Dual PanelDiona apa ba’ru dipa’peissanan
1Perangii te, e bati’na Yakub, tu ungganti kalena Israel, sia tu bu’tu lan mai kalimbuangna Yehuda, umposumpa sanganNa PUANG sia ungkatonganni Kapenombanna to Israel, – apa tae’ nasituang kamanapparan sia kamaloloas-
2ondongpi ungganti kalena kota maindan tu tau iato mai sia sande’ lako Kapenombanna to Israel; tu digente’ PUANGna mintu’ ma’dandan maritik.
3Iatu apa lendu’mo Kupa’peisanan dolomo lako kalemu, tu sun dio randan pudukKu sia Kupa’perangian lako kalemu; ta’pa Kupogau’ anna dadi.
4Belanna Kuissan, kumua matoroko sia iatu sokkongmu susi bassi kalebu sia iatu kidemu sangtinti tambaga,
5iamoto angKu pokada doloi lako kalemu sia Kupa’perangian tonna tae’pa nadadi, da muma’kada undinna, kumua: Kupa’deatainna umpogau’i tu mintu’ apa iato sia rapang-rapang dipodeata dipa’ku ba’tu rapang-rapang dipodeata dipati’no’ku umpa’pesuanni tu apa iato.
6Murangimo tu iannato; tiro meloi tu mintu’nato; tae’raka misipatu la ungkatonganni, kumua tongannate? Randuk totemo la Kuparangiiko tu apa ba’ru, iamotu mai rasia tu tae’pa muissanni.
7Mane totemori nadipaden, tae’ natempon dio mai, sia sae lako te allo iate tae’pa ammu rangi lenni, dikua da muma’kada kumua: Kuissanmo.
8Inang tae’pa murangi lenni sia tae’pa muissan lenni, sia dolona tae’pa naparangi len tu talingammu, belanna Kuissan kumua tang maruru’ tonganko sia nagente’ko tau to palutu tombang tempon lan mai pa’tambukanna indo’mu.
9Tete dio sangangKu angKu temme’pi tu ara’Ku sia diona kadipudiangKu angKu ta’tanpi tu Kaleku belanna mupomelona, dikua da angKu pisanniko.
10Kusa’pomoko, apa tang susi ussa’po salaka; Kusudimoko lan panglallangan kamaparrisan.
11Tu belanna Akuri, ondongpi tu belanna Akuri, angKu pogau’i tu iannato moi umba nakua tu panglangdo; iatu kadipangkerangKu tae’ angKu eloranni lako to senga’.
PUANG urrampanan to Israel
12PerangiiNa’, e Yakub, e Israel, to Kutambai, Aku bangsiamoto, Akumo tu pamulanna, Aku dukamo tu ma’katampakanna.
13Sia limangKu duka mangka umparandanganni tu lino sia lima kanangKu umpalumbangi tu mai langi’, iake Kutambai, ma’dio ren nasangmi.
14Sipulung nasangkomi ammi perangii. Mindari tu tau iato mai tu mangka umpa’peissananni te mintu’ apa iate? Iatu to Nakamasei PUANG, iamo la umpogau’ pa’poraianNa PUANG lako to Babel sia umpa’pekitanan kuasanNa lako to Kasdim.
15Aku, Akumo tu mangka ma’kada, Aku bangsiamo tu untambai; Akumo tu umpasaei sia umpamaupa’i tu lalanna.
16Mengkareke’komi sola nasang lako Kaleku, ammi perangii te: Inang tae’ Kubuni tu apa Kupokada tempon dio mai; iatonna dadi to mai inang denMo’. Totemo Nasuana’ Puangta PUANG sola PenaanNa;
17Nakua kadanNa PUANG, Pela’bakmu, To maserona to Israel, nakua: Akumote tu PUANG, Kapenombammu, tu nenne’ umpatuduko, kumua ammu maupa’, sia Aku duka urrendenko lako lalan sipatu muolai.
18Iakemmu la umperangii tu mintu’ pepasanKu, manassa iatu kamarampasammu susito salu sia iatu kamaloloammu butung to bombang tasik;
19sia iatu bati’mu la susi karangan sia tarukmu la sangtinti bungin; tae’ anna la diputtai tu sanganna ba’tu dipisanni dio oloKu.
20Tassu’komi lan mai Babel, mallaikomi dio mai to Kasdim; sikumalasilasiangkomi umpa’peissananni, sia umpa’perangianni sia umpatale’i sae lako randan langi’, kumua: Narampanammo PUANG tu Yakub, taunNa.
21Tang mekama’rang tu tau iato mai tonNa solanni unnola padang aak; Napalolongan uai lan mai buntu batu; Napiak tu buntu batu anna lolong uai lan mai.
22Iatu to tang mekaaluk, tae’ kamarampasanna, kadanNa PUANG.