Dual PanelMusa umpakilalai tu to Israel ungkaritutui Sukaran alukNa Puang Matua
1Totemo, e to Israel, perangii te aluk dipondok sia atoran tu kuadarangkomi, kumua ammi turu’i, ammi tuo sia male tama tondok sia mipoapai, tu la Nabenkomi PUANG, Kapenombanna nene’ to dolomi.
2Da mirangnganni tu apa kupepasanan lako kalemi sia da mipasosso’i, ammi karitutui tu pepasanNa PUANG, Kapenombammi, tu kupapassanangkomi.
3Matammi kalenamo untiroi apa tu mangka Napogau’ PUANG diona Baal-Peor, umba Nakua tu PUANG, Kapenombammi, ussanggangi dio mai bilangammi tu mintu’ muane menturu’ umpenombai Baal-Peor.
4Apa iatu kamu, tu maruru’pa lako PUANG, Kapenombammi, tuopa sola nasang sae lako allo iate.
5Manassa mangkamokomi kuada’i tu aluk dipondok sia atoran, susitu mangka Napasan PUANG, Kapenombangku, lako kaleku, kumua ammi pogau’i susito lan tondok, tu la miala, mipoapai.
6Karitutui tonganni, belanna iamo garonto’ kakinaammi sia patiro penaammi dio pentirona mintu’ bangsa, tu la ma’kada, ke narangii tu mintu’na te aluk dipondok, nakua: Tonganna te bangsa kapua iate iamoto sangpetayanan kinaa unnampui tangnga’ melo.
7Belanna bangsa kapua umbara tu den deatanna mengkareke’ lako kalena susito, susi PUANG, Kapenombanta, ba’tu pempiran-pirangki’ metamba lako Kalena?
8Sia bangsa kapua umbara, tu unnampui aluk dipondok sia atoran susi malambu’na mintu’ sukaran aluk iate, tu kupa’perangian lako kalemi totemo?
9Apa la mukanandai tongan sia la mukatangkinni, da mukalupai tu apa mangka mutiro, sia da napa’de lan penaammu, tempon tuomu; paissanni tu mai anakmu sia iatu mai bati’mu,
10kumua iatu allo munii bendan dio oloNa PUANG Kapenombammu, dio Horeb, tonna ma’kada tu PUANG lako kaleku, Nakua: TambanNa’ sae sirampun tu mai bangsa, la Kupaissanni tu kadangKu, kumua napelada’i tu tau iato ungkataku’Na’ lan mintu’ allo, tu nanii tuo dao kuli’na padang sia anna ada’i tu mai anakna.
11Sia mengkareke’komi ammi bendan diong garonto’ buntu, tonna ma’lana-lana apinna tu buntu langngan tangngana langi’ – tonna kapu’i kamalillinan, gaun sia kapittukan.
12Attu iato ma’kadami tu PUANG lako kaleku, lan mai tangnga to’ api; den oni gamara mirangi, apa iatu pa’kaleanNa tae’ mitiroi, sangadi misa’ gamara.
13Sia napaissannikomi basse tu Napepasanan lako kalemi ungkaritutui, iamotu Sangpulo Kada. AnNa sura’i dao da’dua papan batu.
14Attu iato Napepasanan PUANG lako kaleku, kumua la kuada’ikomi tu aluk dipondok sia mintu’ atoran, tu sipatu mipogau’ lan tondok, tu minii male unnalai la mipoapa.
15Iamoto kanandai tongankomi kalemi – belanna tae’ mitiro misa’ pa’kalean tonna allo, Nanii PUANG ma’kada lako kalemi dao Horeb lan mai tangnga to’ api
16da mipogau’ kadake, belanna unggaragangkomi kalemi misa’ rapang-rapang dipodeata dipa’ merrupa misa’ deata, iamotu rapang-rapangna a’gan muane ba’tu baine;
17misa’ rapang-rapangna sala umbanna misa’ olo’-olo’ dao kuli’na padang; sia misa’ rapang-rapangna sala umbanna misa’ olo’-olo’ kepani’, tu mettia’ dao lu langi’;
18sia misa’ rapang-rapangna sala umbanna misa’ olo’-olo’, tu menono’ dao kapadanganna; sia misa’ rapang-rapangna sala umbanna bale, tu diong to’ uai diongna lu lino.
19Sia da duka mumentingara langngan langi’ sia mentiro langngan mata allo sia bulan na bintoen, iamotu mintu’ ma’dandan maritik dao langi’ sia da nanaranko la umpenombai sia umpengkaolai, tu Nataai PUANG, Kapenombammu, lako mintu’ bangsa nasambo langis-
20apa iatu kamu Naalamokomi PUANG sia Nasolangkomi tassu’ lan mai dapo’ bassi, iamotu Mesir, ammi dadi taunNa, susitu a’gammi te allo iate.
21Apa nasengkeina’ PUANG belanna kamu, anNa umpalao sumpa, kumua tae’ kula ullambanni Yordan sia tae’ kula tama tondok ballo, tu la Nakamaseangko PUANG, Kapenombammu, ammu potaa mana’i.
22Belanna la matena’ lan tondok iate, sia tae’ kula ullambanni Yordan; apa iatu kamu la milamban sia la miala mipoapai tu tondok ballo iato.
23Kanandai tu kalemi, da mikalupai tu basseNa PUANG, Kapenombammi, tu mitanan sola, ammi garagai tu rapang-rapang dipodeata, merrupa misa’ apa, tu Napa’gagai PUANG, Kapenombammu, lako kalemu.
24Belanna iatu PUANG, Kapenombammu, susito misa’ api ma’pamampu’ sia Kapenomban noka ditimba oloNa.
