Dual PanelYehezkiel ditolemo diangka’ to ma’kampa
1Rampomi tu kadanNa PUANG lako kaleku Nakua:
2E ma’rupa tau, ma’kadako lako sangbangsamu sia la mukua lako tau iato mai, kumua: Iake Kuparampoi pa’dang tu misa’ tondok, anna pilei pa’tondokan tu tau misa’ dio mai tangngana sia naangka’ to ma’kampa,
3anna tiroi to ma’kampa tu pa’dang urrampoi tondok iato, la napannoni tu napiri tanduk la umpaissanni taus-
4iake denni tau urrangi tu oni napiri tanduk, apa manoka dipakilala, narampo tu pa’dang umpisanni, manassa iatu rarana la sule langngan ulunna.
5Narangimo tu oni napiri tanduk, apa manoka dipakilala; manassa iatu rarana la sule langngan ulunna; ke naturu’i tu pa’pakilala manassa napotilendok katuoanna dio mai kamatean.
6Apa ianna tiroi to ma’kampa tu pa’dang sae anna tae’ napannoni tu napiri tanduk, naurunganni tae’ nadipaissanni tu to lan tondok, na rampo tu pa’dang sia umpatei misa’ tau dio lu tau iato mai, manassa la dipatei natumang kakelokanna kalena, apa iatu rarana la Kutuntun lako to ma’kampa.
7E ma’rupa tau, iatu iko Kuangka’moko to ma’kampana to Israel: Iammu rangi kada sun dio randan dipudukKu, la mupakilala tu tau iato mai tete dio sangangKu.
8IangKu ma’kada lako to tang mekaaluk, kumua: E to tang mekaaluk, inang la mateko, apa tae’ muma’kada la umpakilalai da naturu’i tu lalanna, ke susito manassa iatu to tang mekaaluk la mate natumang kakadakeanna, apa iatu rarana la Kutuntun lako kalemu.
9Apa iake mupakilalami tu misa’ to tang mekaaluk la tibalik dio mai lalanna, apa tae’ natibalik inde to dio mai, manassa la mate natumang kakadakeanna, apa mulendokammo tu katuoammu.
10Iamoto, e ma’rupa tau, ma’kadako lako to Israel kumua: Susite tu kadammi, mikua: Kapatodo-tintingangki sia kasalangki unti’tinkan iamo bannangna angki bonnong-umbamora la kikua tuo?
11Ma’kadako lako tau iato mai kumua: La lelukraka tuoKu, kadanNa Puangta PUANG, tae’ naalai penaangKu tu kamateanna to tang mekaaluk, sangadinna mandu naala penaangKu, ke tibalikki tu to tang mekaaluk dio mai lalanna, anna tuo. Tibalikkomi, tibalikkomi dio mai lalan kadakemi. Belanna ma’apari ammi la matera, e to Israel?
12Iamoto, e ma’rupa tau, ma’kadako lako sangbangsamu kumua: Iatu kamaloloanna to malambu’ tae’ na ia la ungkarimmanni, ke patodo – tintingi; sia tae’ nala tobang tu to mekaaluk natumang katangmekaalukanna, ke mengkatoba’i dio mai katangmekaalukanna. Sia iake kasalammi tu to malambu’, tae’ nala tuo tete dio kamaloloanna.
13Iake ma’kadaNa’ lako to malambu’ kumua manassa la tuo, apa sande’ lako kamaloloanna sia umpogau’ tang malambu’, manassa moi misa’ tu mintu’ apa malambu’ napogau’ tae’mo nala dibilang, sangadinna la mate natumang apa tang malambu’ napogau’.
14Sia iake ma’kadaNa’ lako to tang mekaaluk kumua: Manassa la mateko apa mengkatoba’ dio mai kasalanna sia umpogau’i tu salunna sia kamaloloas-
15ke umpasulei tu apa dipa’pentoean tu to tang mekaaluk, sia ussondai tu apa mangka dirampa, sia lolang unturu’ apa dipondok, tu umpabu’tu katuoan, naurunganni tae’mo napogau’ apa tang malambu’ – manassa la tuo, tae’ nala mate.
