Dual PanelSengona Musa
1Tananni talinga, e kamu mintu’ papa’na langi’, angku ma’kada, sia e padang, perangiimi tu kada nasa’bu’ randan dipudukku.
2Iatu pangadarangku la to’do ten to uran, iatu kadangku to’do-to’do susito ambun, susi uran kamban unta’pai riu maluna, sia susito uran bara’ unta’pai mennutanna,
3belanna aku la unnongli’i tu sanganNa PUANG; patarompo’mi tu Kapenombanta,
4iamotu Buntu batu, sundun tu panggaraganNa, belanna mintu’ lalanna malolo; misa’ Kapenomban narondong kamarurusan, tang unnampui kakelokan, malambu’ sia tongan Ia.
5Napogau’mo tau iato mai tu kabulitukan unnea Puang, tu tangia anakNa, sangadinna misa’ kamatunan, to tama bilanganna to leko’ sia to kelok penaanna.
6Susimorakato tu pa’papakkanmi lako PUANG, e iko, bangsa baga sia tang paissan? Tangiaraka Ambe’mu tu umpadadiko, tu untampako sia umpatunannangko?
7Kilalai tu attu lendu’mo ingaranni tu taun pura disiosso’i; pekutananni lako ambe’mu, anna ia umpaissanniko, sia to matua-tuammu, anna ia umpokadangko.
8Iatonna paketaami Puang Patodoranna tu taa mana’na lako mintu’ bangsa, iatonna Pasisarakmi Puang tu ma’rupa tau, Napamanassami Puang tu anggenna bangsa iato, unturu’ bilanganna bati’na Israel.
9Belanna iatu taunNa tu Napotaa PUANG, Yakub iamo Napotaa mana’ Puang, tu disukaranni.
10Nakabu’tuimi lan padang pangallaran, lan padang lo’bang, tu nanii burungna padang aak. Ia ungkampai sia umpalan penaai, Ia ungkaduttu’i susito mata taunNa.
11Susito langkan maega, tu umpopettia’ anakna, sia mettia’-tia’ daona lu anakna, sia umballa’ pani’na, anna angka’i tu misa’, sia nabaa dao to’ pani’na,
12susimoto tu PUANG umpanundu’i, misa-misa, sia tae’ kapenomban senga’ untundui.
13Napopessake dao malangka’na kuli’na padang, sia Napakande burana padang; Napamimmi’ tani’ enoan lan mai buntu batu, sia minna’ lan mai batu laulung.
14Mantega sapi sia pangandu’ domba sia bembe’, sola lompo anak domba; sia domba laki dio mai Basan sola bembe’ laki, sia malapu’na gandung; sia muiru’ tu rarana bua anggoro’, iamotu uai anggoro’ kembura.
15Attu iato malompomi tu Yesyurun, anna metteba’ – malompomoko, kumamuru sia nakabu’ lompo – anna tampei tu Puang Matua, tu mangka ungkombongi, tang nabilangmo tu Buntu batu, Oto’na kasalamaranna.
16Tau iato mai umpatiakka’ kanokanNa Puang ditimba oloNa tete dio kapenomban senga’ sia umpamapa’di’ penaanNa Puang diona apa megallian;
17tau iato mai memala’ lako deata masussuk, tu tangia kapenomban, lako kapenomban, tu tang natandai, iamotu kapenomban ba’ru, tu mane bu’tu, tu tae’ napotirambanni nene’ to dolomi.
18Iatu Buntu batu, tu umpadadiko, musa’biangan, ammu kalupaimo Puang Matua, tu mangka umpatiroiko padang kalua’.
19Iatonna tiromi PUANG tu iannato, Natibemi tu tau iato, belanna iatu anakNa muane sia anakna baine umpamapa’di’mo penaanNa Puang.
20Ma’kadami Nakua: MoraiNa’ umbunianni lindoKu tu tau iato sia la Kutiro apa urrampoi ma’katampakanna, belanna to tama bilanganna to leko’ tu tau iato mai, sia pia tang unnissan maruru’.
21Tau iato mai umpatiakka’ kanokangKu ditimba oloKu tete dio apa tangia kapenomban, sia umpamapa’di’ penaangKu diona apa tang kebattuan. Iamoto la Kupatiakka’ tu pangimburuanna tau iato mai diona to tangia bangsa, sia la umpamapa’di’ penaanna diona misa’ bangsa baga.
22Belanna misa’ api dukku lan kare’dekan ara’Ku; tu ma’kande sae rokko to’ mandalanna lino to mate; pura nalalle tu kapadanganna sola burana, sia namampu’i tu garonto’na mintu’ buntu.
23La Kuboton tu kamandasan lako tau iato mai, sia mintu’ tinaranKu la Kupananni tu tau iato.
24Iake tang nakullemi napobua’ katangdiaran sia malamma’ napobua’ lassu kale sia saki tang dampi-dampian, manassa la Kurampanan tu isi olo’-olo’ masuru ullaoi, sola ipona apa mendonglo’ lan to’ barra’-barra’.
25Dio salian banua la kumande tu pa’dang, sia lan inan nanii katirambanan, urrampoi tu pia muane, anak dara, pia sumusu sia to ubanan.
