Dual PanelNanian to lumio’ umpangudui Yerusalem
1Lu lakona pangala sengo. Unturu’ baenan sengo: Gitit. Pa’pudianna bati’na Korah. (84-2) Tangpada mala’bi’na tu banuamMi, o PUANGna mintu’ ma’dandan maritik!
2(84-3) Mamali’ tu penaangku sia mangussu’ la mentama tarampakNa PUANG; deatangku sia batang kaleku mela’tek umpudi Puang Matua matontongan.
3(84-4) Ia duka tu dena’ ungkabu’tuimo inan nanii, sia iatu kaluppini’ den serangna, napannai anakna, sikandappi’ inan pemalaran lako Kalemi. O PUANGna mintu’ ma’dandan maritik, o Datungku sia Kapenombangku.
4(84-5) Maupa’ tu mintu’ to tonang lan banuamMi: tang toreKomi napudi! Sela
5(84-6) Maupa’ tu to umpopamuntuKomi, tu to marampa’mo lan penaanna tu lalan.
6(84-7) Iake unnolai lombok rangke natuoi tallubeke, nabilang kumua padang nasitutu’i kalimbuang boba, sia nasakka’i rongko’ bunga’ uran.
7(84-8) Samambelanna naola, sabatta’-batta’na, la umpennoloi Puang Matua dio Sion.
8(84-9) O PUANG, Kapenombanna mintu’ ma’dandan maritik, perangii tu passambayangku, patananni tu talingamMi, o Kapenombanna Yakub! Sela
9(84-10) O Puang Matua, balulang toto’ki, tiroi sia mantai tu rupanna to ditokkoMi.
10(84-11) Belanna sangallo dio to’ tarampakMi melo ia anna sangsa’bu allona (dio inan senga’); mandu kuporai untorroi to’ ba’ba banuanNa Kapenombangku na iatu torro lan tendana to tang mekaaluk.
11(84-12) Belanna PUANG Kapenomban, iamo matanna allo sia balulang toto’, sia PUANG umpa’ben pa’kamase sia kamala’biran; sia tae’ duka kameloan tang Naben to lolang malambu’.
12(84-13) O PUANGna mintu’ ma’dandan maritik, maupa’ tu to umposande’Komi.