Dual PanelKatorroanna pole’ Yakub dio Betel
1Ma’kadami Puang Matua lako Yakub Nakua: Ke’de’ko male sau’ Betel, ammu torro dio sia garagai dio tu misa’ inan pemalaran lako to Kapenomban umpa’pekitanan Kalena lako kalemu tommu mallai dio mai Esau, kakammu!
2Nakuami Yakub lako repokna sia mintu’ to nasolan: Tibei tu mintu’ balo’ to salian lembang dio mai kalemi sia seroi tu kalemi sia sondai mintu’ tamangkalemi.
3Maikomi tamale sau’ Betel, belanna la unggaragana’ misa’ inan pemalaran lako tu Kapenomban untandingina’ talinga tonna lambi’na’ kamaparrisan sia urrondongna’ dio lu lalan kuolai.
4Nasorongi lako Yakub tu mintu’ balo’ to salian lembang dio kalena sia mintu’ baba’ dio talinganna, anna lamun nasangi Yakub rokko padang dio to’ garonto’ kayu tarpin tu sikandappi’ tondok Sikhem.
5Ke’de’mi tu tau iato mai, anna parampoi kamatakuran Puang Matua tu tondok naolai, natae’ pole naula’i tu mai anakna Yakub.
6Susimito anna rampo tu Yakub sia mintu’ to nasolan lako tondok Lus, dio tondok Kanaan, iamotu Betel.
7Indemo to nanii unggaragai tu misa’ inan pemalaran na iatu inan iato nasangai El-Betel, belanna indemo to Nanii Puang Matua umpaombo’ Kalena lako tonna mallai tu Yakub dio mai kakanna.
8Iatu Debora to mantaranakna Ribka tonna mate nadilamun rampe sau’na Betel, diong to’ garonto’ kayu jati, tu disangai jati Parran uai mata.
9Umpa’pekitanan poleomi Kalena tu Puang Matua lako Yakub te mangkanna sae dio Padan-Aram sia Napassakke.
10Ma’kadami tu Puang Matua lako: Iatu sangammu Yakub, apa tae’mo anna la disa’bu’ Yakub, sangadinna Israelmo tu la sangammu. Nasangaimi Israel.
11Nakua tu Puang Matua lako kalena: Akumote tu Puang Matua tu Umpoissan angge maritik. Membati’moko sia memba’ka’ko. Namisa’ bangsa, ontongrika buda bangsa la bu’tu dio mai kalemu sia iatu mai datu la bu’tu dio mai tarukmu.
12Iate padang tu Kuba’giammo Abraham sia Ishak la Kuba’gian dukako sia iatu bati’ undimmu la Kuba’gi duka padang iate.
13Soro’mi langngan tu Puang Matua dio mai to’ inan Nanii ma’kada lako Yakub.
14Naosokmi Yakub misa’ tanda dianna batu silambi’ dio to’ inan Nanii Puang ma’kada lako kalena, iamo batu, tu misa’ tanda dianna batu silambi’ anna pato’doi anggoro’ dipennoloan sia nabolloi minna’.
15Na iatu inan Nanii ma’kada Puang Matua lako nasangai Betel Yakub.
Kamateanna Rahel sia kamateanna Ishak
16Ke’de’mi tu tau iato mai dio mai Betel, tae’mora nasangapa anna lambi’mo Efrata, kianakmi tu Rahel, lendu’ maparri’na.
17Lan to kamaparrisanna kianak to, nakuami to ma’pakianak lako: Da mumataku’, belanna unnappa’ poleomoko misa’ pia muane.
18Tonna kadakemo nasa’ding -- belanna la mate -- nasangaimi Ben-oni, apa nasangai ambe’na Benyamin.
19Susimoto tu kamateanna Rahel, dilamunmi dio randan lalan lako Efrata, iamotu Betlehem.
20Naosokmi Yakub tu misa’ tanda dianna batu silambi’ dao to’ lamunanna; iamo tanda lamunanna Rahel tu denpa sae lako totemo.
21Ke’de’mi tu Israel inde to dio mai, anna osok tendana sambali’ lamban lianna Migdal-Eder.
22Den pissan tonna pa’tondokkimi Israel tu padang iato, malemi tu Ruben ussangamparan Bilha, gundi’na ambe’na, napekarebami Israel tu iannato. Iatu muane, tu anakna Yakub sangpulo dua.
23Mintu’ muane tu anakna Lea iamo Ruben, pa’bunga’na Yakub, namane Simeon, Lewi, Yehuda, Isakhar na Zebulon.
24Iatu muane anakna Rahel: Yusuf na Benyamin.
25Iatu muane anakna Bilha, pa’dua’na Rahel: Dan na Naftali.
26Iatu muane anakna Zilpa, pa’dua’na Lea: Gad sia Asyer. Mintu’nate iamo anakna Yakub tu nadadian dio Padan-Aram.
27Rampomi tu Yakub lako Ishak, ambe’na lan Mamre dio Kiryat-Arba, iamo Hebron, nanii Abraham sola Ishak mentiruran.
28Iatu Ishak saratu’mo karua pulona taun dadinna.
29Ka’tumi angin dipudukna tu Ishak, ronta’mi tondon to batangna tonna matua indukmo banu’ karurungan, nadipatama batu dilobang dipasola rapunna, nakasara’i Esau na Yakub, anakna.