Dual PanelYusuf umbattuananni tindona Firaun anna diangka’ sulle batang
1Iatonna ganna’mo duang taun ma’tindomi tu Firaun bendan dio randan salu.
2Pakalan kendekmi pitu sapi diong mai salu tu melo rupanna sia malompo anna undaka’ kande dao randanan.
3Pakalanto kendek poleomi pitu sapi senga’ diong mai salu, megi’giran tu rupanna sia madongkong anna bendan sikandappi’ sapi senga’ dio randan salu.
4Na iatu sapi megi’giran rupanna sia madoko pura nakande tu pitu sapi melo rupanna sia malompo. Mangkato pana’dingmi tu Firaun.
5Leppeng poleomi tu Firaun anna ma’tindo ma’penduan. Pakalan tuomi pitung buli gandung lobo’ sia malapu’ dio sangbatang dalame.
6Pakalanto tuoomi pitung buli gandung tu mambu sia nalayu angin lu lan mai matallo.
7Iatu pitung buli mambunna naamma’ tu maloboranna sia malapu’na. Pana’dingmi tu Firaun; a’a ma’tindona’ pale’.
8Iatonna melambi’ dio mai ma’bara-barami tu ara’na Firaun na mesua untambai mintu’ to paissan-issan sia to patanda-tandan dio tondok Mesir; napokadami Firaun lako tau iato mai tu tindona, apa tae’ bang misa’ unnissanni ussembanganni Firaun.
9Saemi mennolo tu pangulu pa’kampa pangiru’ lako Firaun, nakua: Iate allo kukilalai tu salaku.
10Belanna lendu’ tongan sengkena tu Firaun lako to ma’parakana anna pattangna’ sola pangulu pa’kampa kande lan banuanna pangulu pa’kampa tongkonan layuk.
11Iato bongi sangbongi pada ma’tindomokan, aku na ia, iatu pa’tindoki pantan den battuananna.
12Iatu kisolan dio den misa’ to mangura to Ibrani, kaunanna pangulu pa’kampa tongkonan layuk; kipokadai tu tindoki lako, anna sembangi, napantan umpapatui sembangna susitu tindoki.
13Naumba nakua ussembangi susi dukato tu dadi, iatu aku dipasulena’ tama toeku na iatu ia ditoke’.
14Mesuami tu Firaun umpopetambai tu Yusuf, natassu’i tau madoi’ lan mai lo’ko nadiku’ku’i tu beluakna sia disondai tu pakeanna nasae mennolo lako Firaun.
15Ma’kadami tu Firaun lako Yusuf: Dikua ma’tindona’ natae’ bang misa’ tau manarang ussembangi, apa kurangi tu karebammu kumua: muranginna tu misa’ tindo muissanna ussembangi.
16Mebalimi tu Yusuf lako Firaun: Tae’ naaku umpoissanni te, Puang Matua Ia la umpokadai tu la napomelona Firaun.
17Ma’kadami Firaun lako Yusuf nakua: Iatu lan tindoku bendanna’ dio randan salu.
18Pakalan kendekmi pitu sapi diong mai salu, malompo sia melo rupanna anna undaka’ kande dao randanan.
19Pakalan to kendek poleomi pitu sapi senga’, madongkong sia lendu’ megi’giranna tu rupanna sia surrengge-rengge usukna. Lendu’ kadakena tae’ bangpa kutiro lan lili’na tondok Mesir.
20Iatu sapi surrengge-rengge sia megi’giran pura nakande tu sapi malompo pitu tu bunga’-bunga’na kendek.
21Mentamami tambukna, apa tae’ napayan kumua lendu’mo rokko tambukna, belanna megi’giran bang sia rupanna, susi dolona. Pana’dingmo’
22Undinnato kutiro pole’omi lan tindoku: tuo pitung buli gandung dio sangbatang dalame, malappuk sia melo.
23Pakalanto tuo poleomi pitung buli gandung langko sia mambu sia nalayu angin lu lan mai matallo.
24Iatu buli gandung mambunna naamma’ tu malapu’na. Kupokada nasangmote lako mintu’ to pakita-kita, apa tae’ bangi misa’ unnissanni ussembanganna’.
25Ma’kadami tu Yusuf lako Firaun nakua: Iate tindona Firaun misa’ bangsiari, iatu apa Napaden Puang Matua, Napaissanan Firaun.
26Iatu sapi malompo pitu iamo pitung taun sia iatu buli gandung melo pitu, pitung taun duka, na iate tindo misa’ bangsiari.
27Iatu pitu sapi madongkong sia megi’giran tu undinna kendek; ia dukamo pitung taun sia iatu buli gandung langko sia nalayu angin lu lan mai matallo, la pitung taun ra’pak padang.
28Iamote tu kada kupokada lako Firaun, kumua iatu apa la Napaden Puang Matua Napatiroan Firaun.
29Manassa iate la pitung taun lako la memba’ka’ tu bura padang lan mintu’ lili’na Mesir.
30Apa undinna to la sae tu ra’pak padang pitung taun naurunganni tang dikilalaimo tu mintu’ kamemba’karan bura padang lan tondok Mesir sia iatu ra’pak padang iato iamo la urratoi mintu’ tondok.
