Dual PanelYakub sitammu Esau
1Nabangunammi Yakub tu matanna natiroi, sae tonganmo tu Esau sia a’pa’ratu’ muane nasolan. Napapantan torromi Yakub tu mintu’ anakna, naben Lea sia Rahel sia lako da’dua baine kaunanna.
2Napadoloi tu baine kaunanna da’dua sola anakna sia iatu Lea sola anakna napaundi-undi sidi’ na iatu Rahel sola Yusuf napaundi’-undi’na.
3Dolomi dio tingayona tau iato mai anna tukku rokko padang pempitu sae lako la nalambi’na tu siulu’na.
4Ma’dondomi tu Esau sae umpellambi’i, natoei sia naraka’ tu barokona sia naudung anna sitangiran sola duai.
5Iatonna bangunanni Esau tu matanna, natiromi tu mintu’ baine sola anakna, ma’kadami nakua: Mindara te mai musolan. Mebalimi Yakub nakua: Iamote tu mintu’ pia tu Napa’kamaseammo Puang Matua lako kaleku.
6Iatu baine kaunanna sola anakna sae mentireke’ anna tukku mekatabe’.
7Sae dukami tu Lea sola anakna mentireke’ anna tukku mekatabe’; namane sae tu Yusuf sola Rahel mentireke’ anna tukku mekatabe’.
8Nakuami tu Esau: Apara la dipapatuanni tu mintu’ kusitammuanna ma’baanan? Mebalimi tu Yakub nakua: Iamo la umpamatana penaammi.
9Nakuami Esau: E adingku, silasa sia tu dionamo kaleku, paiti’ bangmi tu apammu.
10Mebalimi tu Yakub: Da misusi to; iake mikamaseimo’, la mikarangi te pa’kasianku; belanna iate kutirona te rupammi samangku to untiro rupanna Puang Matua apa mikatana siana’.
11Karangi te pa’kasiangku tu disorongammokomi, belanna Nakamaseammo’ Puang Matua sia mintu’na apa kuampui nasang. Naparuku-rukumi naurunganni ungkarangi.
12Nakuami tu Esau: melo ke ke’de’miki’ male tasituru’mora.
13Apa mebali tu Yakub lako nakua: Miissan kumua iate mai pia tang nabela sia den duka tu domba sia bembe’ sia sapi sumusupa tu anakna; iake sangallori nanii umpalingkai tau manassa mate nasang.
14Melo ke dolo bangmokomi, la umparanta’ pela’na’ kaleku unturu’ lingkana patuoan kuramba sia lingkana te mai pia, sae lako kikarampoimmi dio Seir.
15Nakuami tu Esau: Da’ito kupatorroangko ba’tu pira-pira te to kusolan. Nakuami Yakub: Ma’apai nasusi to! Da napomatana’i penaammi to!
16Mangkato sulemi tu Esau to allo iato unnola lalan lu lako Seir.
17Ke’de’mi tu Yakub lako Sukot, nagaragami tu misa’ banua dio la nanii sia nagaragan lantang tu mintu’ patuoan. Iamoto anna sangai Sukot tau tu inan iato.
18Rampo mana’pami tu Yakub lako Sikhem, misa’ tondok dio tana Kanaan, tonna sulemo dio mai Padan-Aram; ma’tendami dio matallona tondok iato.
19Unnallimi padang sangbidang, tu naninna siamo unnosok tenda lako bati’na Hemor, ambe’na Sikhem, saratu’ batu salaka.
20Indemoto nanii umpabendan misa’ inan pemalaran, nasangai: Kapenombanna Israel tu Kapenomban tongan.