Dual PanelTallu pa’gauran madatu
1Palan penaai tu bulan Abib sia pakarayai tu Pa’pasa la umpakala’bi’ PUANG, Kapenombammu, belanna lan bulan Abib, iatu PUANG, Kapenombammu, mangka ussolangko lan mai Mesir, tonna ibongi.
2Attu iato la mureresan PUANG, Kapenombammu, tu mai dombamu sia bembe’mu sia sapimmu la dipopa’pasa dio inan tu la Natonno’ PUANG la Napannii sanganNa dio.
3Attu iato da mukandei tu apa diragii sola tu apa iato; lan pitung allo la munii ungkande roti tang diragii sola tu apa iato, iamotu roti kadipakario-rioan, belanna sasako tassu’ lan mai tondok Mesir kumua lan mintu’ allo katuoammu la mukilalai tu allo katassurammu lan mai tondok Mesir.
4Tae’ na la den ditiro dio lu kamu tu apa diragii lan mintu’ lili’mu lan pitung allo. Sia iatu duku’na apa murere’ lan allo bunga’na ke makaroenni, tae’mo nama’din torro moi misa’ apa bongi iato sae lako masiangna.
5Tae’ muma’din urrere’i tu Pa’pasa lan misa’ kotamu, tu la nabenko PUANG, Kapenombammu.
6Apa iatu inan la Napilei PUANG, Kapenombammu, la Napannii sanganNa dio, munii la urrere’ Pa’pasa, ke makaroenni, ke lambunni allo, susitu attu katassurammu lan mai Mesir.
7La mutollo’ sia la mukande dio inan, tu la Napilei PUANG, Kapenombammu, ke masiangi to la ke’de’moko sule umpellambi’i tendamu.
8Lan annan allona munii la ungkande roti tang diragii, na allo ma’pempitu la den kasirampunan allo kapua la umpakala’bi’ PUANG, Kapenombammu, allo iato da mumengkarang.
9La muia’ pitung minggu, iamotu pamulanna dipata’pai piso sae’ tu gandung, la munii randuk umbilangi pitung minggu.
10Attu iato la mupakaraya tu pa’gauran minggu la umpakala’bi’ PUANG, Kapenombammu, sitinaya pamengan tanning inaammu, pada tu Nakamaseangko PUANG, Kapenombammu.
11La parannu-rannuko dio oloNa PUANG, Kapenombammu, iko sola tu mai anakmu muane sia iatu mai anakmu baine, kaunanmu muane sia ia tu mai kaunanmu baine, sola to Lewi, tu torro lan babangan kotamu, sia to sae, sia pia biung sia baine balu, tu misisolan, dio inan tu la Napilei PUANG, Kapenombammu, la Napannii sanganNa dio.
12La mukilalai kumua mangkamoko dipokaunan lan Mesir, ammu karitutui tonganni te mintu’ aluk dipondok.
13Iatu pa’gauran pekalumban la mupakaraya lan pitung allo, ke mangkamoko urrampun alanna panglullurammu sia alanna pa’parran anggoro’mu.
14La parannu-rannuko dio pa’maruasammu, iko sola tu mai anakmu muane sia iatu mai anakmu baine, kaunanmu muane sia kaunanmu baine sia to Lewi, to sae, pia biung sia baine balu, tu torro lan babangan kotamu.
15Lan pitung allo la mupakaraya tu pa’gauran la umpakala’bi’ PUANG, Kapenombammu, dio inan tu la Napilei PUANG. Belanna iatu PUANG, Kapenombammu, la umpamasakkeko diona mintu’ bura padangmu sia diona mintu’ apa mukarang, iamoto ammu parannu-rannu tongan.
16Pentallun lan sangtaun pantanni tu muane dio lu kamu, la mennolo dio oloNa PUANG, Kapenombammu lan tu inan, tu la Napilei Puang, iamotu ke pa’gauran roti tang diragii sia ke pa’gauran minggu sia ke pa’gauran pekalumban. Apa tae’ anna la mennolo lo’bang dio oloNa PUANG;
17pantan la nabaa sitinaya pabelanna, pada tu Nakamaseangko PUANG, Kapenombammu.
Pangra’ta’ malambu’
18Iatu to ma’paolai salu sia mantari’ la mutappu lan mintu’ kota, tu la Nabenko PUANG, Kapenombammu, situru’ tu mai sukummu, anna palolang pangra’ta’ malambu’ lako bangsa iato.
19Da mupakelokki tu salunna; da mumentiro lindo sia da mutarima pappe’. Belanna iatu pappe’ umpabuta mata to kinaa, sia ulleko’ kada to tongan.
20Sangadinna kamalamburan manna la muula’, ammu tuo marendeng sia umpotondok tondok, tu la Nabenko PUANG, Kapenombammu.
Da natoei to Israel tu aluk deata sia da napemalaranni tu olo’-olo’ den tattanna
21Da muosokki tu lentong kayu dipodeata, sia ba’tu pira-pira kayu dio sa’de inan pemalaranNa PUANG, Kapenombammu, tu la mugaragan kalemu.
22Da duka mupabendan batu dipodeata, belanna iatu iannato Nakabiri’ PUANG, Kapenombammu.