni ambe’na. Nakuami tu Esau lan penaanna: Iatu allo dinii umpote bolongi ambe’ku mandappi’mo, na iapa to angku patei tu adingku Yakub.

42Napokadami tau lako Ribka tu kadanna Esau, pa’bunga’na, napopetambaimi tu Yakub, bongsunna, nakuami: La muissan kumua iatu Esau kakammu, la matana penaanna diona iko, ke napateiko.

43Na totemo, e anakku, perangii te kadangku; ke’de’ko, maleko mallai lako Haran, lako Laban anak muaneku.

44Torroko ba’tu sangapa-apa sola dio sae lako pa’dena tu kasengkeanna siulu’mu,

45sae lako merena tu kasengkeanna siulu’mu lako kalemu sia tang nakilalainna tu penggaurammu lako kalena; mangkato angku mesua untambaiko dio mai. Ma’apai te aku te, anna la sangallo bangri la kunii umposayu’komi sola dua?

46Ma’kadami tu Ribka lako Ishak: Masorromo’ tuo, belanna natumang tu mai anak to Het, iake la umpobainepi to Het tu Yakub, susitu mintu’ te to ma’tondok, apaopara gai’na tu katuoan lako kaleku?


  Share Facebook  |  Share Twitter

 <<  Kejadian 27 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel