Dual Panel1Aa, kemMi bangngai tu mintu’ langi’, amMi songlo’, anna tigega’ tu mintu’ buntu dio oloMi,
2susi api undukkui ranga’-ranga’ sia ten to api umpopa’kalimbuang uai la umpa’peissananni tu sangamMi lako mintu’ ualimMi, kumua anna ma’parondo mintu’ bangsa dio oloMi,
3belanna Mipaden tu penggauran metakuran tu tae’ kikapangi; kemMi songlo’, anna tigega’ tu mintu’ buntu dio oloMi.
4Tempon dio mai tae’ anna rangi lenni tau ba’tu tama talinga sia tae’ natiroi mata tu misa’ Kapenomban senga’ anna Kamu, tu sae umpalalao pa’tunduan lako to untayanNi.
5Mitammui tu to sende penaanna umpogau’ kamaloloan, iamotu mintu’ tau ungkilalaiKomi dio lu mintu’ lalanMi. Manassa sengkeKomi, belanna palutu tombangmokan sia tontong bangkanni lan a’gan iato; iake susito, la tilendok siarakannika?
6Kami sola nasang dadimokanni susito maruttak sia mintu’ kamaloloangki susito sanglamba’ sampin masarepa; iamoto angki rondon susi daun kayu sia nabaakan kakadakeangki susito napentiaran angin.
7Sia tae’mo misa’ tu to ussa’bu’ sangamMi sia umpamukkun kalena la la’ka’ lako Kalemi; belanna Mibuniangkan tu lindoMi, sia Mipopa’elo’nakan lako kuasanna mintu’ kakadakeangki.
8Apa totemo, o PUANG, Kamumo tu Ambe’ki; pitti’kan te, na Kamu tu To tumampaki, sia kami sola nasang panggaraga limamMikanni.
9O PUANG, da Misengke tarru’ bang sia da Mitontong ungkilalai tu kakadakeangki. Tiromi sia mantami: kami sola nasang te, taumMi.
10Iatu kota maindanMi mempadang aakmo, ia duka tu Sion mempadang aakmo sia iatu Yerusalem kariuammo.
11Iatu banua maindanki sia mala’bi’ tu nanii nene’ to doloki umpudi-pudiKomi, puramo naballa api sia mintu’ apa keangga’ki daun lauan nasangmo.
12O PUANG, la Mima’tanan bangraka penaa te mintu’ apa iate? Ma’apai amMi la ma’pakappa’ bang sia la umpopengkadiongan tarru’ bangkan?