Dual Panel1Apa totemo, perangii, e Yakub, taungKu, e Israel, tu Kupilei langsa’.
2Nakua kadanNa PUANG, To tumampamu sia To kumombongmu tempon lan mai pa’tambukanna indo’mu, To patunduammu: Da mumataku’, e Yakub, taungKu, sia Yesyurun, tu Kupilei langsa’.
3Belanna aku la umbolloi uai tu be’ko’na sia salu’-salu’ tu kamarangkeanna; la Kupasaruranni PenaangKu tu bati’mu sia rongko’Ku tu lanto mimi’mu.
4La mentaruk dio lu to’ riu, sia susi kanii tuo dio to’ randan salu’-salu’.
5La nakua tu tau iate: Aku te taunNana’ PUANG; iatu tau senga’ la ussangai kalena Yakub, den pole’o tu ussura’i dio limanna, nakua: taunNana’ PUANG sia ungganti kalena Israel.
Diona kamatunanna apa dipa’deatai
6Nakua kadanNa PUANG, Datunna sia Pela’bakna Israel, PUANGna mintu’ ma’dandan maritik: Akumo pamulanna sia ma’katampakanna, nasaliananna Aku, tae’ tu Kapenomban senga’.
7Namindara tu la ussusianNa’ – melo ke napatale’i sia napa’peissananni anna parampoi lako Kaleku – belanna Aku mannari ungkombongi tu tau tempon dio mai; melo ke napatale’i tu apa la dadi undinna.
8Da mitiramban sia mataku’. Tang tempon dioraka mai Kunii umpokadangkomi sia umpaissannikomi? Kamumo tu sa’bingKu: denraka tu Kapenomban senga’ saliananna Aku? Tae’ senga’na tu Buntu batu, tae’ Kutandai tu senga’na.
9Iatu mai to unggaragai rapang-rapang dipodeata, tae’ nasang gai’na sia iatu mai panggaraganna nakamassengi tae’ bua’na: iatu mintu’nato napotanda sa’bi, kumua moi misa’ tae’ natiroi sia moi misa’ tae’ natandai, naurunganni kasirisan tu tau iato.
10Mindara tu unggaragai dipa’deatainna sia umpati’no’ rapang-rapang dipodeata, anna tang la umpabu’tuanni gai’na?
11Manassa la kasirisan tu to umpengkaolai; iatu mai to pandena tolino bangsia; melo ke sirampunni sangke’deran tu tau iato mai, anna soyang sumanga’ sia la kasirisan tu tau iato.
12Iatu pande bassi unnampui uase, sia sila’da’ lan to’ ruaya, untampa rapang-rapang dipodeata unnoyong pepa’tong sia nakombong lima mawatangna, tang mekatopo sia tang mekata’ka’, tang unniru’ uai, naurunganni tang pa’bela.
13Iatu pande kayu unne’te’ bannang, anna gorri’i tu tandana, anna pa’i nakampasu, anna pasusii a’ganna misa’ muane, umparundu’i pantarisan maelona tolino, anna torro lan banua.
14Ullellengan kalena kayu arasi’ sia unnala kayu uru ba’tu jati sia napelobo’i lan lu pangala’ sia untanan kayu buangin maloboran nasakka’i uran.
15Iate mai kayu la natutung tau; naala la napendarang, sia napadukku anna pantunui roti; sia la nagaragai rapang-rapang dipodeata napenombai sia nagaragai rapang-rapang dipodeata dipa’, anna malinguntu’ dio olona.
16Iatu kayu pira napakandei api; napantunui duku’, sia nakande tu mai pa’goreng sadia’na, sia nanii duka mendarang anna ma’kada nakua: Ha malassuna’, kusa’dingmo tu api.
17Iatu torrona nagaragai misa’ dipa’deatainna, iamotu rapang-rapang dipodeatanna tu dipa’, anna malinguntu’ dio olona sia tukku anna penombai, nakua: Tunduina’, belanna kamumo tu deatangku.
18Tae’ kapaissananna sia tangnga’na, belanna sikeppe’ tu matanna, naurunganni tang pakita; sia situtu’ tu mata penaanna, naurunganni tang paissan.
19Moi misa’i tu tau iato tae’ umpalan penaai sia tae’ kapaissananna ba’tu tangnga’na, naurunganni ma’kada, nakua: Iatu kayu pira mangkamo kutunu api, iatu ruayanna kupantunui roti sia kupangrarangi duku’, angku la unggaragairi apa megallian, sia angku la umpenombai tu kayu sanglontok?
20Minda-minda manggaraga au, napapusa penaa dipakena naurunganni tang nakulle ungkarimmanni katuoanna sia tae’ nakullei ma’kada kumua: Tae’ siaraka apa pa’pakena lan lima kananku?
PUANG manna tu Kapenomban
21Kilalai te, e Yakub, e Israel, belanna ikomo taungKu; Akumo ungkombongko, ikomo tu taungKu, e Israel; tae’ angKu kalupai lenko.
22Kusarrinni tu kakadakeammu susi rambu roya sia iatu kasalammu susi salebu’; la suleko lako Kaleku, belanna Akumo tu ullendokangko.
23Kumalasi-lasikomi, e langi’, belanna PUANGmo tu mangka umpogau’i; unnarrakkomi, e to diong mangapi’na tana, rambankomi sikula’dakan, e buntu sia pangala’ sola mintu’ kayu lan, belanna mangkamo Narampanan PUANG, tu Yakub sia umpamala’bi’ Kalena lan Israel.
24Inde sia tu kadanNa PUANG, Pela’bakmu sia To tumampamu tempon lan mai pa’tambukanna indo’mu: Akumo tu PUANG ungkombong nasangi te mintu’na; Aku manna umpalumbangi te langi’; Aku manna umpatungarai te tana kalua’ tete dio kamatotorangKu.
25Akumo tu undampa tanda-tandana to untannun kamo’rangan sia Aku dukamo tu umpatolle mintu’ to pakita-kita; mintu’ to paissan Kupamaling sia iatu kapaissananna baga.
26Akumo umpasundunni tu kadanna taungKu sia umpalanda’i tu apa napa’peissanan dolomo sumbungan pudukKu; Akumo tu ma’kada lako Yerusalem kumua: La napa’tondokkipoko tau, na lako mintu’ kota Yehuda: La dibangun polekomi, sia mintu’ tembo’ ro’pokmi la Kupabendan sule.
27Akumo tu ma’kada lako malikunna, kumua: Mandalle’ko, sia mintu’ salummu la Kupamarangke.
28Kukua lako Koresh: Kupotomanglaako, la naturu’ duka tu mintu’ pa’poraiangKu, belanna nakua lako Yerusalem: La dibangunko sule sia la diparandanganni tu Banua Kabusungan.