Alkitab Mobile SABDA
[VER] : [TORAJA]     [PL]  [PB] 
 <<  Ratapan 3 >> 

Ma’pentallunna bating: Kamandasan sia pa’pakatana

1Iatu aku te umperasaimo’ kamandasan napobua’ pebamba kare’dekan ara’Na.

2Nasolammo’ sia Napopa’lingkamo’ lan malillinna sia lan kapittukanna.

3Tonganna ba’tu pempiran-piranna’ Napata’pai limanNa, tu’tu’ allo.

4Napamarangkemo tu kaleku sia Napatingkurrungmo tu kuli’ku, Tappumo Narebong tu bukungku.

5Napalilingina’ rasun sia kamaparrisan ma’toppo’-toppo’.

6Napanno’ko’na’ lan to’ malillinna susito mate masai allomo.

7Naampangi tikumo’, angku tang kullei tassu’, Narantemo’ tambaga magasa.

8Moi angku metamba-tamba umpalaku pa’tunduan, Tang Nasaile tu passambayangku.

9Mintu’ batatta la kuola Napalapa’imo batu dipa’, mintu’ lalanku Natuan-tuanmo.

10Iamo butung misa’ beruang mangamu’ lako kaleku, butung misa’ singa dio to’ kabunianna.

11Natutu’ bang tu lalanku sia Nadammakna’, Napapussakna’.

12Nabintingmo tu panaNa, Napopassanda tu tinaranNa lako kaleku.

13Napatarru’ina’ tinaran lan mai inan tinaranNa Landa’ tama bale’ke’ku.

14Bupetaamo’ lako mintu’ bangsaku sia napoparumbasan tu’tu’ allo.

15Napedia’imo’ kamapassikan sia Napairu’mo’ apsantin.

16Nasuana’ ungkaru’tukki karangan anna tappu simpo tu isingku, anNa ti’tinna’ rokko to’ barra’-barra’.

17Mipasisayurammo kasalamaran tu deatangku, tang kuissanmo tu kamauparan.

18Iamoto angku ma’tangnga’ kukua: ta’demo tu kamatotorangku, sia pa’rannuanangku langngan PUANG.

19Kilalai dikka’ tu kamaparrisangku sia salamba salaoku, sia iatu mai apsantin sia rasun.

20Iake nakilalai deatangku te iannate, tukku bangna’ ma’dosso-dosso.

21Inde sia tu la kupalan penaa, iamoto angku ma’rannuan:

22Belanna mintu’ tanda pa’kamaseNa PUANG, anna tae’ tasanggang, belanna iatu mai kamamaseanNa tae’ upu’na.

23Iake melambi’oi ba’ruoi, sia kapua kamarurusamMi.

24Nakua penaangku: PUANGmo tu ba’gi mana’ku, iamoto anna Ia kurannuan.

25Masokan tu PUANG lako tu umpeagii, sia lako tu penaa umpeangI.

26Melo ke rapa’ penaai tu tau umpeagi kamakarimmananNa PUANG;

27Melo tu mai muane, ke mangurapi, anna passan ayoka.

28Sipatu unno’ko’ misa-misa sia ma’pakappa bang, ke Napapassannimi Puang.

29Sipatu tukku bang sae rokko to’ barra’-barra’, umbai den sia kapa’rannuanan.

30Sipatu napopa’elo’na tu popona lako minda-minda ussala’pai, da’ito napedia’i kadilo’boan.

31Belanna tae’ Natontong sae lakona patumpu tu Puang.

32Belanna iake mangkaMi meparosso, mekamaseioMi sitinaya kakapuanna kamaturu-turuanNa.

33Belanna tangia lalan penaanNa Napandasai sia Naparossoi tu mai ma’rupa tau.

34Iake nalullu’-lullu’i tau tu mintu’ to ditarungku dao kuli’na padang.

35Iake naleko’i tau tu katongananna misa’ muane dio oloNa Patodoranna.

36Iake natampun pusa’i tau tu solana lan kara-karana, tang Natiroraka Puang tu iannato?

37Mindara tu ma’kada manna nakombongmo? Ke tae’i anNa Puang umpasanni?

38Tang tassu’ dioraka mai pudukNa Patodoranna tu kadake sia melo?

39Ma’apai nasumarro tu tolino lan katuoanna? Melo ke pantan sumarroi diona kasalanna.

40Melo ke umparessaki’ sia umpelalanki’ mintu’ tengkata, anta mengkatoba’ lako PUANG.

41Melo ke umballa’ki’ pala’ta sia ara’ta langngan Puang Matua dao suruga.

42Salamokan sia pabali-balimokan, apa tae’ Mima’pagarri’.

43Mipembungku’mo tu kasengkean, sia Milolaimokanni, sia tang makatirinnamoKomi umpateikan.

44Mipembungku’mo tu salebu’, naurungan iatu passambayang tae’ tarru’ lako Kalemi.

45Mipasusimokan passarrinan rumpang dio lu mintu’ bangsa.

46Napengangaimokan sadangna mintu’ ualingki.

47Katirambanan sia pepoya urrampoimokan, kamasolangan sia kasanggangan.

48Lolong-lolong tu uai matangku susitu uai salossok, natumang kasangganganna anak dara bangsaku.

49Iatu uai matangku tang tore sitana’takan, sia tang radan len,

50sae lako mentiro lumbang tu PUANG, sia ma’penunu dao mai suruga.

51Kambang bangmo tu matangku tumangi’ napobua’ tu mintu’ anak dara lan kotaku.

52Naula’ sumpu tonganmo’ susi misa’ manuk-manuk tu mai to tae’ bannangna nanii unnula’na’.

53Nasabu’ina’ rokko garuang sia natumbuina’ batu.

54Natu’ba’mo’ uai sia nakabu’ tu ulungku; Kuma’tangnga’ kukua: la ka’tumo sunga’ku.

55Meongli’na’ ussa’bu’ sangamMi, o PUANG diong mai garuang mandalan.

56Mitananni talinga tu peongli’ku, da Misissinganni talinga tu sarroku sia pengkamoyaku.

57Mareke’Komi, ke meongli’na’ lako Kalemi, Ma’kadaKomi kumua: Da mumataku’.

58Kamu, o Puang umpebalii tu kara-karaku, Mirampanan mana’pa tu sunga’ku.

59Mitiro, o PUANG, ditampun pusa’ bang tu kara-karaku, sanda tonganni tu kara-karaku.

60Mitiro tu kamagallianna tau iato mai sia mintu’ tangnga’na la ussanggangna’.

61Mirangi, o PUANG, tu pelo’bona, sia mintu’ tangnga’na la ussanggangna’,

62tu kadanna minda-minda umbalina’ sia pa’bisik-bisikna, la ungkadakeina’ tu’tu’ allo.

63Tiroi tu torro ke’de’na tau iato mai: Napadadina’ parumbasan.

64La Mipapakkanni, o PUANG, sitinaya penggauranna.

65La Mibutai penaanna tu tau iato mai; parampoi tampak ropumMi tu tau iato mai!

66La Mipaula’i kasengkeamMi sia la Mipisanni tu tau iato mai diong mai nasambo langi’Na PUANG.


  Share Facebook  |  Share Twitter

 <<  Ratapan 3 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran