Dual PanelPuang Matua iamo Datu tang pakayun bimbang
1PUANG tu untoe kapayungan: la mela’tek tu lino, sipatu tu lebukan ma’lako-lakoan la sende paiman.
2Iatu gaun sia kamalillinan untikui lao, sia kamaloloan sia katonganan napoparandangan isungan kapayunganNa.
3Iatu api mellepa’ dio oloNa Puang. Umpamampu’ mintu’ ualinNa tiku lao.
4Kila’Na unnarrang te lino, natiroi lino anna ma’parondo.
5Mintu’na buntu lollo’mo butung panti’ dio oloNa PUANG, dio oloNa Puangna anggenna lipu daenan.
6Iatu kamaloloanNa napatale’ langi’ sia mintu’ bangsa untiromo kamala’biranNa.
7Da’ito nakasirisan tu mintu’ to umpenombai rapang-rapang dipodeata panggaraga lima. Iamotu to ussattuan dipa’deatainna; e mintu’ deata, penombai tu Puang.
8Iatu iannato narangimo Sion, anna parannu, sia mintu’ anak dara Yehuda sila’tekan, tu belanna mintu’ pa’paolaimMi salu, o PUANG.
9Belanna Kamumo, o PUANG, tu patodoranna lan mintu’ narande tana, sia Kamumo tu layukna anna mintu’ deata.
10E kamu, mintu’ to ungkamali’ PUANG, la mikabiri’ tu kakadakean. Iamo urrinding pala’ deatanna mintu’ to masallo’Na. Sia urrampananni lan mai lisu pala’na to tang mekaaluk.
11Iatu arrang dipasomboan to malambu’, sia iatu kaparannuan dipabu’tuan to bulo lollong.
12E kamu to malambu’, la umpoparannukomi PUANG, sia pudii tu sanga maseroNa.