26Moronganna angKu ma’kada Kukua: La Kusapui pala’ tu tau iato, sia Kupurai tu kapengkilalanna dio lu ma’rupa tau,
27iake tae’mi Kukataku’i tu kauntunaianna uali, kumua iatu to umbali-bali ma’tangnga’ sala, anna ma’kada nakua: Iatu limangki tarompo’, tangia PUANG unggaragai te mintu’nate.
28Belanna tau iato mai misa’ bangsa tang unnissan misa’ apa, sia tae’ pa’inaanna.
29Iake kinaai la untandai te iannate, sia la umpalan penaai tu apa la rampo ma’katampakanna.
30Umba nakua tu misa’ tau ma’din unnula’ uali sangsa’bu sia da’dua tau umpapallai tau sangpulo sa’bu, iake tae’i Nabalukanni Buntu batunna sia tae’ Napopa’elo’nai PUANG tu tau iato?
31Belanna iatu buntu batunna tau iato mai tae’ nasusi Buntu batunta, iatu ualinta ma’din umpamanassa kalena.
32Tonganna iatu garonto’ anggoro’na diala dio mai garonto’ anggoro’na Sodom sia dio mai pa’lak anggoro’na Gomora; iatu buanna bua anggoro’ keipo, sia mapai’ tu mai burena.
33Iatu uai anggoro’na ipo ula’ sia ipo ula’ rame pasanggangan.
34Tang tiannaraka dio Kaleku, sia dica’ lan pangannangKu?
35Aku puangna tu pa’pabala’ sia pa’papakkan, iake la attunnami tilende’ tu lette’na, belanna iatu allo kasangganganna mandappi’mo, sia madomi’mo mengkareke’ tu apa dipamanassanni.
36Belanna iatu PUANG la ussanda tonganni bangsaNa sia la ungkamasei taunNa; iake Natiroi, kumua pa’demo tu kamatotoranna, sia tappumo sola nasangi randuk dio mai madaona sae lako madionganna,
37attu iato la ma’kada tu Puang Nakua: Umbamira tu deatanna – iamotu buntu batu napentionganns-
38tu ungkande lompo pemala’ pangrere’na, sia unniru’ uai anggoro’ pemala’ pantedokna? Elo’namo nabendan tu deata iato la untunduikomi, ammi appa’ pentirerungan.
39Totemo tiromi, kumua iatu Aku, Akumote, tae’ tu Kapenomban, sangadinna Aku. Aku tu ma’pamate sia ma’patuo, ke mangkaMo’ ma’kasanggang ma’pamondoNa’, sia moi misa’ tau tae’ ma’rampanan lan mai kuasangKu.
40Tonganna, Kuangka’ tu limangKu langngan langi’ sia ma’kadaNa’ Kukua: La lelukraka tuoKu sae lakona:
41manassa iake Kuasai tu pa’dang pandillakKu, sia Kutoe tu ukungan, attu iato la Kupabala’i tu penggauranna to umbaliNa’ sia Kuparampoi pepakkan minda-minda ungkabiri’Na’.
42La Kupalangoi rara tu tinaranKu sia pa’dangKu la namoso duku’: iamotu rara to dipongko sia to dirampa, sia ulu nanii beluak ma’rundunna uali.
43Unnarrak-arrakkomi e kamu to sangpetayanan diona bangsaNa, belanna Puang umpakkanni rarana tu mintu’ taunNa sia Napabala’i tu penggauranna to umbalii,sia Napadenan kadiseroian kasalan tu tondokNa sia taunNa.
Mandappi’mo tu allo kamateanna Musa
44Saemi tu Musa anna pokadai dio pa’peranginna bangsa iato tu mintu’ kada sengo iate, la ia la Yosua, anakna Nun.
45Iatonna mangkamo Musa umpokadai te mintu’ kada sae lako tappunna lako mintu’ to Israel sola nasang, ma’kadami ungkuanni nakua:
46Palanni penaa te mintu’ kada, tu kupokada umpakilalakomi totemo, kumua na kada iato la mipasanan tu mai anakmi la ungkaritutui te mintu’ kada Sukaran aluk iate.
47Belanna kada iate tangia kada punala bang, sangadinna la mipotuo, iamotu tete dio kada iate la malambe’ sunga’komi torro lan tondok, tu la miala mipoapa, ke ullambanmokomi Yordan.
48Ma’kada pole’omi PUANG lako Musa to allo ia dukato, Nakua:
49Kendekko langngan te ma’buntunna Abarim, iamotu buntu Nebo, tu lan padang Moab sitingoan Yerikho, ammu tiro tondok Kanaan, tu la Kuben napoapa to Israel.
50Ammu mate dao buntu iato, tu la muteka’ langngan, sia sisarak angin dipudukmu sule lako nene’ to dolomu, susi kamateanna Harun, siulu’mu, dao buntu Hor, tu sisarak angin dipudukna sule lako nene’ to dolona,
51belanna mangkamokomi kasalan lako Kaleku dio lu to Israel, dio to’ uainna Meriba, sikandappi’ Kadesh lan padang pangallaran Zin sia tae’ mipamaindanNa’ dio lu to Israel.
52Belanna moi mutiro tu tondok iato dio tingayomu, apa tae’ mula tama, iamotu tondok la Kuben to Israel.