Dual PanelPengkilalanna Musa diona tu apa mangka dadi
1Inde sia tu kada mangka napokada Musa lako mintu’ to Israel sambalinna lu Yordan, lan padang pangallaran, dio Araba-Yordan, tu sitingoan Suf, dio alla’na Paran na Tofel, Laban, Hazerot sia Di-Zahab.
2Iatu lalan dio mai Horeb lu lako ma’buntunna Seir sae lako Kadesh-Barnea, kalingkan sangpulo misa allona.
3Lan taun ma’patangpulo tonna bulan ma’pessangpulo misa lan allo bunga’na bulan iato, ma’kadami tu Musa lako to Israel susi tu mintu’ Napepasanan PUANG lako kalena diona tau iato mai,
4tonna mangkamo untaloi tu Sihon, datu to Amori, tu ma’tondok dio Hesbon, sia Og, datunna Basan, tu ma’tondok dio Astarot, dio Edrei.
5Na sambalinna lu Yordan, lan padang Moab randukmi tu Musa umpa’peissananni tu Sukaran aluk iate sia ma’kada nakua:
6Iatu PUANG, Kapenombanta, ma’kadamo lako kaleta dio Horeb, Nakua: Silasamo masainna to minii torro inde te sikandappi’ buntu iate.
7Ke’de’mokomi ammi male ma’palulako ma’buntunna to Amori sia lako tu to nasikandappiran, lan Araba-Yordan, dao Ma’buntunna, diong, Padang Mengkadiongna, dio Padang lo’na lu sia dio biring tasik, – tondok to Kanaan, sia lako Libanon sae lako salu kapua, iamotu salu Efrat.
8Manassa la Kusorongangkomi tu tondok iato, tamamokomi, ammi alai tu tondok, tu Naallu’mo PUANG umpalao sumpa lako nene’ to dolomi, Abraham, Ishak na Yakub, kumua la Naben lako tau iato sola bati’na.
9Tonna attu iato angku ma’kada lako kalemi, kumua: tae’ kubelai misa-misa umpassan tanggungan la ungkaduttu’komi.
10Iatu PUANG, Kapenombammi umpamakambanmokomi, sia manassa totemo makambanmokomi susito bintoen dao langi’.
11Narangngannimira PUANG, Kapenombanna nene’ to dolomi, pessangsa’bu pada bilangammi totemo sia Napamasakkemorokomi, susitu Naallu’ lako kalemi.
12Umbara kukua naaku manna ma’din umpassanni tu kamasussammi, tu passanammi sia iatu kara-karami?
13Pamanassami dio mai sukummi tu to kinaa, to matarru’ sia to paissan, angku tappui dadi pangulummi.
14Mebalimokomi, ammi ma’kada mikua: Melo to, tu mipa’petimbangan.
15Iamoto angku tambai tu pangulunna sukummi, iamotu to kinaa sia to paissan, angku tappui dadi pangulummi, iamotu kamandangna to sangsa’bu, to saratu’, to limangpulo sia to sangpulo, sia mantari’na sukummi.
16Sia attu iato kupepasanan lako to ma’paolai salummi, kumua: Tananni meloi talinga te kara-kara nasialla’i siulu’mi sia ra’ta’ maloloi tu kara-kara nasialla’i patomali, ba’tu iatu siulu’na ba’tu to sae misisolan.
17Lan pa’paolaian salu da mipelindo tau; la pada miperangii tu to bongko ba’tu to la’bi’ moi misa’ tau da mikataku’i, belanna iatu pa’paolaian salu Kapenomban umpoissanni. Iatu kara-kara magasa lako kalemi, la mibaa lako kaleku, angku perangii.
18Attu iato kupepasanan lako kalemi tu mintu’ apa sipatu la mipogau’.
19Attu iato anta ke’de’ dio mai Horeb sia talendu’i tu padang pangallaran malona’ sia metakuran, tu mangka mitiro, ma’palulako padang ma’buntunna to Amori, susitu mangka Napepasanan PUANG, Kapenombanta, lako kaleta, anta rampo lako Kadesh-Barnea.
20Pakalan ma’kadamo’ lako kalemi kukua: Rampomokomi lako padang ma’buntunna to Amori, tu la Nabenki’ PUANG, Kapenombanta.
21Manassa PUANG, Kapenombammu, ussorongi te tondok iate lako kalemu, ke’de’moko, ammu alai, susitu Napokadammoko PUANG, Kapenombanna nene’ to dolomu; da mumataku’ sia da mutiramban.
22Attu iato mengkareke’ nasangkomi lako kaleku ammi ma’kada kumua: Melo ke tasuai ba’tu pira-pira tau dolo, la umparessangki’ tu tondok iato sia la umpaissanniki’ tu lalan sipatu taola sia iatu mai kota la tarampoi.