25Iake kianakmoko ba’tu membati’ sia tontongkomi lan tu tondok, ammi pogau’ kadake unggaragai rapang-rapang dipodeata, moi anna umba duka nakua rupanna sia mipogau’ tu apa kadake dio pentiroNa PUANG, Kapenombammi, ammi pamapa’dikki tu penaanNs-
26allo iate kualamo tu langi’ sia padang la ussa’biikomi diona kasalammi, kumua manassa la madomi’komi tallan lan tondok, tu la miala mipoapa, ke mangkamokomi ullamban Yordan; tae’ mimasai tuo lan tondok iato, sangadinna manassa la disanggangikomi.
27La Napatisambo’-sambo’komi PUANG dio lu mintu’ sangpetayanan, ammi torromora tang pira dio lu bangsa, tu la Nanii umpali’komi PUANG.
28Attu iato la mipenombai tu deata dio; tu panggaraga to lino, kayu sola batu, tu tang patiro, tae’ naparangi, tae’ nakumande sia tae’ namanguduk.
29Ammu daka’i dio tu PUANG, Kapenombammi, ammu kabu’tui, ke kalebu tonganni penaammu sia deatammu male undaka’I.
30Iake masussako narampoi te mintu’ apa iate lan attu la sae, manassa la mengkatoba’ko lako PUANG, Kapenombammu, ammu perangii.
31Belanna iatu PUANG, Kapenombammu, iamo Kapenomban, masokan, tae’ Natampeko sia tae’ Nasanggangko sia tae’ Nakalupai tu basseNa sola nene’ to dolomu, tu Natananan sola Napalaoi sumpa.
32Belanna pekutananni tu allo lendu’mo, tu attu dolo na iko, temponna Puang Matua umpadadi tolino dao kuli’na padang; sia mekutanako dio mai randan langi’ sae lako randan langi’, ba’tu la denni dadi misa’ apa susi kapuanna te ba’tu dirangi misa’ apa susite.
33Denmoraka misa’ bangsa urrangi gamara Kapenomban tu ma’kada lan mai tangnga to’ api, susitu mangka murangi sia tontongpa tuo tu bangsa iato?
34Ba’tu denmoraka misa’ deata untobai sae la unnalan kalena misa’ bangsa dio mai tangngana bangsa senga’, tete dio kadipandasan, tete dio tanda kalle-kallean sia tanda mangnga sia kasirarian, tete dio lima mawatang sia takia’ tie’te’ sia tete dio penggauran ma’patiramban, susitu Napogau’mo PUANG Kapenombammi, te mintu’na te lan Mesir belanna kamu dio pentiromu.
35Mangkamoko dipakitan, ammu issanni, kumua iatu PUANG Iamo Kapenomban, tae’ naden senga’na sangadinna Ia manna.
36Dao mai langi’ Napa’perangian tu gamaranNa lako kalemu, la umpakilalako, sia Napatiroangko tu api kapuaNa dao kuli’na padang sia murangimo tu kadanNa lan mai to’ api.
37Belanna Nakamasei tu nene’ to dolomu sia Napilei tu bati’na, anNa Ia kalena ussolangko lan mai Mesir tete dio kamatotoran kapuaNa,
38la urrambai dio tingayomu tu mai bangsa tu kapua sia kuasa na kalemu, sia la ussolangko tama tondokna sia la Nabenko mupotaa mana’i, susitu a’gammu te allo iate.
39Totemo la mutandai sia la mupalan penaa, kumua iatu PUANG Iamo Kapenomban lan langi’ dao sia dao kuli’na padang inde to diong, tae’ senga’na.
40Iamoto la mukaritutui tu aluk Napondok sia pepasanNa, tu kupapassanniko totemo, kumua mumalaga’-laga’ sia iatu mai anakmu undinna na iko sia malambe’ tu sunga’mu lan tondok tu la Nasorong PUANG, Kapenombammu, lako kalemu sae lakona.
Dipamanassa tu kota pentilindungan sambalinna lu Yordan
41Attu iato napatorro senga’mi Musa tu tallu kota sambalinna lu Yordan, dio rampe matallo,
42kumua na iatu to papatean, tu tang naangga’i umpatei solana, tu tang untambukanni essun dolona, la mallai lako, naurunganni ma’din tuo, ke mallaimi lako misa’ kota iato,
43iamotu Bezer lan padang pangallaran, lan lili’na buntu marante, la nanii mallai to Ruben, na Ramot lan Gilead, la nanii mallai to Gad, na Golan lan Basan, la nanii mallai to Manasye.
Bungkaran kada pa’pangada’na Musa
44Inde sia tu Sukaran aluk, tu napokada Musa dio tingayona to Israel.
45Iamote tu apa dipamanassa, aluk dipondok sia atoran, tu mangka napokada Musa lako to Israel dio kalingkanna, tonna tassu’ lan mai Mesir,
46iamotu sambalinna lu Yordan diong lombok sitingoan Bet-Peor, lan tondokna Sihon, datu to Amori, tu mangka torro dio Hesbon, tu mangka natalo Musa sola to Israel dio kalingkanna, tonna tassu’ lan mai Mesir,
47sia naalamo tu tondokna anna poapai, susi duka tu tondokna Og, datu Basan, iamotu datu to Amori sola duai, tu torro sambalinna lu Yordan, dio rampe matallo,
48iamotu dio mai Aroër, tu dio biring salu Arnon sae lako buntu Siryon – iamotu Hermos-
49sia mintu’ rante, tu sambalinna lu Yordan dio rampe matallo, sia sae lako tasik Araba, diong garonto’ mennaa’na Pisga.