Dual PanelKamasokananNa Puang Matua lako to Israel te pura diboko’
1Misa’ gelong bangunan ada’na Asaf. E rapungku, rangimi te bangunan ada’ku, sia tananni talinga te mintu’ motokan lilaku.
2La umbungka’na’ randan pudukku umpokada kada peada’ to kinaa, sia umpasombo mepussakanna tempon dio mai.
3Tu mangka kirangi sia kiissan, sia iatu mangka nauleleanangkan to dolota,
4tae’ angki la umbunianni lanto mimi’na, sangadinna kiuleleanan papa’ sidampi’na, tu mintu’ kataromposanNa PUANG, sia kamatotoranNa sia mintu’ penggauran kalle-kallean Napogau’.
5Belanna mangkamo Natanan tu misa’ tanda dianna batu silambi’ dio lu tarukna Yakub, sia Napondok tu misa’ Sukaran aluk dio lu bati’na Israel, tu Napasan lako to dolota kumua anna pokadanni lanto mimi’na.
6Anna issanni taruk undinna, iamotu mintu’ bati’ la didadiampa tu la tulangdan anna ulelean pole’i lako bati’na:
7Anna umposande’ Puang Matua sola nasangi, sia da nakalupai tu mintu’ penggauranNa Puang Matua, sangadinna la nakaritutui tu mintu’ pepasanNa.
8Sia da nasusi nene’ to dolona tu tau iato mai, iamotu misa’ osso’ matoro sia battuk, iamotu misa’ osso’ tang ma’to’ tu penaanna, sia tae’ anna la’ka’ lako Puang Matua tu penaanna.
9Mintu’ bati’na Efraim, iamotu to sakka’ pa’buno tinaranna, sumoro’mo ditalo tonna parari.
10Tae’ anna toe manda’i tu basseNa Puang Matua sia manoka unturu’ atoran Sukaran alukNa.
11Sia tang nakilalaimo tau iato mai tu mintu’ penggauranNa, sia mintu’ tanda kalle-kalleanNa, tu Napa’pekitanammo lako kalena.
12Dio tingayona nene’ to dolona Nanii Puang umpogau’ ba’tu pira-pira tanda kalle-kallean dio tana Mesir, dio padang Zoan.
13Naballak tu tasik anNa palambanni tu tau iato mai, Napopa’parinding tu uainna susi misa’ sapan.
14Iake allona Napaanta’i salebu’ tu tau iato mai, sia Napaanta’i arrang api tu’tu’ bongi;
15Napatibangnga tu batu dio padang pangallaran, sia Napabossai Napairu’ butung uai diong mai liku mandalan.
16Napatidollo-dollo tu ba’tu pira-pira mata uai lan mai buntu batu, sia napasumalu tu uai iato butung salu.
17Apa umpogau’ tarru’ bangora kasalan tu tau iato mai lako Kalena, sia umbali Patodoranna dio lu padang talo.
18Napasandak tu Puang Matua lan penaanna, umpalaku kande susitu kamailuanna;
19Ma’kada lako Puang Matua nakua: Ma’dinraka tu Puang Matua umpalennarangki’ kande dio padang pangallaran?
20Tonganna mangkamo ussambakki buntu batu anna sun tu uai lan mai, sia bu’tu tu mata uai sumalu; apa la Nakulle siaparaka umpa’ben roti, sia umpasakkaran pa’kandian taunNa?
21Iamoto anNa sengke tu PUANG tonNa rangii, dukkumi tu api lako bati’na Yakub, sia le’ke’ tu kasengkeanNa lako tarukna Israel.
22Belanna tae’ anna katappa’i tu Puang Matua sia tae’ narannuanni tu pa’tunduanNa.
23Moi anna susito, ma’kadami Ia lako salebu’ daona lu, sia ungkillang mintu’ ba’bana langi’:
24Napaurannimi manna tu tau iato mai napotuo, sia umpa’kamasean gandung lako tau iato mai dao mai langi’:
25Pantan ungkandemi roti dao mai langi’, sia Napasongloran kande tu tau iato mai sadia’na.
26Napopangiri’ tu angin matallo dao mai langi’, sia Napasae tu angin lu lo’ mai pollo’na uai tete dio kuasanNa.
27Napauranni pa’kandian tu tau iato mai susi barra’-barra’, sia manuk-manuk kepani’ susito karangan dio biring tasik.
28Naronnosan lan rante nanii tendana, sia tiku lao inan nanii.
29Kumandemi tu tau iato mai sadia’na tongan, sia Naben tu nadaka’na.
30Apa tae’pa anna paliu pandaka’ penaanna tu tau iato mai, sia lan bang sia sadangna tu kande,
31tu’ba’mi tu kasengkeanNa Puang Matua lako tinde tau, anNa patei tu mintu’ tau tu malomponamo, sia Natebang tu mintu’ to Israel mangura.
32Moi anna susito, umpogau’ poleomo kasalan tu tau iato mai, sia tae’ anna katappa’i tu penggauran kalle-kalleanNa.
33Iamoto anNa roto’i punala bangi tu mintu’ allo katuoanna, sia Mepatiramban tu kadiputtaianna taun kalolanganna.
34Iatonna pateimi tu tau iato mai, maneri naanga’ tu Puang, anna tibalik pakkan undaka’ Puang Matua.
35Sia nakilalaimo tau iato mai, kumua iatu Puang Matua Iamo buntu batunna, sia Puang Matua Patodoranna, iamo patunduanna.
