Dual PanelDiona pa’duruk la dipabendanan kema
1Ma’kadami tu PUANG lako Musa Nakua:
2Suai tu mintu’ to Israel urrampunanNa’ pa’duruk; dio mai tu mintu’ to masorok penaanna, la mirampunanNa’ pamengan.
3Iamote tu pamengan la miduruk dio mai tau iato mai: bulaan sia salaka sia tambaga;
4sia parada lango-lango sia lango-lango makaseda sia karamisi sia lenan melo sia bulu bembe’;
5sia kuli’ domba laki pa’damorro’ mararang sia kuli’ taka’ sia kayu simmin;
6sia minna’ la ma’pamasiang sia pebangki’ la dirauan minna’ dipa’minnakan sia dipa’tokkoan sia la dipodupa;
7sia ake’ ido sia parimata la dimatan epo’ sia pesambo ara’.
8Ia nagaraganNa’ tau iato mai tu inan maindan, angKu unnisung lan lu tangngana tau iato mai.
9Susitu mintu’ la Kupadulluangko, susitu pandirinna kema iato sia susitu pandirinna mintu’ pareananna, susi dukamoto la mugaragai.
Diona patti basse
10La nagaraga tau iato mai tu misa’ patti, kayu simmin digaraga, duang siku ssangtangnga landona sia babana sangsiku sia langka’na sangsiku ssangtangnga.
11Iatu patti iato la mukallasa’ bulaan massang tongan; kallasa’i tu lanna lu sia salianna, sia la mugaragan sa’pi’ bulaan daona lu tiku lao.
12Sia pati’noranni komba a’pa’, pale’ke’i dio to a’pa’ lette’na, da’dua dio sesena na da’dua pole’o dio sangsesena.
13Sia iatu pebullena kayu simmin, ammu kallasa’i bulaan.
14La muulu tu pebulle tama komba iato dio sa’dena patomali, anna ia dibulleanni tu patti iato.
15La manda’ bang tu pebullena lan komba iato, tae’ nadialai.
16La mupatama patti iato tu kasa’bian tu la Kubenko.
17Sia garagai misa’ tutu’ pebase kasalan bulaan massang tongan, duang siku ssangtangnga landona sia babana sangsiku ssangtangnga.
18La mugaraga tu da’dua karubion bulaan, iamotu bulaan pa’kombong la mugaragai, dao tampakna patomali tu tutu’ pebase kasalan.
19Garagaiko misa’ karubion dao tampak sangsesena, na misa’ pole’o dao tampak sangsesena; iato tutu’ pebase kasalan sola tu karubion dao tampakna patomali la mupasikande mitampa.
20La umballa’ pani’na patomali langngan tu karubion iato, anna samboi pani’na tu tutu’ pebase kasalan sia la sitingoan tu lindona; namentiro rokko tutu’ pebase kasalan tu matanna.
21La mupatorro tu tutu’ pebase kasalan dao pattinna, ammu palanni patti iato tu kasa’bian tu la Kubenko.
22Indemoto tu la Kunii ussitammuangko sia ussipa’kadangko dao mai tutu’ pebase kasalan lan mai alla’na da’dua karubion, tu dao patti kasa’bian, diona tu mintu’ apa Kubenko la muparampo lako to Israel.
Meda nanii roti dipennoloan
23Sia la unggaragaiko misa’ meda kayu simmin, duang siku landona, babana sangsiku na langka’na sangsiku ssangtangnga.
24Sia la mukallasa’ bulaan massang tongan sia la mugaragan sa’pi’ bulaan tiku lao.
25La mugaragan duka petolo’ tiku lao sangpala’ lua’na, sia la musa’pi’ bulaan tiku lao tu petolo’ iato.
26La mugaragan komba bulaan a’pa’, pale’ke’i tu komba iato lako a’pa’ tetukna.
27La sikandappi’ petolo’ iato tu naninna komba, tu la diului pebulle tama la umbullei tu meda iato.
28Iatu pebulle kayu simmin la mugaraga sia la mukallasa’, anna ia dibulleanni tu meda.
29Sia la mugaragan piringna sia dolong-dolongna sia sere’na sia balubunna dipa’bolloan; iatu apa iato bulaan massang tongan la mugaraga.
30Sia palenna’i tu roti dipennoloan dao meda iato tontong dio oloKu.
Diona tongkonan palita
31La mugaraga tu misa’ tongkonan palita bulaan massang; iatu tongkonan palita bulaan pa’kombong la digaragai susi dukato tu tongkonanna sia batangna; iatu bunga tiballa’na sia kalopakna sia bunganna la mupasikande mutampa.
32Annan tangkena la sun dio sa’dena patomali, tallu tu tangkena tongkonan palita la sun dio sa’dena sangbali na iatu tallu la sun dio sa’de sangbalinna.
33Iato tallu bunga tiballa’ la susito bunga badam rupanna dio sangtangke sola kalopakna na bunganna sia tallu bunga tiballa’ la susito bunga badam dio sangtangkenao sola kalopakna na bunganna; la susimoto tu annan tangkena sun lan mai batang tongkonan palita iato.
34Nadio batangna tongkonan palita iato la den a’pa’ bunga tiballa’ la susito bunga badam rupanna sola kalopakna sia bunganna.
35Sia misa’pa kalopak diongna lu tangke dionganna tu sun patomali lan mai, iatu misa’ kalopak diongna lu tangke tangngana tu sun patomali lan mai, iatu misa’ pole’o kalopak diongna lu tangke daoanna tu sun patomali lan mai; la susimoto tu annan tangkena sun lan mai batang tongkonan palita iato.
36Mintu’ kalopak sia mintu’ tangkena la sun lan mai batangna; mintu’nato la dipasikande ditampa dio mai bulaan pa’kombong massang.
37La mugaragan pitu palita ammu padaonai lu, na iake dipadukkui la parrang lu lako tingayo.
38Mintu’ tu pesipi’na sia inan dinii umpa’dei bulaan massang la digaragai.
39Iatu tongkonan palita sola mintu’ pareanna sangtalenta bulaan massang la digaraga.
40La mupengkilalai tongan, ammu garagai tu mintu’nato susitu pandiri mangka dipatiroangko dao buntu iato.