Alkitab Mobile SABDA
[VER] : [TORAJA]     [PL]  [PB] 
 <<  Mazmur 107 >> 

SURA’ MA’PELLIMANNA: (PA’PUDIAN 107–150) ;Pa’pudi-pudian lako Puang Matua tu merampanan dio mai mintu’ kamaparrisan

1Pudimi tu PUANG, belanna masokan Ia, sia iatu kamasokananNa tang tileluk sae lakona.

2Sipatu tu kada iato nasa’bu’ mintu’ to Nalendokan PUANG, tu Nalendokan dio mai lisu pala’na uali.

3Sia iatu to Napasikorok londong dio mai mintu’ tondok, dio mai matallo matampu’, daa mai ulunna salu lo’ mai pollo’na uai.

4Mintu’i massola nasang salamba salaomo dio lu padang aak dio to’ lalan makarorrong. Sia tae’ kota naappa’ la nanii torro.

5Topomi tu tau iato mai sia ma’rang, naurungan tang ussau’mi.

6Iatonna iato meongli’mi langngan PUANG tu tau iato mai lan kamandasanna, anNa rampananni dio mai kamaparrisanna.

7Narenden mana’pamo tu tau iato mai lako lalan marante, kumua anna rampo lako kota tu la nanii torro.

8Sangapaoi anna pudii tau iato mai tu PUANG belanna kamasokananNa, sia iatu belanna mintu’ penggauran kalle-kalleanNa lako ma’rupa tau!

9Belanna Napapayamo tu penaa ma’rangna, sia iatu penaa topona Napedia’imo kameloan.

10Iatu mintu’ to torro lan kamalillinan sia kapi’tukan, manda’ napori kamandasan sia rante bassi.

11Belanna umbali-bali kadanNa Puang Matua sia untapa’ pa’timbanganNa Patodoranna.

12Iamo bannangna to anNa pabussui kamandasan tu penaanna tau iato mai; tisumbangmi tu tau iato mai natae’ tu to patunduanna.

13Iatonna iato meongli’mi langngan PUANG lan kamandasanna, anNa lendokanni dio mai kamaparrisanna.

14Iamo ussolanni sun lan mai kamalillinan tu tau iato mai sia kapi’tukan, sia urra’ta’i tu mai pungona.

15Sangapaoi anna pudii tau iato mai tu PUANG belanna kamasokananNa, sia tu belanna mintu’ penggauran kalle-kalleanNa lako ma’rupa tau.

16Belanna mangkamo umpatipa’rama-rama ba’ba tambaga, sia urrebong pesalli’ bassi.

17Iatu to baga narua parri’, natumang gau’ tang malolona sia mintu’ kakadakeanna.

18Iatu penaanna nakoda’ ma’rupa-rupa kande, naurunganni sidi’mora natileak tama bambana mukkun.

19Iatonna iato meongli’mi langngan PUANG lan kamandasanna, anna lendokanni dio mai kamaparrisanna.

20Umpasaemi kadanNa, sia Napamondo tu tau iato mai, anNa lendokanni tu tau iato mai dio mai tang merambu.

21Sangapaoi anna pudii tau iato mai tu PUANG belanna kamasokananNa, sia tu belanna mintu’ penggauran kalle-kalleanNa lako ma’rupa tau.

22Sangapaoi anna penombanni tau iato mai tu pemala’ pa’pudian, sia mela’tek umpa’peissanan penggauranNa Puang.

23Iatu mintu’ to umpalingka kappala’na lan tasik, sia iatu to ma’balili lan tasik kalua’.

24Tau iamoto mai tu untiro mintu’ penggauranNa PUANG, sia mintu’ tanda kalle-kalleanNa lan lu to’ uai mandalan.

25Ma’kadami umpasae angin bara’, tu umpakapua mintu’ bombangna.

26Tipembobong tu tau iato mai sae langngan langi’, anna tipembassan sule rokko to’ mandalanna, sia bonnong tu penaanna napobua’ kamaparrisanna.

27Titu’mu’ len sia tipa’re’ba len tu tau iato mai susito malango, naurunganni tae’mo pangilalanna.

28Iatonna iato meongli’mi langngan PUANG lan kamandasanna, anNa angkaranni lan mai kamaparrisanna.

29Naparadanmi tu bara’ iato, anna rapa’ tu bombang.

30Sende paimanmi tu tau iato mai, belanna rapa’ nasangmo, sia Nasolan mana’pa Puang tu tau iato mai lako kakendenan nakamali’.

31Sangapaoi anna pudii tau iato mai tu PUANG belanna kamasokananNa, sia iatu belanna mintu’ penggauran kalle-kalleanNa lako mintu’ ma’rupa tau.

32Sangapaoi anna pakala’bi’I lan kombongan pa’tobudan, sia napudi-pudi lan kombongan ada’na pekaamberan.

33Napopembali padang pangallaran tu mai salu, sia umpaba’ta’ kalimbuang.

34Sia padang lompo Napopempadang ma’sin, natumang kakadakeanna to umpa’tondokki.

35Ia umpopembali polei limbong tu padang pangallaran sia Napopembali kalimbuang tu padang ba’ta’.

36Indemoto Napannianni tu mai to topo, naurunganni ullepong misa’ kota lan nanii ma’tondok.

37Anna tu’i tu mintu’ pa’lakna sia unggaraga pa’lak anggoro’, anna pabu’tu burana.

38Napamasakkei tu tau iato mai, naurunganni memba’ka’ kalle-kallean, sia mintu’ patuoanna tae’ anNa pakati’pekanni.

39Apa undinna diurakki tu tau iato mai sia nabokkok kamaparrisan sia sara’ inaa.

40Napamatuna duka tu mintu’ to la’bi’, sia Napapusa tu tau iato mai dio lu padang talo, tang dibatattana.

41Apa Narinding pala’ tu to mase-mase dio mai kadipakario-rioan, sia Napamakamban tu pa’rapuanna ten to domba sia bembe’ ma’baanan.

42Iatu to ma’bulo lollong parannu paiman la untiroi tu iannato, na iatu mintu’ kakadakean la ma’loko-loko.

43Mindara tu kinaa? Iatu to kinaa sipatu umparinaai tu iannate, sia umpariba’tengi tu mintu’ tanda mamaseNa PUANG.


  Share Facebook  |  Share Twitter

 <<  Mazmur 107 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran