Dual PanelPASALA’ 24–27 NUBUA’ DIONA KATAMPAKANNA ATTU (PASALA’ 24-27) ;NUBUA’ DIONA KATAMPAKANNA ATTU ;Ukungan urrampoi lino
1Manassa iate lino la Napadaun lauan PUANG, la Nabaliangan sia la Napasisarak-sarak tu mintu’ issinna.
2La Natallanni tu mai to minaa susi dukato tu to buda, sia to ma’kekaunan susi dukato tu kaunan, sia baine to kapua susi dukato tu baine naruranni, sia to ma’baluk susi dukato tu to mangalli, sia to ma’pasuka’ susi dukato tu to massuka’, sia to ma’pedenne’ susi dukato tu to ma’denne’i.
3Iate lino la dipadaun lauan sia la disarrinni, belanna mangkamo Napokada PUANG te kada iate.
4Iatu lipu daenan maru’gunmo sia silayuammo; iatu kuli’na padang makattakmo sia silayuammo; mintu’ to kapua lan tondok silanggarammo.
5Iatu lipu daenan maruttakmo natumang mintu’ to umpa’tondokki, belanna natengkai kalo’mo tu mintu’ sukaran aluk, sia nalutu tombangmo tu apa mangka tipondok, sia naputtai tu basse sangbara’ padang.
6Iamoto anna ampello’i tampak ropu te lino, sia iatu to untongkonni narampoi parri’ natumang kasalanna; iamoto anna mampu’ tu to untongkonni lino, anna sidi’mora tinampe.
7Mintu’ uai anggoro’ maru’gunmo, sia mintu’ garonto’ anggoro’ mala-yumo, mintu’ tu to parannu-rannu sumar-romo.
8Iatu ganda’-ganda’ marua’ radan-mo, sia iatu angnga’ silelean rapa’mo, sia iatu katapi marua’ kappamo.
9Tae’mo anna la mangiru’ anggoro’ tu tau menani, sia iatu tuak mapai’mo nairu’ to biasa unniru’i.
10Iatu kota daun lauan sanggangmo; titutu’ nasangmo tu banua, naurungan tae’mo anna belai tama tu tau.
11Urruk mannamo dio lu lalan, belanna tae’ uai anggoro’; mintu’ kasendean pa’demo; mintu’ la’tek silelean lan lino pu’du’mo.
12Kasanggangan mannamo tu lan tondok iato, sia iatu ba’ba babangan songka tipa’- ramo-ramo.
13Belanna la susi a’ganna te, tu mintu’ bangsa lan lino, kumua butungi to bua saitun di-remba’ sia butungi to bua muru’na anggoro’.
14Iatu to sangpiak padang umpekapuai gamaranna siarrakan; iatu to ma’biring tasik mongngo’-mongngo’ menani umpudi kamala’biranNa PUANG.
15Iamoto pangke’I tu PUANG lan lu tondok napanta’ allo, sia pakala’bi’I dio lu mintu’ biring tasik tu sanganNa PUANG, Kapenombanna to Israel.
16Dio mai randan langi’ kirangi tu pa’pudian, umpakala’bi’ to masallo’. Apa kukua: Sanggangna’, sanggangna’, upu’ alloku! umpogau’mo kakelokan tu to tang maruru’, sia lolangmo lan kakelokanna.
17Katirambanan sia patuang sia poya urrandannikomi, e to untorroi kuli’na padang.
18Belanna la dadi, kumua minda-minda tu umpallaian kalena dio mai ongngo’ mepatiramban, la tobang rokko patuang, na minda-minda tu umbelai kendek diong mai patuang, la nadoloan poya; ondongpi mintu’ kalimbuang dao masuanggana la dibungka’ nasang, sia la tigega’ tu parandangan lino.
19Iatu kuli’na padang sitibangnga-bangnga, iatu kuli’na padang tigega’ sangullele.
20Iatu lino tire’ba len susito malango, tiseno len susito barung-barung pa’bongian, belanna natondon kamabandaranna kasalanna, naurunganni songka, tang nakullemo bangun sule.
21Iato allo iato la Napapakkanni PUANG, tu mintu’ surodadu masuangga dao lu masuanggana sia lako mintu’ datu lino dao kuli’na padang.
22Tau iato mai la dipopa’misa, susito ditarungku lan lo’ko’, sia la dipattang lan pa’tarungkuan, na undinna to ke masaimi, ditambaimi la diukung.
23Attu iato la maila’ tu bulan masero, sia la masiri’ tu allo mapana’, belanna iatu PUANGna mintu’ ma’dandan maritik, la Datu, dao buntu Sion sia dio Yerusalem, sia iatu kamala’biranNa la tonang, dio olona pekaamberanna taunNa.