36Apa iatu tau iato mai umbangko malute Puang, sia umpakena Puang tete dio bisaranna.
37Belanna tae’ anna ma’to’ tu penaanna lako Puang sia tae’ anna toe manda’i tu basseNa.
38Apa belanna kamamaseanNa Naseroi tu salana tau iato mai sia tae’ Nasabu’i; nenne’ poleo’I unta’tan sengke budanNa, sia untemme’ ara’ rumeke-mekeNa.
39Belanna nakilalai tu diona tau iato mai kumua a’gan batang kale, tu butung rambu pa’de poton, sia tae’mo nabu’tu sule.
40Ba’tu pempiran tu tau iato mai battuk lako Kalena dio lu padang pangallaran, sia umpa’di’i penaanNa Puang dio lu padang talo,
41sia ussandak poleopi Puang Matua, sia umparosso To masero pindanna to Israel.
42Tae’ anna kilalai lenni tau iato mai tu lima matoto’Na, sia iatu allo nanii Puang ullendokanni dio mai to umpakario-rioi.
43Tonna padenni tu mintu’ tanda kalle-kalleanNa dao tana Mesir, sia mintu’ tanda mangngaNa dio padang Zoan.
44Napopembali rara tu uainna lan salu Nil, sia mintu’ uai lolongna, naurunganni tae’ nairu’.
45Napasae tu tabuan balo tu ussabu’i tu tau iato mai, sia tokko’ urratoi tau iato mai.
46Iatu bura padangna tau iato mai Napakandei ulli’, sia ia duka tu polean ra’ta’na Napakandei batik.
47Napasanggangi uran batu tu mintu’ anggoro’na, sia ambun maka’dang tu ara pangala’na;
48Napopa’elo’na tu uran batu anna sanggangi tu patuoanna tau iato mai sia mintu’ olo’-olo’na nasanggangi kila’ silalle-lalle.
49Naparampoi kamare’dekanNa tu tau iato mai sia kasengkean sia kamagallian sia kamandasan, iamotu misa’ porimpunganna malaeka’ umbaa kasanggangan.
50Napatu’ba’ tu kasengkeanNa, sia tae’ Narinding pala’i tu deatanna tau iato mai dio mai kamatean. Sangadinna Nasorong tu sunga’na lako saki ropu.
51Napatei nasang tu anak pa’bunga’ dio Mesir, iamotu bunga’na kamabukuanna lan mintu’ tendana Ham.
52Apa Napasangtiangkaran Nasolan sun tu taunNa butung domba sia bembe’ ma’baanan, sia Naturu’ mana’pa dio lu padang pangallaran ten patuoan.
53Narenden marampa’ tu tau iato mai, naurungan tae’ namataku’, belanna mintu’ ualinna malabumo lan tasik.
54AnNa solanni tu tau iato mai sae lako lili’ inan maindanNa, lako te buntu iate tu mangka Naappa’ tete dio lima kananNa.
55Naula’i lao tu mintu’ bangsa dio mai to’ olona tau iato mai, sia nataa-taa tu padangna Nasuka’ tinting la napomana’ tau iato mai, anNa panno’ko’i tu mintu’ sukunna to Israel lan tendana tau iato mai.
56Apa nasandak tau iato mai tu Puang Matua, sia unnea lako Puang, Patodoranna, sia tang unturu’ kasa’bianNa.
57Sangadinna sorong boko’ sia tang mana’pa’ susito dolona, sia tipero’ susi tinaran pasala.
58Tau iato mai umpare’dek ara’Na Puang diona kamenombanna dao lu inan madao, sia umpabu’tu pangimburuanNa diona mintu’ rapang-rapangna napodeata.
59Lendu’ ia sengkeNa tu Puang Matua tonna rangii tu iannato, anNa sa’bianganni tu mintu’ to Israel.
60Naurunganni Nasalai tu tenda dio Silo, tu tenda Napabendan dio to’ naninna tolino;
61Napopa’elo’na tu kamatotoranNa dirampa, sia iatu kamala’biranNa tama lisu pala’na uali.
62Napopa’elo’na tu taunNa nakande bassi mataran, belanna lendu’ tongan sengkeNa lako to Napotau.
63Iatu mai to manguranna pura nalalle api, sia mintu’ tu mai anak dara tae’mo anna ditendeng sengo rampanan kapa’.
64Siapanammo tu mintu’ to minaanna nakande bassi mataran, natae’ anna batingi to balunna.
65Attu iato malima’ka’mi tu Puang sangtinti to pana’ding, sia ten pa’barani napakapua uai anggoro’ tu penaanna.
66Nasambakki dio mai boko’ tu mintu’ ualinNa, sia Naparampoi kamatunan tang pa’de-pa’de.
67Apa Nasuale pala’ tu tendana Yusuf, sia tae’ anNa turo ta’bai tu suku Efraim.
68Sangadinna Naturo ta’ba tu suku Yehuda, sia iatu buntu Sion tu Napa’budai.
69AnNa bangunni tu inan maindanNa butung inan matande, sia butung lino tu Naparandanganni matoto’ tontong sae lakona.
70Naturo ta’ba tu Daud, taunNa, anNa sarakki lan mai bala domba:
71Nasarakki dio mai boko’na mintu’ domba sumusu la ungkambi’ Yakub, taunNa, sia Israel to Napotau.
72Ia ungkambi’i tu tau iato mai sitinaya penaa lambu’na, sia narenden lima malutena tu tau iato mai.