Dual PanelYitro sae untammui Musa
1Narangimi Yitro, to minaa dio Midian, matusanna Musa tu mintu’ apa Napogau’ Puang Matua lako Musa sia lako to Israel, taunNa, sia diona to Israel Nasolan PUANG tassu’ lan mai tondok Mesir.
2Nasolammi Yitro, matusanna Musa, tu Zipora, bainena Musa, tu mangka nasua Musa sule,
3sola tu anakna muane da’dua, misa’ disanga Gersom, belanna nakua Musa: Mangkamo’ to sae lan tondokna tau.
4Na iatu misa’ disanga Eliezer, belanna nakua Musa: Kapenombanna ambe’ku dadi To patunduangku sia Narampanammo’ dio mai pa’dangna Firaun.
5Iatu Yitro, matusanna Musa, sola anakna Musa sia bainena rampo lako Musa lan padang pangallaran dio lili’ buntunna Kapenomban, tu inan nanii ma’tenda.
6Attu iato mesuami umpokadanni Musa kumua: Akumo Yitro, matusammu saemo umpessitammuiko sia ussolanni tu bainemu sola tu anakna da’dua.
7Sunmi tu Musa untammui matusanna, natukku umpenombai sia naudung, anna sipekutanan diona kamalaga’-lagaranna, namane male sola nasangi tama tendana.
8Nauleleammi Musa lako matusanna tu mintu’ apa, tu napogau’ PUANG lako Firaun sia lako mintu’ to Mesir, belanna to Israel, sia mintu’ kamasussan urrampoi dio lu lalan sia umba Nakua PUANG urrampananni tu tau iato mai dio mai mintu’-mintu’na.
9Sendemi penaanna Yitro-belanna mintu’ kameloan Napogau’ PUANG lako to Israel sia belanna Narampanammo lan mai limanna to Mesir.
10Nakuami Yitro: Mintu’na kadipudian lu langngan PUANG, tu urrampanangkomi dio mai limanna to Mesir sia lan mai limanna Firaun.
11Totemo kuissanmo kumua tarompo’ tu PUANG anna iatu mintu’ deata, belanna Narampanammo te bangsa iate lan mai limanna to Mesir belanna matampo tu to Mesir lako tau iato mai.
12Naalami Yitro, matusanna Musa tu pemala’ ditunu pu’pu’ sia pemala’ pangrere’ napennoloan lako Puang Matua; nasae tu Harun sola mintu’ to matua-tua to Israel kumande sola matusanna Musa dio oloNa Puang Matua.
13Iatonna melambi’ unno’ko’ tu Musa umpaolai salunna tu bangsa iato, anna bendan tu tau iato mai dio olona Musa randuk dio mai melambi’ sae lako makaroen.
14Iatonna tiroi matusanna Musa tu penggauranna lako bangsa iato ma’kadami nakua: Umbara susite penggaurammu lako to buda! Ma’apari mumisa-misa unno’ko’, anna bendan nasang tu tau iato mai dio olomu randuk dio mai melambi’ sae lako makaroen?
15Mebalimi Musa lako matusanna, nakua: Iamo bannangna nasae tu tau iato mai lako kaleku la umpekutanan atoran lako Puang Matua.
16Iake denni kara-karana tu tau iato mai, nasae lako kaleku, kumua angku paolai salunna tu kara-karana sola solana; sia angku pokadanni tu mintu’ aluk Napondok Puang Matua sia Sukaran alukNa.
17Nakuammi matusanna tu Musa: Tae’ namelo tu penggaurammu, ke susii te.
18La langga’ kalemu, la iko la iatu mai to musolan; belanna pengkarangan iate lendu’ magasanna lako kalemu, tae’ mubelai misa-misa ungkarangi.
19Totemo perangii tu kadangku, kupokadangko pa’timbangan, anNa rondongko Puang Matua; melo ke mennoloko lako Kapenomban bannang dio bangsa iato sia sorong lakoi Puang Matua tu mintu’ kara-karana.
20Sia ada’i tau iato mai tu mintu’ parenta sia Sukaran alukNa Puang Matua sia patudui tu lalan sipatu la naolai sia gau’ sipatu la napogau’.
21Apa la mudaka’ dio lu tau iato mai tu ba’tu pira-pira to malinta’ sia ungkabangnga’ Puang Matua, sia manappa’ sia ungkabiri’ saro bu’tu kadake, ammu angka’i pangulunna to buda, den pira umpangului sangsa’bu tau, saratu’ tau, limangpulo tau, na sangpulo tau.
22Kumua anna tontong tu tau iato mai umpaolai salunna tu kara-karana to buda, na iatu mintu’ kara-kara kapua la nabaa tau lako kalemu, apa mintu’ kara-kara bitti’ la nara’ta’ kalena tau iato mai; na susito la maringngan tu passanammu, belanna solako umpassanni.
23Iake mupogau’i susito situru’ pepasanNa Puang Matua, manassa la batta’ko umpassanni, anna rampo mana’pa lako inanna tu mintu’ tau.
24Naturu’mi Musa tu kadanna matusanna sia napogau’ tu mintu’ apa napepasanan.
25Napileimi Musa tu to malinta’ lan mai to Israel, naangka’ pangulunna to buda, den umpangului sangsa’bu tau, saratu’ tau, limangpulo tau na sangpulo tau.
26Anna tontong tu tau iato mai umpaolai salunna tu kara-kara to buda; na iatu mintu’ kara-kara kapua dipennoloan lako Musa, apa mintu’ kara-kara bitti’ nara’ta’ kalenamo tau iato mai.
27Mangkato naelorammi Musa male tu matusanna, anna sule lako tondokna.