23Iatu iannate melo dio pentiroku. Iamoto kupilei sangpulo dua tau dio mai sukummi, simisa’ tau ke misa’oi suku.
24Ke’de’mi tu tau iato, natuka’ langngan ma’buntunna, narampo rokko lombok Eskol, anna paressai.
25Naala dukami tu bua kayunna tondok iato, nabangki’. Naparampoan dukaki’ kareba dio mai, sia ma’kada nakua: Iatu tondok la Nabenki’ PUANG, Kapenombanta, melo.
26Apa manokakomi male lako, sia mibali tu parentaNa PUANG, Kape-nombammi.
27Ma’paropo’komi lan tendami sia ma’kada kumua: Belanna Nakabiri’ki’ PUANG, iamoto Nasolangki’ lan mai tondok Mesir anNa sorongki’ tama kuasanna to Amori sia Nasanggangki’.
28Umbara la takua kendek langngan? Napabonnongmo siulu’ta tu penaanta nakua: Iatu tau dio mandu kapua sia malangka’ na kita, iatu mai kota kapua sia ditambakuku malangka’ langngan langi’, sia tatiro duka dio tu to Enak.
29Ma’kadana’ lako kalemi kukua: Da mima’parondo sia da mikataku’i tu tau iato.
30Iatu PUANG, Kapenombammi, tu undoloangkomi, Ia la umparariangkomi situru’ tu mintu’ apa mangka Napogaurangkomi dio pentiromi lan Mesir,
31sia lan padang pangallaran, tu minii untiroi, umba Nakua tu PUANG, Kapenombammi, ussompokomi, susitu tau ussompo anakna, dio mintu’ lalan miolai, sae lako saemi inde te.
32Apa moi susito tu kadangku, tae’ duka mipatonganni tu PUANG, Kapenombammi,
33tu undoloangkomi dio lu lalan la undakarangkomi inan, tu minii ma’tenda: ke bongi lan to’ api la umpatiroangkomi tu lalan umba sipatu miola, sia ke allo lan to’ gaun.
34Iatonna rangimi PUANG tu kadammi, Sengkemi, anNa umpalao sumpa Nakua:
35Manassa moi misa’ te bati’ kadake iate tae’ na la untiroi tu tondok melo, tu umpalaoNa’ sumpa umpokadai la ungkamaseanni nene’ to dolomi,
36sangadi iatu Kaleb, anakna Yefune; manassa tau iato la untiroi, ondongpi lako kalena la Kunii ussorongi tu tondok iato, tu nalesemo, sia lako anakna, belanna kalebumo penaanna unturu’ PUANG.
37Ia duka tu aku Nasengkeimo’ PUANG belanna kamu, anna ma’kada Nakua: Iko duka tae’ mula tama dio.
38Iatu Yosua, anakna Nun, tu tontong umpengkaolaiko, la rampo dio; pamatoto’i belanna iamo la umpogau’i tu mintu’nato, anna ketaa mana’ tu to Israel.
39Iatu anakmi tu bitti’pa, tu mipokada a’ganna, kumua la dipopangrampa, – sia iatu mintu’ anakmi muane, tu tang untandaipa melo sia kadake, manassa la rampo dio, ondongpi lako kalena la Kunii ussorongi sia la napoapamo.
40Apa iatu kamu, balikkomi la ke’de’ lako padang pangallaran, ma’palulako tasik Teberau.
41Attu iato mebalikomi sia ma’kadakomi lako kaleku, kumua: Kasalammokan umbali PUANG. La ke’de’mokan parari situru’ tu mintu’ Napepasanan PUANG, Kapenombangki, lako kaleki. Pantankomi untakin pa’bunomi, belanna misanga maraa tu ungkendekki ma’buntunna.
42Apa ma’kadami tu PUANG lako kaleku Nakua: Pokadanni tau iato kumua: Da mike’de’ parari, belanna tae’ Kula dio lu kalemi, kumua da natalokomi ualimmi.
43Sia ma’kadana’ lako kalemi, apa tae’ miperangii, sangadi pabali-balikomi umbali parentaNa PUANG; matampo penggaurammi sia kendekkomi langngan ma’buntunna.
44Pakalan tassu’mi tu mintu’ to Amori, tu umpa’tondokki ma’buntunna, umpessitammuikomi, anna ula’komi susito enoan, sia natalokomi dio Seir sae lako Horma.
45Attu iato sulemokomi tumangi’ dio oloNa PUANG, apa tae’ Naperangiikomi PUANG sia tae’ Natanannikomi talinga.
46Iamoto mitorro masai dio Kadesh; ba’tu sangapa-apa allona minii torro dio.