Dual Panel1(5-24) Ma’kadami PUANG lako Musa, Nakua: Totemo ma’din mutiro tu apa la Kugauran Firaun; belanna tete dio lima makuasa, anna rampananni male tu tau iato mai, ondongpi tete dio lima makuasa na la urrambai tu tau iato mai tassu’ lan mai tondokna.
2(6-1) Ma’kadami Puang Matua lako Musa, Nakua: Akumo tu PUANG!
3(6-2) Kupaombo’mo tu Kaleku lako Abraham, Ishak sia Yakub butung Puang Matua Umpoissan angge maritik, apa tae’ natandai tau iato mai, kumua disangaNa’ PUANG.
4(6-3) Sia tae’ Kutanan mannai tu basseKu sola tau iato mai la ungkamaseanni tu tondok Kanaan, iamotu tondok pempueanna, tu mangka nanii mempue.
5(6-4) Sangadinna Kurangi dukamo tu sarrona to Israel, tu napokaunan to Mesir sia Kukilalaimo tu basseKu.
6(6-5) Iamoto pokadanni to Israel, kumua: Akumo tu PUANG, sia Akumo la ullendokangkomi dio mai pa’diaman napabokkokangkomi to Mesir sia Akumo la ullessurangkomi dio mai pa’kaunananna tau iato mai sia Akumo la ulla’bakkomi tete dio takia’ tiangka’ sia ukungan kapua.
7(6-6) La Kuangka’komi dadi taungKu angKu dadi Kapenombammi, ammi issanni, kumua Akumo tu PUANG, Kapenombammi, tu urrampanangkomi dio mai pa’diaman napabokkokangkomi to Mesir.
8(6-7) Aku la ussolangkomi tama tondok, tu umpalaoNa’ sumpa unnallu’i la umbenni Abraham, Ishak sia Yakub: Akumo la umbenkomi la dadi misa’ mana’, iamotu Aku, PUANG.
9(6-8) Ma’kadami tu Musa susito lako to Israel, apa tae’ naperangii tu Musa, belanna kapussakanna penaanna sia belanna pa’pokaunanan masang iato.
10(6-9) Sia ma’kadapa tu PUANG lako Musa, Nakua:
11(6-10) Malemoko sipa’kada Firaun, datu Mesir, anna eloranni tu to Israel tassu’ lan mai tondokna.
12(6-11) Apa mebali tu Musa lako PUANG, nakua: Akkenna to Israel tae’ namorai umperangii te taumMi, ondong pissanpi tu Firaun na la morai umperangii tu kadangku, te to magasa puduk.
13(6-12) Ma’kadami tu PUANG ussua Musa sola Harun lako to Israel sia lako Firaun, datu Mesir, kumua anna solanni tu to Israel tassu’ lan mai tondok Mesir.
Ossoran bati’na Ruben, Simeon na Lewi
14(6-13) Inde sia tu mintu’ pangulu rapunna anakna Ruben, anak pa’bunga’na Israel, iamotu: Henokh, Palu, Hezron na Karmi; iamote tu mintu’ pa’rapuanna Ruben.
15(6-14) Inde sia tu anakna Simeon disanga: Yemuel, Yamin, Ohad, Yakhin, Zohar na Saul, tu misa’ anak napadadianni baine to Kanaan; iamote tu mintu’ pa’rapuanna Simeon.
16(6-15) Inde sia tu sanganna mintu’ anakna Lewi, situru’ kadadianna, iamotu: Gerson, Kehat na Merari. Mintu’ tu taun kadadianna Lewi saratu’tallungpulo mpitu.
17(6-16) Iatu anakna Gerson disanga Libni na Simei naposanga sanga pa’rapuanna.
18(6-17) Iatu anakna Kehat disanga: Amram, Yizhar, Hebron na Uziel; mintu’ tu taun kadadianna Kehat saratu’ tallungpulo ntallu.
19(6-18) Iatu anakna Merari disanga Mahli: na Musi; iamote tu mintu’ pa’rapuanna Lewi situru’ kadadianna.
20(6-19) Naalami Amram tu Yokhebed, pa’indoranna, napobainei, napadadianni tu Harun sola Musa. Mintu’ tu taun kadadianna Amram saratu’ tallungpulo mpitu.
21(6-20) Iatu anakna Yizhar disanga: Korah, Nefeg na Zikhri.
22(6-21) Iatu anakna Uziel disanga: Misael, Elsafan na Sitri.
23(6-22) Naalami Harun tu Eliseba, anakna Aminadab, siulu’na Nahason, napobainei, napadadianni Harun tu Nadab, Abihu, Eleazar na Itamar.
24(6-23) Iatu anakna Korah disanga: Asir, Elkana na Abiasaf; mintu’na te pa’rapuanna to Korah.
25(6-24) Iatu Eleazar, anakna Harun, naala misa’i tu anakna Putiel napobainei, tu umpadadianni Pinehas. Mintu’na to pangulunna rapunna to Lewi naposanga sanga pa’rapuanna.
26(6-25) Iamotu Harun sola Musa, tu mangka Nanii PUANG ma’kada, Nakua: Solanni tu to Israel tassu’ lan mai tondok Mesir unturu’ mintu’ tuntunanna.
27(6-26) Iamotu ma’kada lako Firaun, datu Mesir, anna eloranni tu to Israel tassu’ lan mai tondok Mesir. Iamora tu Musa sola Harun.
Musa sola Harun umpogau’ tanda kalle-kallean dio olona Firaun
28(6-27) Iatonna ma’kada tu PUANG lako Musa dio tondok Mesir,
29(6-28) susite tu kadanNa, Nakua: Akumo PUANG; parampoanni Firaun, datu Mesir tu mintu’na Kupokadangko.
30(6-29) Mebalimi tu Musa dio oloNa PUANG, nakua: Iatu aku te, to magasa pudukna’; ma’apai na la umperangiina’ Firaun!