Dual PanelPassambayang umpalaku kadipa’deianna kasalan sia kadilendokan
1Pa’pudianna Daud. O PUANG, mati’ Kalemi kunii umpassare penaangku.
2O Kapenombangku, Kamumo kukatappa’i; ke ma’dinni da angku kasirisan, sia da nasende paiman tu ualingku diona kataloangku.
3Manassa mintu’ to untayanKomi tae’ nala kasirisan, sangadinna iari tu to umpogau’ kelok tu tae’ bannangna, iamoto tu la kasirisan.
4O PUANG papayananna’ tu mai batattaMi, sia ada’ina’ tu mai lalanMi!
5Palolangna’ lan kamanapparamMi sia ada’ina’, belanna Kamumo tu Puang Matua, oto’na kasalamarangku, sia kupeagiKomi keallo-keallo.
6O PUANG, kilalai tu mintu’ mamaseMi sia mintu’ kamasokanamMi, belanna mintu’nato matontongan tempon dio mai.
7Da Mipalan ara’i tu mintu’ kasalangku tongku mangura sia mintu’ kapatodo-tintingangku, sangadinna kilalaina’ sitinaya pa’kamaseamMi, belanna kamasokanamMi, o PUANG.
8Iatu PUANG masokan sia manappa’, iamoto anNa ada’i lalanNa tu to kasalan.
9Ia umpalolang to umpamadiongan penaanna lan katonganan, sia la unnada’i lalanNa tu to umpamadiongan penaanna.
10Mintu’ lalanna PUANG iamo kamaturu-turuan sia kamarurusan, lako to ungkaritutui basseNa sia mintu’ kasa’bianNa.
11Tete dio sangamMi, o PUANG, pagarri’i tu kedo kadakeku, belanna kapuamo.
12Mindara tu to ungkasiri’ PUANG? iamotu to la Napatudu lako lalan umbanna tu sipatu natonno’.
13Iatu deatanna la torro manaman, sia mintu’ bati’na la umpomana’ padang.
14Iatu kada rasianNa PUANG lu lako to ungkasiri’I, sia iatu basseNa la dipasombo lako.
15Tontong bang tu matangku mentingara langngan PUANG, belanna Ia urriu’ lentekku lan mai porro’.
16Sailena’ sia katuru-turuina’, belanna disitampeina’ sia maparri’na’.
17Sakerangan-rangannamo tu kamagiangan penaangku, alaina’ lan mai mintu’ karossoangku.
18Tiromi tu kamaparrisangku sia kamapa’dirangku, sia pa’deimi tu mintu’ kasalangku.
19Tiromi tu mintu’ ualingku, belanna tang dikemba’mo, sia tang pada re’dekna ara’na ungkabiri’na’.
20Rinding pala’i tu deatangku sia rampananna’; da angku kasirisan, belanna Kamu kupentionganni.
21Sangapaoi anna rondongna’ kamengkaolan sia kabulo-lollongan, belanna kutayanKomi.
22O Puang Matua, lendokanni tu to Israel, Lan mai mintu’ kamaparrisanna!