Dual PanelKasaeanna Kadatuan pasali rampa’
1Sia la dadi, ke allo ma’katampakannai, kumua iatu buntu banuanNa PUANG la bantang butung tu buntu malangka’na mintu’ buntu, sia la layuk untongloi mintu’ tanete, anna mintu’ bangsa lolong sae lako kalena.
2Sia buda to sangpetayanan la ke’de’ male anna ma’kada nakua: Maikomi anta male langngan buntunNa Puang, langngan banuanNa Kapenombanna Yakub, anNa ada’iki’ diona mintu’ lalanNa sia anta olai tu mai lalanNa, belanna lan mai Sion la nanii bu’tu tu Sukaran aluk sia iatu kadanNa lan mai Yerusalem.
3Sia Ia la umpaolai salunna tu mintu’ bangsa sia urra’ta’ kara-karana mintu’ to sangpetayanan tarompo’ sae lako tondok mambela. Attu iato iatu pa’dangna la natampa pole’ tengko bassi sia iatu dokena la natampa pole’ pese’bo’, moi misa’ bangsa tae’mo la umbua’ pa’dangna la unnea bangsa senga’ sia tae’mo nala melada’ tu tau iato mai parari.
4Sangadinna la pantan unno’ko’ diong lu garonto’ anggoro’na sia diong lu garonto’ arana, anna moi misa’ tae’mo la umpatiramban lenni tu tau iato mai, belanna pudukNa PUANGna mintu’ ma’dandan maritik tu mangka umpokadai te.
5Belanna mintu’ bangsa pantan lolang tete dio sanganna deatanna, apa iatu kita la lolangki’ tete dio sanganNa PUANG, Kapenombanta, tontong sae lakona.
Yerusalem lan kapussakan, apa dipamanassammo kamala’biran
6Allo iato, kadanNa PUANG, la Kurampun tu to keppa, sia la Kupulung tu to tisambo’ sia iatu mai to Kuparampoi kamandasan.
7Iatu to keppa la Kupadadi to torrona sia iatu to dirambai male la Kupadadi misa’ bangsa mawatang, anNa PUANG, la Undatui dao buntu Sion, randuk totemo tontong sae lakona.
8Na iatu iko, e Migdal-Eder, e Ofelna anak dara Sion, la nareke’moko sia narampoiko kaparentan dolo, iamotu kadatuanna anak dara Yerusalem.
9Ma’apai ammu melallak-lallak susito? Tae’raka datummu? Ba’tu sabu’raka tu pa’bisarammu, muurunganni mapa’di’ susito mangurria’?
10Malimukku-mukkuko sia melallakko, e anak dara Sion, susito manguria’; belanna totemo la tassu’ko lan mai kota, ammu torro dio lu padang sia la rampoko lako Babel. Inde to dio la dinii urrampanangko; inde to dio la Nanii PUANG ullendokangko lan mai limanna ualimmu.
11Moi totemo budamo tu bangsa sirampun unneako, tu ma’kada nakua: Da’ito namatuna, sia naporai matanta mentiro lako Sion!
12Apa tae’ natandai tau iato mai tu tangnga’Na PUANG sia pa’timbanganNa, kumua la Narampun susi patuku gandung dao panglulluran.
13Bendanko sia lullu’i, e anak dara Sion, belanna iatu tandukmu la Kupopendadi bassi sia iatu kanukummu la Kupopendadi tambaga ammu nisak-nisakki tu ba’tu pira-pira bangsa sia la musabu’i, dipemalian PUANG tu saro bu’tu kadakena sia mintu’ apanna la mupa’pemalian Puangna mintu’ lino.