31Iatu kamemba’karan iato tang dilamban bayo-bayomo lan tondok natumang karorian pannang sae undinna, belanna iatu ra’pak padang iato lendu’ masangna.
32Iatu tindo iato ma’penduan maro’ sae lako Firaun tu belanna iatu apa iato Napamanassa tongan Puang Matua sia Puang Matua duka la umpalaloi madomi’.
33Na totemo melo ke nadaka’i Firaun misa’ to manarang sia kinaa naangka’i la umparenta tondok Mesir.
34La susite napogau’ Firaun: la diangka’ mantari’ sikambi’ panaungan, nadiala sangtaa limanna tu bura padang lan tu pitung taun attu kamemba’karan.
35La naduruk tu mintu’ kande lan to taun melo te la sae sia iatu gandung dipopa’misa’ lan paissanna Firaun sia iatu kande la silele tu tondok dipannii.
36Na iatu mintu’ kande iato la diparingkisan tondok lan to pitung taun ra’pak padang tu la dadi lan tondok Mesir, kumua da nasabu’ tu pa’tondokan napobua’ ra’pak padang iato.
37Iatu kadanna Yusuf to natonganni Firaun sola mintu’ to naala parea.
38Ma’kadami tu Firaun lako tu to naala parea: Umba la tanii unnappa’ misa’ tau susite tu natorroi PenaanNa Puang Matua?
39Ma’kadami tu Firaun lako Yusuf nakua: Belanna Napasombo Puang Matua lako kalemu tu mintu’na te, iamoto tae’ tu tau misa’ manarang sia kinaa susi iko.
40Iko la kuangka’ pangulu lan tongkonan layukku sia iko la umpasun parenta anna podenni kande nakande mintu’ orangku; ia mannamo te torroangku kunii ullosongiko.
41Sia nakuapa Firaun lako Yusuf: Kuangka’moko dadi pangulu lan lili’na Mesir.
42Nalossokammi Firaun tu sissinna lan mai limanna anna patamai limanna Yusuf sia mesua umpapakei sampin kasa malannang sia napamanikki rante-rente bulaan.
43Napakendekmi langngan kareta ma’penduan, iamotu karetana, dolomi tu tau metamba-tamba dio olona nakua: Ma’kamandi’komi! Iamote tu to naangka’ Firaun umparenta mintu’ tondok Mesir.
44Ma’kadami tu Firaun lako Yusuf nakua: Aku te Firaun, apa tae’ nama’din misa’ tau tumengka ba’tu kumorong lan lili’na Mesir ke tae’ na iko!
45Nasangaimi Zafnat Pa’aneah Firaun tu Yusuf sia naben Asnat, anakna Potifera, to minaa dio On napobaine. Sunmi tu Yusuf male ussalong-salongi mintu’ tana Mesir.
Yusuf untoe pangka’ sullebatang
46Tallungpulomo taun dadinna tu Yusuf tonna mennolo lako Firaun, datu Mesir. Messimanmi tu Yusuf lako Firaun anna male ussalongi tu mintu’ tana Mesir.
47Lan to pitung taun kamemba’karan, kendekmi tu burana padang tang dikemba’-kemba’.
48Nadurukmi Yusuf tu mintu’ kande dio tana Mesir lan to pitung taun kamemba’karan, anna annai tu pa’paringki’ lan mintu’ tondok; pada napopa’misa lan mintu’ tondok tu bura padang lembangna.
49Susimoto nadurukmi Yusuf tu gandung tu pada karangan dio biring tasik, naurunganni tae’mo napalanda’i tau umbilangi, belanna tang dikemba’ budanna.
50Tonna tae’pa nalambi’i taun ra’pak padang, dadimo da’dua tu anakna Yusuf, pia muane, napadadianni Asnat, anakna Potifera, to minaa dio On.
51Iatu anak pa’bunga’na Yusuf nasangai Manasye belanna nakua: Napa’deimo Puang Matua lan mai penaangku mintu’ kamaparrisangku sia mintu’ to lan banuanna ambe’ku.
52Iatu anak ma’penduanna nasangai Efraim, nakua: Belanna Napopembati’mo’ Puang Matua lan tu tondok kunii dipakario-rio.
53Iatu pitung taun nanii kamemba’karan dio tana Mesir ganna’mo.
54Randukmi sae tu pitung taun ra’pak padang, susitu napokada Yusuf; ra’pak padang nasang lan mintu’ tondok, apa lan mintu’ tondok Mesir den ia kande.
55Belanna iatonna sipangeloan nasangmo tu pa’tondokan dio Mesir sia sumarro lako Firaun umpalaku kande, ma’kadami tu Firaun lako mintu’ to Mesir, nakua: Lulakokomi Yusuf: pogau’i tu apa napokadangkomi.
56Iatonna rampoi ra’pak padang tu mintu’ tondok iato, nabungka’mi Yusuf tu mintu’ pa’pannian gandung anna balukki lako mintu’ to Mesir, belanna masang tongan tu ra’pak padang lan tondok Mesir.
57Pantan saemi dio mai mintu’ tondok tu tau male lako Mesir unnalli gandung lako Yusuf, belanna masang tongan tu ra’pak padang lan mintu’ tondok.