Alkitab Mobile SABDA
[VER] : [TORAJA]     [PL]  [PB] 
 <<  Yeremia 1 >> 

Bungkaran kada

1Iamote tu kadanna Yeremia, anakna Hilkia, bati’ to minaa, tu torro dio Anatot, lili’na Benyamin.

2Iamora nanii rampo tu kadanNa PUANG tonna Yosia, anakna Amon datu to Yehuda tonna taun ma’pessangpulo tallunna ma’parenta.

3Sia rampo duka tonna Yoyakim, anakna Yosia, datu to Yehuda sae lako ma’katampakanna taun sangpulo misa kaparentanna Zedekia, anakna Yosia, datu to Yehuda sae lako kadipaliranna tu pa’tondokan Yerusalem, tonna bulan ma’pellimanna.

Kaditambaianna Yeremia

4Narampoimo’ tu kadanNa PUANG, Nakua:

5Iatonna tae’pa Kukombongko lan inan tau, inang Kutandaimoko sia iatonna tae’pa mutassu’ lan mai pa’tambukan, Kupamarimbanganmoko sia Kuangka’ko nabinna mintu’ bangsa iato.

6Mebalimo’ kukua: O Puangta PUANG tae’ kuissanni ma’kada-kada, belanna mangurapa’.

7Apa Nakua PUANG lako kaleku: Da mukuai: Mangurapa’, belanna minda-minda tu Kunii ussuako, la maleko lako sia mintu’ tu Kupasan lako kalemu, la mupokada.

8Da mumataku’ dio tingayona tau iato mai, belanna Aku urrondongko la urrampanangko, kadanNa PUANG.

9Nae’te’mi PUANG tu limanNa, Nakaka’i tu pudukku, anNa ma’kada lako kaleku, Nakua: Tonganna Aku umpatamai kadangKu tu sadangmu.

10Allo iate Kuangka’ko umpoissan ba’tu pira-pira bangsa sia ba’tu pira-pira kadatuan, la ma’du’dukki sia la mangrondonni sia massanggangi sia ma’pisanni sia la ma’bangun sia la mantanan.

11Sae pole’omi tu kadanNa PUANG urrampoina’, Nakua: Apara mutiro e Yeremia? Mebalimo’ kukua: Untirona’ misa’ takke’-takke’ kayu badan.

12Nakuami PUANG lako kaleku: Tonganna mutiro, belanna sakka’Na’ ungkampai tu kadangKu, la umpalaloi.

13Ma’penduanna saeomi tu kadanNa PUANG urrampoina’, Nakua: Apara mutiro? Mebalimo’ kukua: Untirona’ misa’ kurin re’de bu’tu lu daa mai.

14Nakuami PUANG lako kaleku: Daa mai ulunna salu, la nanii sae tu kasanggangan lako mintu’ pa’tondokan.

15Belanna tonganna Aku untambai tu mai bangsa mintu’ kadatuan daa mai ulunna salu, kadanNa PUANG; la sae tu tau iato mai napantan umpatorro isungan kapayunganna lan babangan Yerusalem sia sitingoan mintu’ rinding tembo’na tiku lao sia sitingoan mintu’ tondok Yehuda.

16Sia Aku la unnukungi tu tau iato mai diona mintu’ kakadakeanna, belanna naboko’iMo’ sia umpemalarammo pemala’ ditunu pu’pu’ lako panggaraga limanna.

17La mupori tu aakmu, ammu ke’de’ umpokadai lako tau iato mai tu mintu’ apa la Kupasanangko, da mutiramban belanna tau iato mai, da angKu patirambanko dio tingayona.

18Manassa allo iate Aku umpadadiko misa’ tambakuku matoto’ sia lentong bassi sia rinding tambaga untingoi tu mintu’ tondok sia mintu’ datu Yehuda sia arungna sia to minaanna sia mintu’ to lan tondok iato.

19La naeako tu tau iato mai, apa tae’ nataloko, belanna Aku urrondongko la urrampanangko, kadanNa PUANG.


  Share Facebook  |  Share Twitter

 <<  Yeremia 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel