Dual PanelKamanamananna to tang mekaaluk tang masae lako lan te lino
1Pa’pudianna Daud. Da mukaredei tu to umpogau’ kakadakean, sia da mukemburui tu to umpogau’ kelok.
2Belanna tau iato mai madomi’ bangsia malayu susi riu, sia marangke ten tananan maluna.
3Posande’i tu PUANG sia pogau’i tu kameloan, mari’piko lan tana iate sia karitutui tu kamarurusan.
4Posendeko PUANG, anNa ba’giko tu mintu’ mupelambeinna.
5Sorongi tu lalanmu lako PUANG sia posande’I, anNa padenni.
6Ia duka umpadellekki tu kamaloloammu butung masiang, sia katonganammu susito kulla’ ma’tangngana allo.
7Parapa’i tu penaammu dio oloNa PUANG sia tayanNi; da mukaredei tu to maupa’ lalanna, sia iatu umpalolang tangnga’ kelok.
8Torei tu kasengkean sia tampei tu kakearasan, da namarede tu penaammu, belanna kakadakean manna napabu’tu,
9Belanna iatu to umpogau’ kakadakean la dipisanni, apa iatu to umposande’ PUANG, iamo la umpomana’i tu padang iato.
10Belanna sattu’mora anna lanna’ tu to tang mekaaluk; iake mupasilelei mata tu inanna, tae’mo ditiro.
11Apa iatu to umpamadiongan penaanna la umpomana’ padang iato, sia umpasendei kamarampasan kapua tu penaanna.
12Iatu to tang mekaaluk untambuk kadake lako to malambu’ sia nasangiran isi.
13Apa la Napetaai Puang, belanna Natiro tu allo sumandakna la sae.
14Iatu to tang mekaaluk unnonok la’bo’na sia umpatu’tun bulianna, la ussongkan to mandasa sia to mase-mase, sia la ussampan-sampan to unnola lalan kabulo-lollongan.
15Apa iatu la’bo’na buana kalena la narua sia iatu bulianna la direbong.
16La’biran ia tu sidi’na dio to malambu’, na iatu kasugi’-lallanganna tu mai buda to tang mekaaluk.
17Belanna iatu takia’na to tang mekaaluk la direbong, apa Nasande’ Puang tu to malambu’.
18Nakaritutui PUANG tu torro ke’de’na to mengkaola, sia iatu ba’ginna la tontong sae lakona.
19Tau iato mai tae’ nala kasirisan, sia iake ra’pak padangi la dipedia’i.
20Apa iatu to tang mekaaluk la sanggang. Sia iatu mintu’ ualinNa PUANG la butung kamaballoanna riu dio lu padang; tau iato mai la pa’de poton, ondongpi la pa’de poton sola rambu.
21Iatu to tang mekaaluk massuka’ natae’ napasulei, apa iatu to malambu’ maturu-turu anna mamengan.
22Manassa iatu to Napassakke Puang la umpomana’i tu padang iato, apa iatu to Natampakki ropu la dipisanni.
23PUANG umpabantang lalanna tau, tu to Naporai tu tengka-tengkana.
24Moi anna tobang tae’ anna sumpandan tarru’, belanna PUANG untoei tu limanna.
25Puramo’ mangura, na totemo matuamo’, apa tae’ bangpa angku tiro to malambu’ ditampe, ba’tu iatu bati’na kapalaku-laku.
26Iatu to malambu’ kiallo-kiallo maturu-turu sia ma’pasuka’, sia iatu bati’na umpabu’tu karongkosan.
27Torroi tu kakadakean sia pogau’i tu kameloan, anna tang tibendon tu kao’korammu;
28Belanna iatu PUANG ungkabarii katonganan, sia tae’ Natampei tu to Naala mase, tau iato mai makarimman sae lakona, apa iatu bati’na to tang mekaaluk la diroto’i.
29Mintu’ to malambu’ la umpomana’i tu padang iato, sia la untorroi tontong sae lakona.
30Iatu randan pudukna ussa’bu’ kada kinaa, sia tongka’ dililana unggente’ kada unturu’ katonganan.
31Iatu Sukaran alukNa Kapenombanna manda’ lan penaanna, sia tae’ natilende’ tu lentekna.
32Iatu to tang mekaaluk untuntun mata to malambu’, sia undaka’ lalan la umpatei.
33Apa tae’ Naeloranni PUANG la tobang tama limanna tau iato, sia tae’ Naeloranni dipasala, ke dipaolai salunna.
34TayanNi tu Puang sia karitutui tu lalanNa, anna Ia umpamatandeko muurunganni umpomana’i tu padang iato. Sia la mutiro umba nakua kadirotosanninna tu to tang mekaaluk.
35Kutiromo tu misa’ to tang mekaaluk masa’ga’, umparumaka kalena susi balintoto loboran.
36Apa den tau lendu’ dio, natiroi, pa’demo, kudaka’, apa tae’mo kutiro lako.
37Palan ara’i tu to sallo’ penaanna sia tiroi tu to bulo lollong, belanna iatu to ungkabarii kamarampasan la membati’.
38Apa iatu to patengkan la disabu’i sola nasangi, sia iatu bati’na to tang mekaaluk la dipisanni.
39Apa iatu kasalamaranna to malambu’ bu’tu lu dio mai PUANG, Iamo pentirerunganna lan attu kamaparrisan.
40PUANG la untundui sia la urrampananni, Ia urrampananni dio mai to tang mekaaluk sia urrinding pala’i, belanna mentilindung lako Kalena.