Alkitab Mobile SABDA
[VER] : [TORAJA]     [PL]  [PB] 
 <<  Mazmur 55 >> 

Passambayangna Daud umpalakui dirampanan dio mai misa’ sangmuane tang maruru’na

1Lu lakona pangala sengo; dipasiala oni katapi. Misa’ gelong bangunan ada’na Daud. (55-2) O Puang Matua, tananni talinga tu passambayangku, sia da Mitananni boko’ tu pa’palakungku.

2(55-3) Kilalaina’ dikka’ sia pebaliina’; apa tae’ upu’ku salamba salao situang kamagiangan sia sarro budangku.

3(55-4) Napobua’ angnga’na ualingku, sia pa’pakario-riona to tang mekaaluk, belanna nabala’-bala’na’, sia napandasana’ situang kamare’dekanna.

4(55-5) Ma’bara-bara tu penaangku lan, sia kamasanganna kamatean urrampoina’.

5(55-6) Kamatakuran sia karumanggangan urrampoina’, sia kamasangan ungkapu’na’.

6(55-7) Kuurunganni ma’kada: Lendu’ ia maelona, kengku kepani’ susi bu’ku’, angku mentia’ male lako tu ma’dinna kunii torro;

7(55-8) sia la mambela kunii mentia’, angku ma’bongi dio lu padang aak. Sela

8(55-9) Sia tikara-karana’ mentirerung angku tilendok dio mai talimpuru’ sia angin bara’.

9(55-10) Pamalingi tu tau iato mai, o Puang, sia patangma’rundunanni tu basana, belanna pa’pakario-rio sia kasigagan nata’pai matangku lan kota.

10(55-11) Allo bongi lumiling ma’kampa dao lu bentengna, kakadakean sia kasanggangan untonangi;

11(55-12) Ondongpi tu penggauran umpabu’tu kasanggangan lalo lan, sia iatu pa’pakario-rio sia kalando-pa’duan tae’ anna tampe tananan pasa’na.

12(55-13) Belanna tangia uali tu umbelle’na’, iake la iai to, manassa kutemmeran ara’ rumeke-mekeku; sia tangiara to ungkabiri’na’ tu matampo unneana’, iake la iai to, manassa kuissan umpembunianni.

13(55-14) Sangadinna iko, misa’ to kupadan, iamo sangmuane kukatappa’i,

14(55-15) Lendu’ ia mammingna bang tu kasisangmuaneanta, sumalong-malong lan banuanNa Puang Matua sola to buda.

15(55-16) Nake ta’pa narampoi kamatean tu tau iato mai, nake tama tuoi lino to mate, belanna lan banuanna tu kakadakean sia lan ba’tengna.

16(55-17) Apa iatu aku te meongli’na’ lako Puang Matua, na PUANG la ullendokanna’.

17(55-18) Melambi’ sia makaroen sia iake tangngai allo la umparampona’ kamasussan sia sarroku, la Natanding talinga duka tu peongli’ku.

18(55-19) Ia ullendokan marampa’na’ dio mai kapararian untingoina’, belanna buda tongan tau unneana’.

19(55-20) La Natanding talinga Puang Matua sia la Napasosso’ lu rokko tu tau iato mai – belanna tempon dio mai untorroi isungan kapayunganNa – Sela Apa noka tu tau iato mai mengkatoba’, sia tae’ naungkataku’ Puang Matua.

20(55-21) Mangka duka napata’pai lima tu to nasisangmuanean, sia umpinda lampa kadanna.

21(55-22) Iatu pudukna mandu malannang anna bumbungan pa’pamakko, apa iatu penaanna lan passigagan, sia iatu buangan kadanna mandu malamma’ anna boka’, apa mintu’nato butung to la’bo’ tibua’.

22(55-23) Sorongi lako PUANG tu kaselangammu, Ia la undaranaiko; inang tang Naeloran tu to malambu’ la tilende’.

23(55-24) Kamumo, o Puang Matua, la umpembuanganni rokko liku kasanggangan tu tau iato mai; iatu to umpato’do rara sia lando pa’du la sanggang lan kamatangnga-tauanna. Apa iatu aku te la sande’na’ lako Kalemi.


  Share Facebook  |  Share Twitter

 <<  Mazmur 55 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran