Alkitab Mobile SABDA
[VER] : [TORAJA]     [PL]  [PB] 
 <<  Mazmur 17 >> 

Passambayangna misa’ to tae’ bannangna dinii umpandasai

1Passambayangna Daud. Perangii tu malambu’na, o PUANG! sia palan ara’i tu pengkamoyaku, tananni talinga tu passambayangku tu nasa’bu’ randan puduk tang ma’bangko malute.

2Melo ke bu’tu dio mai oloMi tu kadipaolaiangku salu, belanna natiro matamMi tu salunna.

3Iake ussandakKomi penaangku, sia umparessana’ ke mabongi, sia ussudina’, na moi misa’ tae’ la diappa’ iake susinna salai tu tangnga’ku, tae’ duka sia nasun dio pudukku.

4Diona penggauranna mintu’ tolino, susitu kada sun dio randan pudukMi, angku toyangammo kaleku dio mai mintu’ lalanna to patoro’ buku.

5Tumengkana’ tontong urrundu’ lalanMi; natang tilende’ tu lentekku.

6Metambana’ lako Kalemi, belanna Miperangiina’, o Puang Matua; tanannina’ talingamMi, sia perangii tu kadangku.

7Pakalle-kalleammi tu tanda mamaseMi, o Puang tu ullendokan to mentirerung dio kananMi dio mai mintu’ to unneai.

8Karimmannina’ butung to mata tau; sia rerungna’ diong to’ pani’Mi.

9Dio mai to tang mekaaluk tu umbala’-bala’na’, iamotu uali ungkabiri’ liuna’, tu ullimbuina’.

10Tu tang natamai kada tu penaa titutu’na, sia umpasun kada matampo.

11Totemo napatama limbumokan lan mintu’ kalingkangki, napaula’i bangkan matanna la morai umpessambakangkan rokko padang.

12Butungi to singa maduang la ussammang pealanna, sia butung to anak singa ma’pakari’di’ lan to’ kabunianna.

13Ke’de’Komi, o PUANG, tingngoi tu tau iato mai, sia pemparrakanni amMi rampananni la’bo’Mi tu katuoangku dio mai to tang mekaaluk.

14Na limamMi urrampananna’ dio mai tau iato mai, o PUANG, iamotu to umbudanan lino, tu katuoan ia manna te napotaa, amMi patamai apa pura Miparandananni tu tambukna, sia napodia’ dukai anakna, sia iatu sesanna la natampean bati’na.

15Apa iatu aku situang kamaloloan la untiro lindoKomi, iake malimbangunmo’i, dia’ penaangku untiro rupamMi.


  Share Facebook  |  Share Twitter

 <<  Mazmur 17 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel