Dual PanelInan pemalaran pantunuan dupa
1Sia la unggaragaiko misa’ inan pemalaran la dinii untunu dupa; kayu simmin la mugaraga.
2La sangsiku tu lambe’na, na sangsiku tu sangka’na, massulapa’ a’pa’, na iatu langka’na duang siku sia la sikande tu tandukna.
3Sia kallasa’i bulaan massang, la papan daona lu, la rindingna tiku lao, sia iatu mintu’ tandukna, sia la mugaragan sa’pi’ bulaan tiku lao.
4Sia mutampan komba bulaan diongna lu sa’pi’na siduanan dio sa’dena patomali, dinii unnulu pebulle.
5Iatu pebullena kayu simmin, la mugaraganni sia la mukallasa’ bulaan,
6iatu inan pemalaran iato la mupadio tingayo kulambu tu ussapa’ patti kasa’bian dio tingayo tutu’ pebase kasalan tu daona lu kasa’bian, dio tu inan la Kunii sae ussitammuangko.
7Dao inan pemalaran iato la natunu Harun tu dupa; kiallo-kiallo la natunu, ke la unnissii palita.
8Ianna padukkui Harun tu palita iato, ke makaroenni la natunu dukato, anna tontong dadi misa’ bau busarungngu’ dio oloNa PUANG la misiosso’i.
9Dao to inan pemalaran iato da mutunu dupa senga’ ba’tu pemala’ ditunu pu’pu’ ba’tu kande dipemalaran, sia da mubolloi pemala’ pantedok.
10Sipissan lan sangtaun iatu Harun la umpaden kadiseroian kasalan, iamoto nararai rara suru’ pengkalossoran la usseroi kasalan, tu tandukna; sipissan lan sangtaun la umpaden kadiseroian kasalan urrarai tu inan pemalaran iato la misiosso’i; iamote tu apa tarru’ maindan dio oloNa PUANG.
Diona doi’ pa’duruk
11Sia ma’kadapa tu PUANG lako Musa Nakua:
12Iammu alai tu bilanganna mintu’ to Israel, ke mubilangi budanna, iato attu dinii umbilangi la nanii pada umpennoloanni lako PUANG tu doi’ pela’bak penaanna kumua da nadadi misa’ kasanggangan dio lu tau iato mai, ke mubilangi.
13Iatu pada la napennoloan to naala bilangan iato, iamotu sangtangnga sikele’, tu pada timbangan sikele’ masero – iatu sikele’ iato duangpulo gera angga’na – iatu sangtangnga sikele’ iamo doi’ pa’duruk, la dipennoloan lako PUANG.
14Minda-minda naala bilanganna to duangpulo taun dadinna ba’tu la’bi, iamo la umpennoloan pa’duruk susito lako PUANG.
15Tae’ nama’din dipalosong tu to sugi’, tae’ nama’din dipasosso’ tu to bongko dio mai to sangtangnga sikele’, ke umpennoloanni pa’duruk lako PUANG la mipopela’bak penaammi.
16Iamoto la muala tu doi’ pela’bak dio mai to Israel sia sorongi belanna kamenomban lan tenda kasitammuan, anna iatu iannato napobannang kapengkilalanNa PUANG lako Israel la dipopela’bak penaanna.
Pembasean tambaga
17Ma’kadami PUANG lako Musa Nakua:
18Sia la unggaragako misa’ pembasean tambaga, la dinii membase, sia patorroi lan kasiallaranna tenda kasitammuan anna inan pemalaran, anna dipatamai uai.
19Iatu Harun sola tu mai anakna muane la umbasei limanna sia lette’na uai lan mai pembasean iato.
20Iatu tau iato mai, ke tamai tenda kasitammuan, la membase da namate: susi dukato ke urreke’i inan pemalaran la menomba sia untunu pemala’ ditunu pu’pu lako PUANG.
21Attu iato la nabasei tu limanna sia lette’na, da namate; iamote tu misa’ aluk matontongan dipondokanni sola bati’na la nasiosso’i.
Minna’ masero la dipa’minnakan sia dipa’tokkoan
22Sia ma’kadapa tu PUANG lako Musa Nakua:
23La muala tu pebangki’ keangga’, iamotu muru’ to’do kalena lan mai kuli’na limaratu’ sikele’ sia kayu matanning busarungngu’ sangsesena, iamotu duaratu’ limangpulo sikele’, sia iatu bangle busarungngu’ duaratu’ limangpulo sikele’
24sia kadinge’ limaratu’ sikele’ tu pada timbanganna sikele’ maindan sia minna’ saitun misa’ hin.
25Iamoto tu la mugaragai minna’ maindan la dipa’minnakan sia dipa’tokkoan iamotu misa’ panggaraga pebangki’ dipasirau melo, susi panggaraga pande ma’bangki’; iamoto tu la dadi minna’ maindan la dipa’minnakan.
26Iamoto tu la muminnakan tenda kasitammuan sia patti kasa’bian
27sia iatu meda sola mintu’ pareana sia tongkonan palita sola mintu’ pareana sia iatu inan pemalaran pantunuan dupa;
28sia inan pemalaran dinii mantunu sola mintu’ pareana sia iatu pembasean den lette’na.
29La mupamaindan nasang tu mintu’nato, anna tarru’ maindan; na minda-minda ungkaka’i to, la maindan.
30Sia la mubolloi minna’ iato tu Harun sola tu anakna muane sia mupemaseroi, anna toei tu katominaan lako Kaleku.
31La mupokadan to Israel, kumua: Iamote tu minna’ maindan la dipa’minnakan sia dipa’tokkoan dipamaindananNa’ la misiosso’i.
32Tae’ nama’din dibolloan kale tolino sia tae’ nama’din unggaragai susinna, tu la pada garaganna: iamo misa’ apa maindan, tu la mipomaindan.
33Minda-minda unggaragai minna’ susite, ba’tu umpalakoi to tang sielle’, tau iato la disabu’i dio mai bangsana.
Dupa masero
34Sia Nakuapa tu PUANG lako Musa: Alako pebangki’ busarungngu’: muru to’do kalena, onik sia dama’ busarungngu’, iamotu pebangki’ busarungngu’ sia kemenyan massang, mintu’nato la pada budanna.
35La mugaragai misa’ dupa, tu apa susi panggaraga pande ma’bangki’, tu disiai, anna massang, iamotu misa’ apa masero.
36La mupemanissangi tongan mulambuk na iatu manissangna patorroi dio olona Kasa’bian lan tenda kasitammuan, tu inan Kunii sae ussitammuangko; iamoto tu la tarru’ maindan lako kalemi.
37Dupa susimorate tu la mugaragai, da migaraganni kalemi tu apa-apa pada garaganna; iatu iannato la misanga maindan lako PUANG.
38Minda-minda tu unggaragai tu susinnate, la nauduk, la disabu’i dio mai bangsana.