Dual Panel1Tonganna, Kusua pesuangKu, tu la umparandan lalan dio oloKu; simpolo saemi tu Puang, tu midaka’, lako Banua kabusunganNa, iamotu Malaeka’ kasibassean tu mikamali’. Tonganna la sae, kadanNa PUANGna mintu’ ma’dandan maritik.
2Apa mindara ungkullei umpatananni tu allo kasaeanNa, sia mindara ma’din la bendan, ke somboI? Belanna susi api to ma’kombong sia susi sabun to ma’galantang.
3Belanna la unno’ko’ ungkombong salaka sia umpamatasakki. La usseroi bati’na Lewi sia la ussudii susi bulaan sia salaka, kumua anna pemalaranni lako PUANG tu pemala’ situang kamaloloan.
4Attu iato iatu pemala’na Yehuda sia Yerusalem la naala penaanNa PUANG, susitu allo dolo-dolona sia taun lendu’.
5La Kureke’komi ma’paolai salu, sia madoi’Na’ umpasalai tu to balik mata, tu to pasandak salu lako rampanan kapa’, tu to umpalao sumpa tang tongan, tu to umpatadang sarona to sumaro, tu to umpakario-rio baine balu sia pia biung, tu to untumpu to sae, apa tae’ nakataku’Na’, kadanNa PUANGna mintu’ ma’dandan maritik.
Pa’pakilala la mengkatoba’
6Tonganna, Aku te, iamotu PUANG, tang leluk, na kamu, iamotu bati’na Yakub, tae’ midisabu’i.
7Randuk dio mai linona nene’ to dolomi, miboko’imo tu apa Kupondok sia tae’mo mikaritutui. Sulemokomi lako Kaleku, angKu sule duka lako kalemi, kadanNa PUANGna mintu’ ma’dandan maritik. Apa mikuaora: Bannang apara angki la sule?
8Ma’dinraka tu tolino urrampa apanNa Puang Matua? Moi tae’ nama’din mirampa duka tu apangKu. Ma’kadakomi mikua: Umbara kikua urrampai, tu apamMi? Bannang dio pissan taa sangpulona tu mintu’ apa sia pa’duruk.
9Narampoikomi tampak ropu, namoi susito mirampa duka tu apangKu, e kamu mintu’ bangsa.
10Baa nasangi tu pissan taa sangpulona mintu’ apa tama inan pangrampunan, kumua anna den kande lan banuangKu; tobaNa’ tu diona to, kadanNa PUANGna mintu’ ma’dandan maritik, ke tae’i Kubungkarangkomi pentiroanna langi’ sia umbarrakanni lako kalemi tu kamauparan sebo.
11Iake susito la Kutampakki ropu tu batik londong, ammi pomeloi, kumua da na sanggangi tu bura padangmi sia kumua iatu garonto’ anggoro’ dio pa’lakmi tae’ nala tang menta’bi’ lako kalemi, kadanNa PUANGna mintu’ ma’dandan maritik.
12Sia mintu’ bangsa la ussa’bu’ pa’pudi-pudian, kumua maupa’komi belanna la dadikomi misa’ padang dikamali’, kadanNa Puangna mintu’ ma’dandan maritik.
Kasisengaranna to malambu’ na to kelok
13Ma’kada layuk bangkomi tu diona Aku, kadanNa PUANG. Apa ma’kadakomi mikua: Apara kisipa’kada-kadai tu diona Kalemi?
14Ma’kadakomi mikua: Tae’ gai’na tu mengkaola lako Puang Matua; apara tapomaupa’ ungkaritutui tu parentaNa sia iake lolangki’ ma’pote dibolong dio oloNa PUANGna mintu’ ma’dandan maritik?
15Na totemo tapokada kumua maupa’ tu to matampo; tangia kumua manaman manna, moi naumpogau’ kakelokan, ondongpi natoba duka tu Puang Matua, anna tilendok siapa.
16Attu iato iatu mintu’ to ungkataku’ PUANG pada sipa’kada-kada, kumua: Napalan penaa sia Narangi PUANG sia dio oloNa den disura’ tu misa’ sura’ kapengkilalan, napomeloi tu to ungkataku’ PUANG sia umpakala’bi’ sanganNa.
17Iatu tau iato mai la dadi apangKu, lan to allo la Kupasakka’, kadanNa PUANGna mintu’ ma’dandan maritik. Sia la Kukaduttu’, susito misa’ ambe’ ungkaduttu’ anakna, tu mengkaola lako kalena.
18Attu iato la balik tu penaammi, ammi tiroi tu kasisengaranna to malambu’ sia to kelok, sia kasisengaranna minda tu mengkaola lako Puang Matua na minda tu tae’ namengkaola lako Kalena.