Dual Panel1Attu ia dukato, kadanNa PUANG, la napatassu’ tau tu bukunna mintu’ datu to Yehuda sia bukunna mintu’ arungna sia bukunna mintu’ to minaa sia bukunna mintu’ nabi sia bukunna mintu’ to lan Yerusalem diong mai panglamunanna.
2Anna tale’i dio patu allo sia bulan sia mintu’ ma’dandan maritik dao langi’, tu nakamali’ sia napengkaolai sia naturu’ sia nadaka’, nanii menomba; mintu’ buku iato tang la dirampun ba’tu dilamun, sangadinna la mempangangku’ dio lu padang.
3La’biran mate ke la tuomira tu torrona, iamotu mintu’ to torropa dio lu pa’rapuan kadake iate, dio lu mintu’ inan Kunii urrambai tu tau iato mai, kadanNa PUANGna mintu’ ma’dandan maritik.
Kasalan sia ukungan
4La mupokada lako tau iato mai kumua: Nakua kadanNa PUANG: Denraka to tobang anna tang malimbangun sule, denraka to sumepang senga’ anna tang tibalik sule?
5Ma’apai te bangsa iate nadisangai: To sorong boko’ na iate Yerusalem: To sorong boko’ tarru’? La’ka’ bang lako pa’pakena, sia mengkailing tu tau iato mai mengkatoba’.
6Kupeandallingmo sia Kuperangii-rangiimo, manassa tau iato mai umpokada apa kelok; moi misa’ tae’ umpenassanni tu kakadakeanna, nakuami: Apara tu kupogau’? Mallaimi sola nasang sorong boko’ susito darang ma’dondo tama tananan ra’.
7Moi anna tambolang dao lu langi’ untandai tu attunna sia bu’ku’ sola kaluppini’ na kaloko’ ungkilalai duka attu karampoanna, sangadinna taungKu manna tu tang untandai katongananNa PUANG.
8Umba la mikua ma’kada kumua: Kami te to paissan; sia dio kaleki tu Sukaran alukNa PUANG? Manassa iatu penaa pa’pakenanna mintu’ to massura’ untonno’ leko’i.
9Dipakasiri’ sia masussa, ondongpi pussak tu mintu’ to paissan, belanna natumpu tau iato mai tu kadanNa PUANG; kapaissanan apa toda dio kalena?
10Iamoto Kueloranni tu bainena tau iato mai naala to senga’ sia iatu pa’lakna diben to untaloi. Belanna randuk dio mai to bitti’ sae lako to kapua undaka’ bang saro bu’tu kadake, mintu’na to ma’pakena nasang la nabi la to minaa.
11Iatu bangkena anakna baine taungKu samaraa-raanna nadampi, nakua: Marampa’, marampa’! Apa tae’ tu kamarampasan dio.
12Dipakasiri’ tu tau iato mai, belanna apa megallian tu napogau’, apa tae’ bangmo natandai tu siri’, ondongpi ma’lindo batu bangmo. Iamoto la tipessambak tu tau iato mai dio lu mintu’ to tipessambak; iake dipapakkanni tu tau iato mai, la tisumbang kadanNa PUANG.
13La Kurampun tu bua kapatongananna tu tau iato mai, kadanNa PUANG: dio lu garonto’ anggoro’ tang membua sia dio lu garonto’ ara tang membua, ondongpi iatu daunna malayumo; sia tang napalan penaanna tu apa Kukamaseanni.
14Ma’apai anta la unno’ko’ indete? Sirampunkomi, maikomi tatama tondok ma’tambakuku, moi tadio lu, inang la sanggang dukaki’, belanna Nasorongmoki’ PUANG, Kapenombanta, lako kasanggangan sia Napairu’moki’ rasun, belanna kasalanmoki’ lako PUANG.
15Moi tarannuan kamarampasan, apa tae’ bang tu melona, moi anta rannuan allo kamalekean, apa metakuranna manna.
16Daa mai Dan dinii urrangii tu sumaunna mintu’ darangna, sia iatu mai darangna ma’mehe’-mehe’, natiseno-seno tu mintu’ tondok; tau iato mai saemo untaloi tu mai padang sia ungkandei tu mai burana, sia ussanggang tondok sia iatu mai pa’tondokan.
17La Kupasaeangkomi tu ba’tu pira-pira ula’ keipo, tu tang natulak pa’basa-basa, anna totokkomi, kadanNa PUANG.
18Tang kutanan tongan mapa’dikna tu penaangku, lendu’ masussanna penaangku!
19Perangiimi tu sarrona anakna baine taungku dio mai mintu’ tondok, kumua: Umbai tae’ PUANG dio Sion, umbai tae’ tu Datunna dio? – Ma’apari tu mai rapang-rapang dipodeatanna tau iato napa’dikki tu penaangKu, sia apa tang kebattuan dio mai padang tau.
20Lendu’mo tu pegandungan sia upu’mo tu pealloan, natae’ bang sia tadirampanan.
21Sanggang tonganna’ napobua’ kasangganganna anakna baine bangsaku, ma’pote dibolongna’ sia magiangna’!
22Tae’raka balsen dio Gilead, tae’ raka misa’ to ma’dampi? A’a ma’apai tu bangkena anakna baine bangsaku natang sikemun?