Dual PanelYusuf umpa’petandan kalena lako siulu’na
1Susimito iatu Yusuf tang natanan-tananmo tu ara’na dio tingayona mintu’ to dio ren nasolan nametamba nakua: Suai tassu’ tu mintu’ tau indete! Tae’ bangmi tau nasolan Yusuf tonna pa’petandan kalena lako mintu’ siulu’na.
2Ma’urrukammi tumangi’ naurunganni narangi mintu’ to Mesir sia mintu’ to lan tongkonan layukna Firaun.
3Nakuami tu Yusuf lako siulu’na: Akumo Yusuf! Tuo siaparaka tu ambe’ku? Tae’mi napebalii siulu’na, belanna tiramban tongan untiroi.
4Nakuami tu Yusuf lako siulu’na: Inde-indekomi saemi nareke’, nakuami: Akumo Yusuf, adimmi, tu mibaluk sae inde Mesir.
5Apa totemo da mimasussa ba’tu tilalak tu ara’mi, tu mangkamo’ mibaluk sae indete, belanna Nasuana’ Puang Matua dolo la umpatuokomi.
6Belanna totemo mane duang taun tu ra’pak padang lan te tondok, limang taun bangpa, nalan to limang taun tae’ tau la ma’tengko ba’tu mepare.
7Nasuana’ Puang Matua dolo, kumua ammi patorro siapi lan te lino, sia umpamakarimman ba’tu sangapa budanmi ammi marendeng.
8Iamoto tangia kamu umbaana’ sae indete, sangadinna Puang Matua sia Napadadina’ sulle ambe’ lako Firaun sia umpoissan mintu’ lanna tongkonan layukna datu sia umparenta mintu’ tana Mesir.
9Madomi’komi male langngan ambe’ku, pokadai lako: Susite tu kadanna anakmi, Yusuf: Napadadina’ to ma’parenta Puang Matua lan mintu’ tana Mesir, iamoto saekomi, da mima’dempa-dempa.
10Ammi torro dio padang Gosyen sikandappi’ aku, kamu, ambe’, na mintu’ anakmi sia ampomi sia dombami sia bembe’mi sia sapimmi sia mintu’na apa miampui.
11Indemoto la kunii ungkaduttu’komi, belanna la denpa limang taun tu ra’pak padang, da mikapu’duran sola to lan banuammi sia mintu’ tu miampuinna.
12Manassa matammi kalena sola nasang ta’pa sia matanna adingku Benyamin, kumua pudukku bangsiamo ma’kada-kada lako kalemi.
13Iamoto pokadanni ambe’ku tu mintu’ kamala’birangku inde tana Mesir sia mintu’ tu apa nata’pai matammi, mimadomi’ ussolanni dao mai tu ambe’ku.
14Naraka’mi Yusuf tu barokona Benyamin natumangi’ sia tumangi’ duka tu Benyamin anna raka’i tu barokona Yusuf.
15Sia naudung Yusuf tu mintu’ siulu’na anna tumangi’; mangkato maneri umbuang kada lako, tu siulu’na.
16Kaissanammi tu kareba iato tama tongkonan layukna datu, kumua sae tu mintu’ siulu’na Yusuf; iatu kareba iato naposende Firaun sola mintu’ to naala parea.
17Ma’kadami tu Firaun lako Yusuf nakua: Pokadanni siulu’mi susite: Pogau’i te: passampei tu mintu’ keledaimmi ammi male lako tana Kanaan.
18Ammi solanni dio mai tu ambe’mi sia mintu’ to lan banuammi sae inde, angku kamaseikomi apa melo lan tana Mesir sia la mikande tu lompona te padang.
19Totemo dipokadangkomi: Pogau’i te, alanni anakmi sia bainemi tu ba’tu pira-pira kareta lan tondok Mesir sia la misolan duka dio mai tu ambe’mi sae inde.
20Sia da mikatirinnai tu pareanan banuammi, belanna iatu apa mandu melo lan mintu’ tondok Mesir la mipoapa!
21Napogau’mi anakna Israel susito; nabenmi Yusuf ba’tu pira-pira kareta lako susitu kadanna Firaun sia naben pole kinallo lalanna.
22Napapakeimi pakean rundun sisangpasang, na iatu Benyamin diben talluratu’ sikele’ na limang pasang pakean.
23Na lako ambe’na inde sia tu napa’peanni: sangpulo keledai laki unteke’ apa masuli’ allinna dio mai tana Mesir sia sangpulo keledai birang unteke’ gandung sia roti sia ma’rupa-rupa kande la napokinallo ambe’na.
24Nasuami tu siulu’na ke’de’ anna male, sia napakare’na nakua: da misigaga lako lalan.
25Ke’de’mi tu tau iato mai dio mai tana Mesir narampo lako tana Kanaan, lako Yakub, ambe’na.
26Napokadami tau iato mai lako nakua: Iatu Yusuf tuo siapa, ia poleopi umparenta mintu’ tana Mesir! Tilalakmi tu ara’na Yakub, belanna tae’ napatonganni tu kadanna tau iato mai.
27Apa iatonna parampomi lako tu mintu’ kadanna Yusuf sia natiro tu mintu’ kareta tu napa’peanni Yusuf kumua la umbaai lako Mesir, matanami tu penaanna Yakub, ambe’na.
28Nakuami tu Israel: Ganna’moto, iatu anakku Yusuf tuo siapa, la laona’ sitiro kumane mate!