Dual PanelMa’penduanna siulu’na Yusuf lao unnalli gandung rokko Mesir
1Iatu ra’pak padang tontong bang masang lan tana iato.
2Ta’kala iatonna puramo nakande tu mintu’ gandung nabaa dio mai tana Mesir, nakuami tu ambe’na: Lao polekomi unnalliangki’ kande sidi’.
3Mebalimi tu Yehuda nakua: Iatu puang ma’parenta dio ma’kada pissanmo lako kaleki nakua: Tae’ mima’din untiro pole lindoku, sangadinna ke misolanni tu adimmi.
4Iamoto iake mitangga’i tu adingki kisolan, male siakan rokko unnalliangkomi kande.
5Apa iake tae’i misuai tu adingki, tae’ duka kimale rokko, belanna nakua kadanna tu puang ma’parenta lako kaleki: Tae’ mima’din untiro pole lindoku, sangadinna ke misolanni tu adimmi.
6Nakuami tu Israel: Ma’apai ammi sussai susina’to, ammi laora umpokadanni puang iato, kumua denpa misa’ tu adimmi?
7Mebalimi nakua: Nakali oto’ tongan puang iato umpekutananni tu diona kami sola nasang sia diona rapungki nakua: Tuo siaparaka tu ambe’mi, denparaka misa’ tu adimmi? Mebalimokan susitu tonganna siamo. Umba la kikua unnissanni kumua la ma’kada susite tu puang iato: solanni sae tu adimmi.
8Nakuami tu Yehuda lako Israel, ambe’na: Eloranni te to mangura kumale sola, kike’de’ male, anta tuo, da tamate la kami, la kamu, la iatu mai anakki.
9Aku untanggungi te to mangura, midaka’ lakomira kaleku. Iake tae’i kusolanni sule sia tae’ angku popennoloi lako kalemi, akumora urrengnge’i tu kasalan iato tontong sae lakona.
10Belanna iakenta tang ma’dempa-dempa, manassa totemo penduanmiki’ tibalik!
11Nakuami lako tu Israel ambe’na: Iake susito, pogau’i susite: alami tu apa bu’tu lan padang iate tu melona, patamai pa’panniammi mibaai rokko la mipennoloan lako puang iato, susinna tu pebangki sidi’, sia tani’ enoan sidi’, lite busarungngu’, kamanian, bua pinu’, sia bua badan.
12Sia baai tu doi’ manglokkon penduan, belanna iatu doi’ dipasule tama baba karungmi, la dibaa duka sule, umbai anna sala.
13Ammi solanni tu adimmi, mimale sola lako puang iato.
14Na Puang Matuamora tu Umpoissan angge maritik umpamaturu-turui tu puang iato anna katuru-turuikomi, natangga’i tu siulu’mi sia Benyamin duka misolan sule! Iate aku te, iake dipasayu’na’, elo’namo angku sayu’.
15Naalami tu apa ladipennoloan sia nabaa tu doi’ penduan manglokkon sia ia duka tu Benyamin namale rokko Mesir. Rampomi mennolo lako Yusuf.
16Iatonna tiromi Yusuf den tu Benyamin nasolan nakuami lako to matappa’na lan banuanna: Solanni tama banua te mai tau, pangreranni, mipasakka’i, belanna la kumandena’ sola te tangnga allo.
17Napogau’mi tindeto matappa’ susitu napokadanna Yusuf, nasolanni tama banua.
18Mataku’mi, belanna nasolan tau tama banuanna Yusuf. Nakuami: Ia sia anta dipatama indete, dionamora tu doi’, tu mangka dipasule tama karungta tonna bunga’na, dikua anna den lalan nanii umpaalaiki’ poya sia unno’tonki’, anna potauki’ sola mintu’ keledainta.
19Iamoto napentireke’i tu to matappa’na Yusuf lan banuanna anna sipa’kada-kada dio to’ ba’ba.
20Nakua: Tabe’ puang, iatonna bunga’na saekanni la unnalli kande.
21Susimito tongki rampo rokko banua pa’bongian sia kibungka’ tu karungki, oh... anna pantan lan sia baba karungki tu doi’ki ganna’ bang, apa totemo kibaamo sule.
22Sia kibaa polepa tu doi’ senga’ la kipangallian kande, na iatu doi’ tae’ kiissanni kumua mindara umpatamai karungki!
23Nakuami tu tau iato: Pakari’pii tu penaammi, da mimataku’! Nakamaseimokomi Kapenombammi sia Kapenombanna ambe’mi, Napatamangkomi ianan tama karungmi; iatu doi’mi mangkamo kutarima. Nasolammi sun lako tu Simeon.
24Nasolammi sola nasangi tama banuanna Yusuf anna benni uai anna baseanni lentekna sia napakande duka tu mintu’ keledainna.
25Napasakka’mi tu la napenoloanna sae lako kasaeanna Yusuf tonna tangnga allo, belanna narangimo kumua la torro kumande inde to.
26Iatonna saemo tu Yusuf, napennoloammi lako lan banua, natukku sae rokko padang dio olona.
27Napekutanammi Yusuf tu diona kamalaga’-lagaranna tau iato mai sia nakua: Malaga’ siaraka tu ambe’mi, tu mangka misa’bu’, tuo siaparaka?
28Mebalimi tu tau iato mai: Iatu kaunanmi ambe’ki malaga’-laga’ sia, sia tuopa. Unnundumi tu tau iato mai sia tukku rokko padang.
29Nabangunammi Yusuf tu matanna natiroi tu Benyamin, tu adinna nasangindoran nakuami: Iamoraka adi bongsummi te tu mangka misa’bu’ lako kaleku? Nakua polepa tu Yusuf: Nakamaseimoroko Puang Matua, e anakku.
30Tikarami tassu’ tu Yusuf, belanna mamali’ tongan tu penaanna lako adinna, anna daka’ inan la nanii tumangi’, anna tama inan natumangi’ lan.
31Mangkato mendau’mi anna pengkasarai kalena tassu’, nama’kada nakua: Baami mai tu kande.
32Napalennarammi kande tau tu Yusuf sangtorroan sia iatu siulu’na sangtorroan duka sia iatu to Mesir tu dipakande attu iato sangtorroan duka, belanna tae’ nama’din tu to Mesir kumande sangtalimbungan to Ibrani, apa iamo nakagallinna to Mesir to.
33Nno’ko’mi tu tau iato mai dio olona Yusuf, iatu pa’bunga’ dio siamo torroan anak pa’bunga’ na iatu bongsunna dio siamo torroan anak tampak, naurunganni simangngan sola nasangi.
34Naangka’mi tau tu pa’sanduk dio mai olona Yusuf lako tingayona tau iato mai, apa iatu sandukanna Benyamin pellima losongna na iatu sandukanna to senga’. Mangiru’mi tu tau iato mai sola, sia sende-sende.