16Anna moi misa’ tu kasalan mangka napogau’ tae’mo nadibilang lako kalena; umpogau’mo salunna sia kamaloloan, dadi manassa la tuo.
17Ma’kada tu mai sangbangsamu nakua: tae’ anna malambu’ tu lalanNa Puang, namoi to lalannari ia, tu tang malambu’.
18Iake memboko’mi tu to malambu’ dio mai gau’ malambu’na, ianna pogau’ tang malambu’, manassa la napomate tu iannato.
19Apa iake denni misa’ to tang mekaaluk mengkatoba’ dio mai katangmekaalukanna sia umpogau’i tu salunna sia kamaloloan, manassa la napotuo tu iannato.
20Apa ma’kadakomi, kumua: Tae’ namalambu’ tu lalanNa Puang: Aku la umpaolaikomi salu, pantan sitinaya penggauranna, e to Israel.
Kareba diona Yerusalem ditalo
21Iatonna taun ma’pessangpulo duanna kadipaliranta, bulan ma’pessangpulo, allo ma’pellimanna lan bulan iato, rampomi tu misa’ to lussu’ dio mai Yerusalem umbanna’ kareba nakua: Iatu kota talomo!
22Nata’paimo’ limanNa PUANG tonna ibongi, tonna tae’pa nasae tu to lussu’: iatonna sattu’mora nasae lako kaleku tu to lussu’ tonna melambi’, Nabungka’mi Puang tu pudukku sia tae’mo kumamang.
23Rampomi tu kadanNa PUANG lako kaleku Nakua:
24E ma’rupa tau iatu tau torro dio inan daun-lauan lan tondok Israel ma’kada nakua: Iatu Abraham ia manna misa-misai, anna pomana’i tu tondok iato; kami budakan diben dukakan tu tondok iato la kipomana’.
25Iamoto, ma’kadako lako tau iato mai kumua: Inde sia tu kadanNa Puangta PUANG, Nakua: Mikande tu duku’ sola rarana, sia mentingarakomi lako rapang-rapang dipodeata sia umpatibollokomi rara, umba mikua la umpomana’i tu tondok iato?
26Sakka’ bangkomi la ma’pa’dangi, sia umpogau’komi apa megallian, sia pantan urruttakkikomi bainena solami – umba la mikua umpomana’i tu tondok ia to?
27Susito la mukua lako tau iato mai, kumua: Inde sia tu kadanNa Puangta PUANG, Nakua: La lelukraka tuoKu, minda-minda tu lan inan daun-lauan la tibambang nakande pa’dang; minda-minda tu dio lu padang, la Kuben olo’-olo’ nakande; na minda-minda tu lan tambakuku sia lan lo’ko’ la mate nabaa ra’ba biang.
28La Kupopempadang lo’bang tu tondok iato sia la Kupopendadi misa’ padang sanggang, sia la Kusabu’i tu kuasa tarompo’na sia mintu’ buntunna Israel la makarorrong, naurunganni moi misa’ tau tae’ unnolai.
29Maneri natandai tau iato mai, kumua Akumo tu PUANG, ke Kupopempadang lo’bangmi sia Kupopendadi misa’ padang sanggang tu tondok iato, natumang mintu’ penggauran megallian tu mangka napogau’.
30E ma’rupa tau, iatu sangbangsamu sipa’kada-kada diona iko dio to’ rinding tembo’ sia dio to’ baba banua: iatu misa’ ma’kada lako solana, pantan lako siulu’na: Maiko sia perangii ba’tu la kada umba tu sae dio mai PUANG.
31Rampomi tu tau iato mai mati’ kalemu ma’lole’-lole’, anna unno’ko’ dio tingayomu susito kombongangKu sia naperangi tu kadammu, apa tae’ naturu’i; kada kaboro’ lan sadangna, apa iatu penaanna umparinaa-naa bang saro bu’tu kadake.
32Tonganna ikomo tu butung misa’ nanian umpadosso inaa lako tau iato mai, tu ma’rio-rio oninna, tu sipatu dipasiala oni-onian diritii. Narangi sia tu kadammu, apa tae’ bang naturu’i.
33Apa ianna rampomo tu iannato – tonganna inang la rampo – maneri natandai tau iato mai, kumua denmo misa’ nabi lan lu tangngana.