Alkitab Mobile SABDA
[VER] : [TORAJA]     [PL]  [PB] 
 <<  Kejadian 28 >> 

1Natambaimi Ishak tu Yakub anna passakkei sia napakare’na nakua: Da mupobaine baine bu’tu dio mai to Kanaan.

2Ke’de’ko sia maleko lako Padan-Aram, lako banuanna Betuel, ambe’na indo’mu; alai dio mai tu misa’ baine la mupobaine, to bu’tu dio mai Laban, anak muanena indo’mu.

3Na Puang Matuamora tu Umpoissan angge maritik umparongko’ko umpopembati’ko sia umpopemba’ka’ko, anna iko nanii garonto’na ba’tu pira-pira bangsa.

4Sia Ia la umba’giko rongko’na Abraham sia lako duka bati’mu ammu pomana’i tu padang munii mentiruran sia tu mangka napa’ba’gian Puang Matua lako Abraham!

5Susimoto tu kanasuanna Ishak ke’de’ male tu Yakub, malemi lako Padan-Aram umpellambi’i Laban, anakna Betuel, to Aram, iamo anak muanena Ribka, indo’na Yakub sola Esau.

6Iatonna tiroi Esau kumua napassakke Ishak tu Yakub sia nasua male lako Padan-Aram la unnala baine dio mai la napobaine sia iatonna passakkemi anna pakare’nai nakua: Da mupobainei tu mai to Kanaan;

7sia naturu’ Yakub tu kadanna indo’ ambe’na anna male lako Padan-Aram,

8na iatonna tiroi Esau kumua iatu Ishak, ambe’na, tang naporai tu anak dara to Kanaan,

9malemi tu Esau lako Ismael, anna alai tu Mahalat, anakna Ismael, to nadadian Abraham, sangbainena Nebayot, anna pobainei, boko’tu baine inang dennamo.

Yakub mangimpi dio Betel

10Tonna mangkato, tassu’mi tu Yakub lan mai Bersyeba, namale lako Haran.

11Rampomi lako misa’ inan, anna ma’bongi inde to belanna lambunmo tu allo; naalami tu batu misa’ to mintu’ batu dio inan iato, napoallonan, anna bambangan kalena inde to la mamma’.

12Mangimpimi den misa’ eran bendan lan lino sumpu langngan langi’; natiromi, ba’tu pira-pira malaeka’Na Puang Matua lu langngan lu dao mai eran iato.

13Manassa den tu PUANG bendan dao anNa ma’kada Nakua: Akumo tu PUANG, Kapenombanna Abraham, nene’mu, sia Kapenombanna Ishak, na iate padang munii mamma’ la Kubenko sia la Kuben bati’mu.

14Iatu bati’mu la susi barra’-barra’ sia la tumale’ko lako matallo matampu’, rekke ulunna salu sia sau’ pollo’na uai, nalan kalemu sia lan bati’mu nanii tu mintu’ suku lan lino unnappa’ karongkosan.

15Manassa la Kurondongko sia la Kurinding pala’ko umba-umba muola sia la Kupasuleko indete padang iate, belanna tae’ angKu la untampeko sae lako Kupogau’na tu apa mangka Kuallu’ lako kalemu.

16Pakalan anna pana’dingmo tu Yakub, na ma’kada nakua: Den pale’ tu PUANG indete inan iate, natae’ angku issanni!

17Saemi mataku’na anna ma’kada nakua! Lendu’ masangna inan iate! Tangia senga’na sangadinna banuanNa Puang Matua na iamote tu ba’ba suruga!

18Mebongngi’mi millik tu Yakub, anna alai tu batu naallonni, napabendan la dadi misa’ tanda dianna batu silambi’, anna bolloi minna’.

19Nasangaimi Betel tu inan iato, apa iatu sanga dolona tondok iato, disanga Lus.

20Mangallonammi tu Yakub nakua: Iake Narondong siana’ Puang Matua sia Narinding pala’na’ dio lalan, tu kuolai totemo te sia Nabenna’ la kukandena sia tamangkale la kupake,

21angku sule marampa’ lako to’ banuanna ambe’ku, manassa PUANGmo tu Kapenombangku.

22Iate batu tu kupabendan la dadi misa’ tanda dianna batu silambi’ iato, mendadi banuanNa Puang Matua, angku penombangKomi sangtaa sangpulona tu mintu’ barang apa Mikamaseanna’.


  Share Facebook  |  Share Twitter

 <<  Kejadian 28 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel