Dual PanelBUNGA’NA SURA’ YESAYA (PASALA’ 1-39) ;PA’NUBUA’ DIONA YEHUDA NA YERUSALEM (PASALA’ 1–12); Bungkaran Kada
1Iamote tu patiro mendeatanna Yesaya anakna Amos, tu natiro diona Yehuda sola Yerusalem tonna linona Uzia, Yotam, Ahas sia Hizkia, datunna to Yehuda.
Pa’pasalaNa PUANG sia sarrona Yesaya
2Perangii, e mintu’ langi’!, sia patananni talinga, e lipu daenan! belanna nakua tu kadanNa PUANG: Kupelobo’i sia Kukaduttu’ tu mai pia, apa naboko’iMo’.
3Iatu sapi natandai iatu puangna sia iatu keledai natandai iatu palunganna puangna, apa iatu Israel tae’ paissanna, sia iatu taungKu tae’ inaanna.
4Upu’ allona tu to kasalan, tu bangsa natondon kakadakeanna, bati’ to kadake sia taruk to bulituk! Natampe tu PUANG, sia nabelle’ tu To maserona to Israel sia memboko’.
5Apapa gai’mi diada’? Belanna samemboko’-boko’mi bangmo. Mintu’ ulummi sipa’dikan, sia puru’mo tu penaammi.
6Tempon diong mai pala’ lentekmi landa’ langngan botto ulummi tae’mo memun, sangadinna bangke sia sisulla’pang-la’pangan sia koyong tang diperru’i sia tang dibimbin sia tang diammakki minna’.
7Iatu padangmi lo’bangmo; iatu kotami puramo nakande api; iatu alan pa’lakmi natiro matammi nakande to sae; lo’bang nasangmo susito padang nabaliangan to sae!
8Na iatu anak dara Sion tinampe ten to lantang lan to’ pa’lak anggoro’ sia butung to kalumba lan to’ katimun, susito kota dipatama limbu lao.
9Iakenna tang untampeangki’ banne PUANGna mintu’ ma’dandan maritik, manassa sangtintimiki’ Sodom, sia baliki’ Gomora.
Keangga’ iatu pengkatobaran anna iatu pemala’
10Perangiimi tu kadanNa PUANG, e kamu tedong pariu’na Sodom; tanannimi talinga tu pepasanNa Kapenombanta, e bangsa Gomora.
11Apara gai’na lako Kaleku tu kabudanna pemala’ pangrere’mi? kadanNa PUANG; nabossaMo’ tu mai pemala’ domba laki ditunu pu’pu’ sia iatu mai lompona anak sapi dipelompoi. Tae’ angKu kaduangi rara sapi laki ba’tu domba, ba’tu bembe’ laki.
12Iake la saekomi umpennoloiNa’, mindara ussuakomi ullese tarampakKu?
13Da’mo mibaa pemala’ naturu’ tang ponno inaa – iatu iannato iamo pangrambu tagari lendu’ Kupomagallinna, mintu’ pa’pakaraya bunga’ sombona bulan sia allo katorroan sia kasitamban ma’gau’ – tae’ angKu ma’tananni penaa tu kakelokan dipasituang pa’maruasan memala’.
14Mintu’ pa’pakarayammi ke bunga’ sombona bulan sia pa’gaurammi nakabiri’ liu penaangku sia Kupomatana’; bo’yokMo’ umpama’tananni penaa.
15Iammi umpatado pala’ mabusammi, la Kupasalaikomi mata; moi umpamakambankomi passambayangmi, tae’ duka angKu la umperangii; belanna limammi umpentombang rara.
16Basei sia seroi tu kalemi; patoyangi dio mai oloKu tu penggauran kadakemi; torei umpogau’ kakadakean.
17Pelada’i umpogau’ kameloan, daka’i tu katonganan, ampangi tu to ma’pakario-rio, pasipatui patunna tu pia biung sia pa’tutuanni tu baine balu.
18Ammi mane male mai ma’tutu Kupaolaikomi salu, kadanNa PUANG, moi anna susi kaseda tu kasalammi, manassa la memmabusa susi ambun makko, moi anna mararang susi karamisi, manassa la memmabussang ten to bulu domba.
19Iake la moraikomi mengkaola sia ma’perangi, manassa la mikande tu bura maelona te padang.
20Apa iake battukkomi sia pabali-bali, manassa la nakandekomi bassi mataran; susimoto tu kada ombo’ dio mai randan pudukNa PUANG.
Diona ukungan la urrampoi Yerusalem
21A’a, umba nakua tu tondok maruru’ namembalimo passulo bongi? Iato pirangbongi’ ponno ia katonganan sia natonangi kamaloloan, anna totemo to papatean mannamo lan.
22Iatu salakamu mentai bassimo, sia iatu uai anggoro’mu dito’bo’mo uai.
23Iatu tedong pariu’mu pabali-balimo sia sibaa to bokomo; pantan ungkaduangi pamengan sia unnanga’ pappe’, tae’ anna pasipatui patunna tu pia biung sia tae’ naperangii kara-karana baine balu.
24Iamoto Nama’kada tu Puang, PUANGna mintu’ ma’dandan maritik, To sumpu kuasanna to Israel Nakua: La umpasauNa’ penaangKu umpapakkanni mintu’ to umbali-baliNa’ sia la Kupabala’i tu mintu’ ualingku.
25La Kupasuleikomi limangKu sia la Kulossokki soda tu tai bassimmu samaseromu tongan sia mintu’ tumarra la kualai dio mai kalemu.
26AngKu ben poleko to ma’paolai salu susito mangka diboko’ sia pa’bisara susito lendu’namo; mangkato ammu disanga pole bamba natonangi kamaloloan sia tondok maruru’.
27Iatu Sion la dirampanan umpotete kamalamburan sia iatu mintu’ to mengkatoba’na tete dio kamaloloan.
28Apa kasanggangan la naappa’ tu mintu’ to patodo tinting sola to umpogau’ kasalan, na iatu mintu’ to untananni boko’ PUANG, la disabu’i.
29La masiri’komi natumang tu mintu’ tarpin mangka mikamali’, sia maila’komi napobua’ tu mintu’ pa’lak pura mipilei langsa’.
30Belanna la butungkomi to kayu tarpin karondonan daunna sia ten to pa’lak tang nailli’ uai.
31Attu iato to mawatang la butung dalame, sia iatu penggauranna sangtinti lelatu, pada la mampu’ pengkaranganna, tae’ misa’ tau umpa’dei.