Alkitab Mobile SABDA
[VER] : [TORAJA]     [PL]  [PB] 
 <<  Keluaran 26 >> 

Diona kema

1Iatu kema iato la mugaragan kulambu sangpulo lamba’na; iamotu bannang lenang melo dikaridi’ sia bannang ma’rupa lango-lango sia lango-lango makaseda sia karamisi; iatu sampin iato la mutannun melo tongan sia la mupopa’ karubion lan.

2Iatu landona ke misa’oi duangpulo ngkarua sikunna, na iatu sangka’na patang siku sia la sangsukaranri tu mintu’ kulambu iato.

3Iato limang lamba’ kulambu la sikande-kande nasang na iato limang lamba’na la sikande-kande nasang duka.

4Sia la mugaragan dukapa ba’tu pira-pira kale’ke’ lango-lango dio biringna tu misa’ kulambu dio tampakna kulambu tu dipasikandemo, susi dukato la mugaraga dio biringna kulambu misa’nao dio tampakna tu dipasikandemo.

5Limangpulo kale’ke’ la mugaraga dio to’ biring kulambu sanglamba’ na limangpulo kale’ke’ dio biring kulambu misa’nao tu dipasikandemo; mintu’ tu kale’ke’ la sipatu nasang.

6Sia la mugaragampa limangpulo pekadang bulaan, anna pekadang iato la mupasikandeanni tu kulambu, naurunganni mendadi misa’ tu kema iato.

7Sia la unggaraga dukapako kulambu tenda kulambu bulu bembe’ la dipotenda dio salianna tu kema iato, iatu kulambu tenda iato la mugaraga sangpulo misa lamba’na.

8Iake sanglamba’oi tu kulambu tenda la tallungpulo sikunna tu landona na patang siku tu babana; la sangsukaranri tu kulambu tenda sangpulo misa lamba’na.

9Iatu mintu’ kulambu tenda la mupasitoe limang lamba’ mupamisa’, susi dukato annannapa lamba’na mupamisa’; iatu lamba’ kulambu ma’pennannanna la mulu’pi’ dua dio tingayo ba’ba tenda iato.

10La unggaragako limangpulo kale’ke’ dio biringna to kulambu sanglamba’, tu kulambu dio iringna tu dipasikandemo, na limangpulo kale’ke’ dio kulambu misa’nao tu dipasikandemo.

11Sia la unggaragako limangpulo pekadang tambaga, ammu patamai mintu’ kale’ke’ ammu pasikandei tu tenda iato mendadi misa’.

12Iatu kulambu tenda tu mendoke’, sesena kulambu mendoke’ iato la mupopendoke’ dio boko’na kema iato.

13Iatu la’binna landona kulambu tenda indena mai sia diona lu la mupopendoke’ sangsiku dio sa’de patomalinna kema, la ussamboi.

14Sia la mugaragan duka misa’ pesambo kuli’ domba laki pa’damorro’ mararang, na daona lu misa’ pesambo kuli’ taka’.

15Sia la mugaragampa papan kayu simmin la dirinding te’dekanni tu kema iato.

16Iatu landona papan iato la sangpulo siku ke misa’oi na iatu babana la sangsiku sangtangnga ke misa’oi.

17Dio misa’ papan la den da’dua petangki’na, tu la sitoe-toe; la mupasusi nasang to tu mintu’ papan kema iato.

18La mupasusite tu mintu’ papan kema iato: duangpulo papan tu la rampe sau’na.

19Sia la unggaragapoko patangpulo lette’ salaka diongna lu to duangpulo papan; da’dua lette’ diong misa’ papan la dinii ullasukki tu petangki’ na da’dua pole’o diong misa’ papan dinii ullasukki tu petangki’.

20Susi dukato la mugaragan duangpulo papan tu sa’de senga’na kema, iamotu rampe rekkena,

21sola patangpulo lette’ salakana: da’dua lette’ diong misa’ papan, na da’dua lette’ diong papan sidampi’na.

22Apa iatu boko’ kema rampe matampu’na la mugaragan annan papan.

23Sia la mugaragampa da’dua papan la untutu’i tu da’dua tetuk kema tu diona boko’.

24La pada bang tu papan iato da’dua diongna lu sia daona lu dio komba misa’na; la susimoto tu papan iato da’dua; anna patomalinna to la dadi tu da’dua tetuk.

25Iamoto na iatu mintu’ papan la karua situang lette’ salakana: sangpulo annan tu lette’na; sida’dua lette’na diong ke misa’oi papan;

26Sia la mugaragan ba’tu pira-pira pesa’pi’ kayu simmin: limang batang lako mintu’ tu papan dio sangsesena kema,

27na limang batang lako mintu’ papan dio sangsesena pole’o, sia limapa lako tu mintu’ papan dio boko’ kema rampe matampu’na.

28Iatu pesa’pi’ lan tangngana tu lan tangnga papan la natarru’ tu mintu’ papan iato randuk dio mai tampakna sae lako tampak sangbalinna.

29Sia la mukallasa’ bulaan tu mintu’ papan sia bulaan la mugaraga tu komba dinii unnulu pesa’pi’, sia la mukallasa’ bulaan tu mintu’ pesa’pi’.

30Mangkato la mupabendanmo tu kema iato susitu pandiri mangka dipatiroangko dao buntu iato.

31Sia la mugaragampa misa’ kulambu bannang ma’rupa lango-lango sia lango-lango makaseda sia karamisi sia bannang melo dikaridi’; iatu sampin iato la mutannun melo tongan sia la mupopa’karubion lan.

32Sia toke’i a’pa’ lentong kayu simmin tu dikallasa’ bulaan; iatu lentong iato nanii pekadang bulaan dio anna dipadao a’pa’ lette’ salaka.

33Sia la mutoke’ tu kulambu iato diong pekadangna, ammu baai tama tu patti kasa’bian lanna lu kulambu, naurunganni iatu kulambu iato la ussapa’i tu inan maindan anna inan tarru’ maindan;

34Ammu patoppo’i tu tutu’ pebase kasalan dao patti kasa’bian lan inan tarru’ maindan.

35Dio salianna kulambu iato munii umpatorroi tu meda sia tongkonan palita sitingoan tu meda iato rampe sau’na kema na iatu meda la mupatorro rampe rekkena.

36La mugaragampa misa’ kulambu tu ba’ba tenda, iamotu bannang ma’rupa lango-lango sia lango-lango makaseda sia karamisi sia bannang melo dikaridi’: misa’ pa’tannun paruki’.

37Iatu kulambu iato la mugaragan lentong kayu simmin lima ammu kallasa’i bulaan; iatu lentong iato palakoi pekadang bulaan, sia la mupati’noran lima lette’ tambaga.


  Share Facebook  |  Share Twitter

 <<  Keluaran 26 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel