Alkitab Mobile SABDA
[VER] : [TORAJA]     [PL]  [PB] 
 <<  Kejadian 38 >> 

Diona Yehuda sola Tamar

1Denmi pissan tonna attu ia dukato, natampei Yehuda tu mintu’ siulu’na, namale rokko, torro ma’tondok sola misa’ to Adulam, disanga Hira.

2Natiromo Yehuda inde to misa’ pia baine to Kanaan, disanga Syua, napobainemi, anna sangampa’.

3Ma’tambukmi tu baine iato anna dadian misa’ pia muane tu nasangai Er.

4Ma’tambuk pole’mi anna dadian misa’ pia muane tu nasangai Onan.

5Kianak poleomi undadian misa’ pia muane, tu nasangai Syela. Iatonna dadianni torro dio tondok Kezib tu Yehuda.

6Naalammi Yehuda misa’ baine tu Er, anak pa’bunga’na, na iatu baine iato disanga Tamar.

7Apa iatu Er, pa’bunga’na Yehuda tae’ Naporai PUANG tu gau’na, undinna Narabunnimi PUANG.

8Nakuami Yehuda lako Onan: Maleko lako to’ bainena kakammu ammu pobainei ussonda kakammu sia padenanni bati’ tu kakammu.

9Tu naissan Onan kumua tae’ na ia la umpobati’i, iamoto nabolloan salai rokko padang tu uai mentaunna tonna sangampa’ bainena kakanna, kumua da napadenanni bati’ tu kakanna.

10Iate penggauranna tang Naporai PUANG, iamoto Narabunni dukai PUANG.

11Nakuami Yehuda lako Tamar, menintunna: Belangpako lan banuanna ambe’mu sae lako kapuanna tu anakku Syela, belanna nakua lan penaanna: podo da namate susito kakanna da’dua. Malemi tu Tamar natorro dio banuanna ambe’na.

12Ba’tu sangapa lendu’nato, matemi tu anakna Syua, to bainena Yehuda. Tonna maseromo tu kalena Yehuda, malemi lako to ma’ku’ku’ domba, langngan Timna sola Hira, to Adulam, sangmanena.

13Napokadami tau lako Tamar nakua: male langngan Timna tu matusammu la ungku’ku’i dombana.

14Nalalakkimi baine iato tu pakean balunna anna pakei tu lullung tu urrerung lindona anna nno’ko’ dio to’ babangan tondok Enaim, dio randan lalan lako Timna, belanna natiromo tu Syela kapuamo natae’ nadiben Syela la napobaine.

15Iatonna tiromi Yehuda nasangami kumua baine bualang, belanna nabungku’ tu lindona.

16Lendu’mi tu Yehuda lako to baine iato nama’kada nakua: Sia’ko, tasangampa’, belanna tae’ naissanni kumua iatu baine iato menintunna. Mebalimi tu baine iato: Apara tu la mubenna’, ammu sangamparanna’?

17Nakuami: Kupa’peammoroko anak bembe’ laki misa’. Mebalimi tu baine iato nakua: Melo, ke mubenna’ pa’petamben sae lako mupa’peanna’.

18Mekutanami tu Yehuda: Apara tu pa’petamben sipatu la kubenko? Mebalimi nakua: Benna’ tu sissin peca’mu sola ulangna sia iatu tekken mutoe. Nabenmi lako nasangampa’, susito nakea’tangimi.

19Ke’de’mi tu baine iato namale sia nalendokan tu lullungna napakei sule tu pakean balunna.

20Napa’peami Yehuda tu anak bembe’ laki nabaa sangmuanena to Adulam, nasua ulla’bakki tu pa’petambenna dio mai baine iato, apa tae’ naappa’i.

21Mekutanami lako tau inde to nakua: Umbamira tu baine sala’kedo, tu nno’ko’ tonnanu inde Enaim dio randan lalan? Nakuami tu tau iato mai: Tae’ ia baine sala’kedo sae inde.

22Sulemi lako Yehuda nama’kada nakua: Tae’ kuappa’i sia nakua tu tau dio: Tae’ ia baine bualang sae inde.

23Ma’kadami tu Yehuda: Da’ito napoapai, podo da natellekan tau. Kupa’peamo te anak bembe’ laki lako, apa tae’ muappa’i.

24Denmi agi-agi tallung bulan to, napokadami tau lako Yehuda nakua: Iatu Tamar, minintummu ma’gau’ salamo sia kia’tang bule’mo. Nakuami tu Yehuda: Solanni sae naditambenan kayu buangin.

25Matangngamo nasolan tau nasuai tu tau lako matusanna umpokadai kumua: Iatu kama’tambukangku te, iamotu to sipoapa te apa iate! Ma’kada polemi tu baine iato nakua: Tiroi mindara sissin peca’ sola ulangna sia tekken te?

26Mangakumi tu Yehuda nakua: Tongan iate baine na aku, belanna tae’ kubenni tu anakku Syela. Tae’mi nasangampa’len.

27Iatonna la kianakmo tu baine iato, payan kumua rindu tu pia lan pa’tambukanna.

28Marassanmo mangurria’ denmi tu misa’ umpatassu’ limanna anna alai to ma’pakianak tu bannang rarang anna papontoi, nakua: Iamote tu sun dolo.

29Iatonna riu’i tu limanna tama sule, sunmi tu sangmuanena. Nakuami tu to ma’pakianak: Lendu’ ia tu kapessuangammu! Iamoto nadisangai Peres.

30Undinna sunmi tu sangmuanena tu ma’ponto bannang rarang anna sangai Zerah.


  Share Facebook  |  Share Twitter

 <<  Kejadian 38 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran