To pasareonganna to Israel
1Nanian Hamaa’lot. Kubangunan tu matangku untingara mintu’ buntu: Umbara la nanii bu’tu patunduangku?
2Iatu patunduangku bu’tu lu dio mai PUANG, tu umpadadi langi’ sola lino.
3Tang Naeloran Puang lentekmu la tilende’, sia tae’ Natikkaru’du’ tu To pasareongammu,
4manassa, iatu To pasareonganna to Israel, inang tae’ anNa tikkaru’du’ ba’tu leppeng.
5PUANGmo tu To pasareongammu, sia Puang duka tu dio kananmu unnonganniko.
6Tae’ anna la umpatumbako allo, ke allona, ba’tu bulan, ke bonginna.
7PUANG la urrinding pala’ko dio mai kamasolangan, pissanmi to, Ia la urrinding pala’i tu deatammu.
8PUANG la urrinding pala’ko lan torro ke’de’mu, randuk totemo landa’ sae lakona.