Alkitab Mobile SABDA
[VER] : [TORAJA]     [PL]  [PB] 
 <<  Ulangan 9 >> 

Pa’pakilala, kumua da natendeng kamaloloanna tu to Israel

1Perangii, e to Israel! Totemo la mulamban tu Yordan ammu alai mupoapa tu lili’na tu mai bangsa, tu tarompo’ sia makuasa na iko sia iatu mai kota kapua, tu ditambakuku malangka’ langngan langi’ –,

2misa’ bangsa kapua sia malangka’, iamotu to Enak, tu mutandai tongan sia murangi tu karebanna, kumua: mindara unnattai siea tu to Enak?

3Totemo la mutandai, kumua iatu PUANG, Kapenombammu, undoloangko, susito api ma’pamampu’; la Nasanggang tu tau iato mai sia Natalo dio pentiromu; susimoto la madomi’ko unnalai tu lili’na mupoapai, sia la musabu’i tu tau iato, susitu mangka Napokada PUANG lako kalemu.

4Da muma’kada lan penaammu, ke mangkami Naula’i PUANG, Kapenombammu, tu tau iato dio tingayomu: Belanna kamaloloangku, anNa sorongi PUANG te tondok iate lako kaleku kualai kupoapa; belanna napobua’ katangmekaalukanna te bangsa iate, iamoto Naula’i PUANG dio mai tingayomu.

5Tangia diona kamaloloammu sia tangia diona bulo lollongmu, ammu alai mupoapa tu tondokna, apa napobua’ katangmekaalukanna Naula’i PUANG, Kapenombammu te bangsa iate dio mai tingayomu sia la umpalanda’i tu kada, Naallu’ PUANG Napalaoi sumpa lako nene’ to dolomu: Abraham, Ishak na Yakub.

6Iamoto la muissan, kumua tangia diona kamaloloammu, anna sorongi PUANG, Kapenombammu, te tondok melo lako kalemu, belanna ikomo tu misa’ bangsa matoro.

7Pengkilalai, da mukalupai, umba mukua umpare’dek ara’Na PUANG, Kapenombammu, lan padang pangallaran, randuk dio mai allo, tu minii tassu’ lan mai tondok Mesir, sae lako kasaeammi inde te inan iate, tontong bangkomi umbali-bali PUANG.

8Ondongpi dio Horeb mipare’dek tu ara’Na PUANG, manassa susimoto tu kare’dekan ara’Na PUANG, anNa morai ussanggangkomi.

9Iatongku kendekmo langngan buntu la untarimai tu papan batu, iamotu papan basse, tu mitanan sola PUANG, kutorro patangpulo allona patangpulo bonginna dao buntu, tang ungkande roti sia tang unniru’ uai.

10Nabenmo’ PUANG tu da’dua papan batu, tu nasura’ tarunoNa Puang Matua, tu nanii mintu’ kada, tu mangka Napokada PUANG dao buntu lako kalemi lan mai tangnga to’ api, tonna allo kasirampunan.

11Iatonna ganna’mo patangpulo allona patangpulo bonginna Nabenmo’ PUANG tu da’dua papan batu, iamotu papan basse.

12Attu iato Napokadami PUANG lako kaleku, Nakua: Ke’de’moko ammu madomi’ mengkalao dao mai te buntu, belanna iatu bangsamu tu musolan tassu’ lan mai Mesir kadakemo gau’na. Madomi’ bang tu tau iato mai sepang dio mai lalan, tu mangka Kupepasanan lako kalena, unggaragammo kalena misa’ rapang-rapang dipodeata dipati’no’.

13Ma’kada pole’omi tu PUANG lako kaleku Nakua: Kutiromo te bangsa iate, manassa misa’ bangsa matoro.

14Da’ito angKu sabu’i sia Kupa’dei tu sanganna diong nasambo langi’; angKu padadiko misa’ bangsa mandu makuasa sia tarompo’ na bangsa iate.

15Pakalan tibalikmo’ sule, angku mengkalao dao mai buntu, tu ma’lana-lana apinna. Na iatu da’dua papan basse lanmo limangku patomali.

16Attu iato kutirokomi, manassa ka-salammokomi umbali PUANG, Kapenombammi; unggaragammokomi ka-lemi misa’ anak sapi dipati’no’; madomi’komi sepang dio mai lalan, tu mangka Napepasanan PUANG lako kalemi.

17Kutoemi tu da’dua papan, anna pentibean patomalii limangku, sia kutesse-tesse dio pentiromi.

18Pakalan tukkumo’ menomba dio oloNa PUANG, susitu dolona, patangpulo allona patangpulo bonginna – tang ungkande roti sia tang unniru’ uai – belanna mintu’ kasalan mipogau’, iamotu umpogau’komi apa kadake dio pentiroNa PUANG, sia umpa’dikki penaanNa.

19Belanna kukataku’ tu kasengkeanNa sia kare’dekan ara’Na, tu nanii re’dek ara’Na PUANG ussengkeikomi, Naurungan la ussabu’ikomi. Apa ia duka te attu iate Naperangiina’ PUANG.

20Ia duka tu Harun mandu tongan Nasengkei PUANG, anna morai la ussabu’i; iamoto kupasambayangan dukai tu Harun attu iato.

21Apa iatu panggaragammi tu mipokasalan, iamotu anak sapi mangka migaragai, kuala, angku ballai sia kutesse-tesse angku nisak-nisakki sae lako mendadi susi barra’-barra’. Iatu barra’-barra’ iato kutibe rokko salu’-salu’, tu lolong dao mai buntu iato.

22Dio duka Tabera, dio Masa sia dio Kibrot-Taawa ba’tu pempirangkomi umpare’dek ara’Na PUANG.

23Iatonna suakomi PUANG dio mai Kadesh-Barnea, anNa pasankomi, kumua: Ke’de’komi, ammi alai tu tondok mipoapa, tu mangka Kusorong lako kalemi – attu iato mibali tu parentaNa PUANG, Kapenombammi, iamotu tae’ mipatonganni sia tae’ miperangii tu gamaranNa.

24Pabali-balikomi unnea PUANG, temponku untandaikomi.

25Tukkumo’ menomba dio oloNa PUANG – patangpulo allona patangpulo bonginna kunii tukku menomba – belanna Napokadamo PUANG, kumua la Nasabu’ikomi,

26sia massambayangna’ lako PUANG. Ma’kadana’ kukua: O Puangku PUANG, da Mimangsanni te mai bangsaMi sia tau mana’Mi, tu Milendokan tete dio kapasareonganamMi sia Misolan lan mai Mesir tete dio lima mawatang.

27Kilalai tu taumMi, iamotu Abraham, Ishak na Yakub; da Mipalan penaai tu kamakarrasanna te bangsa iate sia katangmekaalukanna sia kasalanna,

28anna lan tondok, tu Minii ussolangkan tassu’, da nama’kada tu pa’tondokanna, kumua: Belanna tae’ Nabelai tu PUANG ussolanni tu tau iato tama tondok, tu mangka Naalluranni sia belanna Nakabiri’ tu tau iato, iamoto Nasolanni tassu’ la Napatei lan padang pangallaran.

29Manassa tau iate bangsaMi sia tau mana’Mi, tu Misolan tassu’ tete dio kakapuanna kamatotoramMi sia takia’ tie’te’Mi.


  Share Facebook  |  Share Twitter

 <<  Ulangan 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel