Dual PanelKasalanna sia unkunganna Akhan Kaditaloanna to Israel dio Ai
1Apa nalendai to Israel tu parenta diona apa dipemalii, belanna iatu Akhan, anakna Karmi, anakna Zabdi, anakna Zerah, dio mai suku Yehuda, unnalamo apa dipemalii. Iamoto nare’dek ara’Na PUANG lako to Israel.
2Nasuami Yosua tu ba’tu pira-pira tau dio mai Yerikho lako Ai, tu sikandappi’ Bet-Awen, rampe matallona Betel, sia ma’kada lako, nakua: Malekomi usserre’i tu tondok iato. Malemi tu tau iato usserre’i Ai.
3Sulemi tu tau iato lako Yosua anna ma’kada lako, nakua: Da namale nasang te mintu’ tau lako, sangadinna agi-agi bangmo duangsa’bu ba’tu tallungsa’bu tau male untalo Ai; da nadita’ka’i tu mintu’ tau male lumingka lako, belanna iatu to dio sidi’ri.
4Iamoto ke’de’mi dio mai tu bangsa iato agi-agi tallungsa’bu tau; apa mallai tu tau iato mai dio mai tingayona to Ai.
5Belanna napatei to Ai agi-agi tallungpulo nnannan tu tau iato mai sia naula’, dio salian babangan sae lako patuang dinii umpa’ batu sia natalo dio se’pon tanete. Attu iato raangmo penaanna tu bangsa iato, sia pa’de’ deatamo.
6Naserek-serekmi Yosua tu pakeanna, anna lumbang rokko padang dio tingayo pattinNa PUANG sae lako makaroeanna, la ia la mintu’ pekaamberanna to Israel, sia naambo’i barra’-barra’ tu ulunna.
7Ma’kadami Yosua nakua: O Puangki PUANG, ma’apai Misuai te bangsa iate ullambanni Yordan. Mikuaraka kidisorong tama limanna to Amori, kiurunganni sanggang? A’a, melo kengki popa’ga’taran bangmi torro sambalinna lu Yordan!
8O Puang, apapara la kupokada namemboko’mo tu to Israel dio mai ualinna?
9Ianna rangi to Kanaan sia mintu’ to lan tondok iate, manassa la napatama limbukan sia naputtai tu sangangki dao mai kuli’na padang. Na apamora la Mipogauranni tu sanga pasareongamMi?
10Ma’kadami PUANG lako Yosua, Nakua: Ke’de’ko; ma’apari mulumbang susito?
11Umpogau’mo kasalan tu to Israel sia nalendaimo tu pangallu’Ku, tu Kupasan lako kalena, sia naala dukamo tu apa dipemalii, sia naboko duka, sia napasola bunimo pareanan banuanna.
12Iamoto natae’ naattai tu to Israel bendan unnea ualinna, memboko’mo dio mai ualinna, belanna pepayuammo. Iake tae’i misabu’i tu pepayu dio lu kalemi, tae’mo Kula urrondongkomi.
13Ke’de’moko, mupamaseroi te bangsa iate, sia la mukua: Pamaseroi tu kalemi sae lako masiang, belanna inde sia tu kadanNa PUANG, Kapenombanna to Israel, Nakua: Den tu pepayu dio lu kalemi, e to Israel, iamoto natae’ muattai bendan unnea ualimmu, ke tae’pi mipatoyangi dolo dio mai kalemi tu pepayu.
14Iamoto ianna melambi’ la saekomi mennolo situru’ mintu’ sukummi, na iatu suku Nadullu PUANG la mennolo situru’ mintu’ pa’rapuanna na iatu pa’rapuan Nadullu PUANG la mennolo situru’ rapunna, na iatu rapu Nadullu PUANG la mennolo tu mintu’ muane.
15Na iatu to didullu ullendai tu atoran dipemalinna la diballa api la ia la mintu’ tu apanna, belanna nalendai tu basseNa PUANG sia napogau’ tu kabagan megi’giran lan lu Israel.
16Iatonna tibangka’mo masiang nasuami Yosua tu to Israel sae mennolo situru’ sukunna, na suku Yehuda nakanna.
17Nasuai tu pa’rapuanna Yehuda sae mennolo, na pa’rapuanna Zerah Nadullu Puang, na iatonna suai tu mintu’ muane dio mai pa’rapuanna Zerah sae mennolo, Zabdi nakanna.
18Nasuai tu mintu’ muane dio mai rapunna, sae mennolo, na Akhan nakanna, anakna Karmi, anakna Zabdi, anakna Zerah, dio mai suku Yehuda.
19Ma’kadami tu Yosua lako Akhan, nakua: E anakku, pangke’i tu PUANG, Kapenombanna to Israel, ammu mangaku lako; pokadanna’ tu apa mupogau’, da mubunianna’.
20Mebalimi tu Akhan lako Yosua, nakua: Tonganna akumo tu umpogau’ kasalan lako PUANG, Kapenombanna to Israel, belanna susite tu penggaurangku:
21Belanna kutiro lan to apa dirampa sanglamba’ bayu lamba’ Sinear, lendu’ melona, sia dua ratu’ sikele’ salaka sia sanglongki’ bulaan, tu limangpulo sikele’ magasanna, kukamoraimi, angku alai. Mintu’na to kubuni diong padang lan tangnga-tangnga tendaku sia iatu salakana diongna lu.
22Nasuami Yosua tu pesua male lako tenda, anna tikara male; na iatu apa iato dibuni lan tendana, sia iatu salaka diongna lu.
23Naala nasangmi tau lan mai tendana, nabaai lako Yosua sia mintu’ to Israel, nabarrakan dio oloNa PUANG.
24Mangkato naalami Yosua sia mintu’ to Israel tu Akhan, anakna Zerah, sia iatu salaka sia bayu lamba’ sia bulaan sanglongki’ sia iatu mintu’ anakna muane sia anakna baine, sia mintu’ sapinna sia keledainna sia dombana sia bembe’na sia tendana sia mintu’ tu apa dio kalena, anna baai tau iato mai rokko lombok Akhor.
25Ma’kadami tu Yosua, nakua: Susitu kami muparampoi kamandasan susi dukato la Naparampoiko PUANG kamandasan allo iate. Nasileba’-leba’imi batu mintu’ to Israel, sia naballa api, namane ullolinni batu dao.
26Mangkato napabendannimi tau misa’ tombonan batu daona lu, tu tontong sae lako allo iate. Namane PUANG umparapa’i tu kare’dekanna ara’Na. Iamoto nasangai tau tu inan iato lombok Akhor sae lako allo iate.