Alkitab Mobile SABDA
[VER] : [TORAJA]     [PL]  [PB] 
 <<  Rut 4 >> 

Boas urrampei Rut

1Attu iato malemi tu Boas lako babangan, anna unno’ko’ dio. Siappa’ attu iato lendu’mi tu to mangla’bak tu napokada Boas. Ma’kadami nakua: E sangmane, lempangko mai sattu’ ammu unno’ko’ inde te. Lempangmi anna unno’ko’ dio.

2Natambaimi tu tau sangpulo dio mai pekaamberan lan kota, anna ma’kada nakua: Unno’ko’komi indete. Unno’ko’mi tu tau iato.

3Attu iato ma’kadami lako to mangla’bak nakua: Iatu Naomi, tu sule dio mai padang marantena Moab, la umbaluk sangtempe’ bela’, tu apanna siulu’ta Elimelekh.

4Kusanga melo, iamoto angku somboangko, kumua: Melo ke muallii tu bela’ iato dio tingayona te to unno’ko’ inde sia pekaamberanna bangsata. Iammu la ulla’bakki, la’bakmi; apa iake tae’i mumorai ulla’bakki, pokadanna’, angku issanni, belanna tae’ misa’ tau la ulla’bakki sangadinna iko, namane aku. Mebalimi tu tau iato nakua: Akumo la ulla’bakki.

5Apa ma’kada tu Boas nakua: Iammu allimi tu bela’ iato dio mai Naomi, la mutarima duka tu Rut, to Moab, bainena tu to mate iato, ammu patontongi tu sanganna tu to mate iato diona taa mana’na.

6Ma’kadami tu to mangla’bak iato nakua: Iake susito tang kubela ulla’bakki, belanna la ussanggang kalenana’ mana’ku. Kamu bangmo ulla’bakki tu apa sipatu la kula’bak, belanna tae’ kubelai ulla’bakki.

7Dolo-dolona iatu ada’ dio lu to Israel, ianna mangla’bak ba’tu umpasituka’ apa, kumua la untonganni tu apa iato, iatu misa’ ullossokki sepatunna anna benni solana. Susimoto dinii umpamanda’i tu apa iato dio lu to Israel.

8Ma’kadami tu to mangla’bak lako Boas, nakua: Melo ke kamumo unnallii tu bela’ iato. Nalossokkimi tu sepatunna.

9Mangkato ma’kadami tu Boas lako mintu’ pekaamberan sia lako mintu’ to buda, nakua: Allo iate kamumo sola nasang titanan sa’bi, kumua iatu mintu’ apanna Elimelekh sia iatu mintu’ apanna Kilyon sia Mahlon kuallimo dio mai Naomi;

10sia ia duka tu Rut, to Moab, bainena Mahlon kutarimamo angku pobainei, la umpatontongi tu sanganna to mate iato diona mana’na. Susimoto tu sanganna to mate iato tang la ka’tu dio mai mintu’ siulu’na sia dio mai babangan nanii ma’tondok. Kamumo tu la titanan sa’bi.

11Ma’kadami mintu’ to buda tu dio babangan iato sia mintu’ pekaamberan, nakua: Kamimo sola nasang tu titanan sa’bi. Na PUANGmora umpasusi Rahel sia Lea tu baine tama banuammi, tu mangkamo umbangun tongkonanna to Israel! La batta’komi lan mintu’ penggaurammi dio Efrata sia la umpalayukkomi sangammi lan Betlehem.

12Na iatu tongkonammi la susi tongkonanna Perez, anakna Tamar, tu napadadian Yehuda, tete dio bati’ Nakamaseangkomi PUANG, la nadadian baine mangura iate!

13Attu iato naalami Boas tu Rut napobainei, anna sangampa’ sola. Nakamasei PUANG anna ma’tambuk, nadadian misa’ pia muane.

14Attu iato ma’kadami tu mintu’ baine lako Naomi nakua: Mintu’ kadipudian lu lako PUANG, tu tang umpadapai dio mai kalemi tu misa’ to mangla’bak; natarompo’mora tu sanganna dio lu to Israel.

15Na iamo la umpakatana penaammi sia undaranaikomi lan kamatuammi, belanna minintummi undadianni, tu ungkamaseikomi, tu mandu losong lako kalemi na iatu pitu pia muane.

16Naalami Naomi tu pia iato nariai na ia dadi to mantaranakna.

17Nasangaimi baine sangbanuanna, nakua: Dadimo misa’ pia muane dio Naomi; nasangaimi tu pia iato Obed. Iamote tu ambe’na Isai, ambe’na Daud.

Diona ossoranna Daud

18Iamote tu bati’na Peres: Iatu Peres undadian Hezron,

19na Hezron undadian Ram, na Ram undadian Aminadab,

20na Aminadab undadian Nahason, na Nahason undadian Salmon,

21na Salmon undadian Boas, na Boas undadian Obed,

22na Obed undadian Isai, na Isai undadian Daud.


  Share Facebook  |  Share Twitter

 <<  Rut 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel