Alkitab Mobile SABDA
[VER] : [TORAJA]     [PL]  [PB] 
 <<  Kejadian 36 >> 

Bati’na Esau

1Inde sia tu bati’na Esau, tu diganti Edom:

2Umpobainemi anak to Kanaan tu Esau, iamotu Ada, anakna Elon, to Het na Oholibama, anakna Ana, anakna Zibeon, to Hewi,

3sia Basmat, anakna Ismael, anak daranna Nebayot.

4Iatu Ada umpadadian Elifas Esau, na Basmat undadian Rehuel.

5Iatu Oholibama undadian Yeush na Yaelam na Korah; iamote tu mintu’ muane nadadian Esau dio tana Kanaan.

6Iatu Esau nabaa nasang tu mintu’ bainena sia mintu’ anakna muane sia baine sia mintu’ to lan banuanna sia patuoanna sia mintu’ tu nalaainna sia mintu’ barang apanna tu napabu’tumo dio tana Kanaan, anna male lako tana (senga’) sikambela Yakub siulu’na.

7Belanna iatu mai barang apanna buda tongan napourungan tang sibaa sola duai, sia iatu padang nanii mentiruran tae’ nasilasa sola duai, apa buda patuoanna.

8Iamoto anna torro tu Esau dio buntu Seir na iatu Esau, iamo diganti Edom.

9Inde sia tu mintu’ bati’na Esau, nene’ to Edom dio buntu Seir.

10Inde sia tu sanganna mintu’ muane anakna Esau: Elifas anak diona Ada, na Rehuel anak diona Basmat.

11Iatu mintu’ anakna Elifas tu muane, iamo Téman, Omar, Zefo, Gaetam na Kenas.

12Iatu Timna, iamo gundi’na anakna Esau, disanga Elifas; iatu Timna umpadadian Amalek, Elifas; ia nasangmote tu muane, anakna Ada, bainena Esau.

13Inde sia tu mintu’ anakna Rehuel tu muane, iamo Nahat, Zerah, Syama na Miza; ia nasangmote tu anakna Basmat, bainena Esau.

14Inde sia tu mintu’ muane anakna Oholibama bainena Esau, anakna Ana, iamo anakna Zibeon; napadadianmi Esau tu Yeush, Yaelam na Korah.

15Inde sia tu pangala tondok tu bati’na Esau, iamotu muane nadadian Elifas, anak pa’bunga’na Esau, tu mai: Sia Téman, Sia Omar, Sia Zefo na Sia Kenas,

16Sia Korah, Sia Gaetam, Sia Amalek. Iamorate tu mintu’ pangala tondok, tu bati’na Elifas dio tana Edom, iamote tu muane bati’na Ada.

17Inde sia tu anakna muane Rehuel, anakna Esau tu muane: iamotu Sia Nahat, Sia Zerah, Sia Syama, Sia Miza. Iamorate tu mintu’ pangala tondok tu bati’na Rehuel dio tana Edom, iamote tu muane, bati’na Basmat, bainena Esau.

18Inde sia tu anakna Oholibama, bainena Esau, iamotu Sia Yeush, Sia Yaelam na Sia Korah; iamorate tu mintu’ pangala tondok tu bati’na Oholibama, anakna Ada, bainena Esau.

19Iamorate tu mintu’ muane bati’na Esau, tu diganti Edom sia iamote pangala tondokna tau iato mai.

20Inde sia tu muane bati’na Seir, to Hori, tu untorroi padang iato, iamotu Lotan, Syobal, Zibeon na Ana,

21na Disyon na Ezer na Disyan; iamo pangala tondokna to Hori bati’na Seir dio tana Edom.

22Iatu anakna Lotan: Hori na Heman na iatu anak daranna Lotan iamotu Timna.

23Iatu anakna Syobal: Alwan, Manahat, Ebal, Syefo na Onam.

24Inde sia tu anakna Zibeon: Aya na Ana; iamora tu Ana mangka ungkabu’tui ba’tu pirang mata uai lassu lan padang pangallaran, tonna laai tu mintu’ keledainna Zibeon ambe’na.

25Na inde sia tu anakna Ana: Disyon na Oholibama, iamoto tu pia baine nadadian Ana.

26Inde sia tu anakna Disyon: Hemdan, Esyban, Yitran, na Keran.

27Inde sia tu anakna Ezer: Bilhan, Zaawan na Akan.

28Iatu anakna Disyan: Us na Aran.

29Inde sia tu pangala tondokna to Hori, iamo Sia Lotan, Sia Syobal, Sia Zibeon, Sia Ana,

30Sia Disyon, Sia Ezer na Sia Disyan; iamote tu pangala tondokna to Hori, pantan sibaa rapunna dio tana Seir.

31Inde sia tu mai datu ma’parenta dio tana Edom tonna tae’pa datunna to Israel.

32Iatu datu ma’parenta dio tondok Edom, iamotu Bela, anakna Beor, na iatu kotana disanga Dinhaba.

33Kabu’mi tu Bela anna dadi datu tu Yobab, anakna Zerah dio mai Bozra, sondana.

34Kabu’mi tu Yobab anna dadi datu tu Husyam dio mai tana to Téman, sondana.

35Kabu’mi tu Husyam anna dadi datu tu Hadad, anakna Bedad, sondana, tu untalo Midian dio padang Moab; na iatu kotana disanga Awit.

36Kabu’mi tu Hadad anna dadi datu tu Samla dio mai Masreka, sondana.

37Kabu’mi tu Samla anna dadi datu tu Saul dio mai Rehobot to dio randan salu, sondana.

38Kabu’mi tu Saul anna dadi datu tu Baal-Hanan, anakna Akhbor, sondana.

39Kabu’mi tu Baal-Hanan, anakna Akhbor, anna dadi datu tu Hadar, sondana, na iatu kotana disanga Pahu, na iatu bainena disanga Mehetabeel, anakna Matred, baine nadadian Mezahab.

40Inde sia tu sanganna mintu’ pangala tondok tu to bu’tu dio mai Esau, pantan siporapu rapunna sia inanna, siposanga sanganna, iamotu Sia Timna, Sia Alwa, Sia Yetet,

41na Sia Oholibama, Sia Ela, Sia Pinon,

42Sia Kenas, Sia Téman, Sia Mibzar.

43Sia Magdiel na Sia Iram. Iamote tu mintu’ pangala tondokna Edom sipoinan inanna lan tu tondok napa’tondokkinna. Susimoto tu diona Esau, nene’na to Edom.


  Share Facebook  |  Share Twitter

 <<  Kejadian 36 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran