Alkitab Mobile SABDA
[VER] : [TORAJA]     [PL]  [PB] 
 <<  Yosua 8 >> 

Kota Ai disanggangi

1Ta’kala ma’kadami tu PUANG lako Yosua, Nakua: Da mumataku’ sia da mutiramban! Solanni tu mintu’ surodadu, ammu ke’de’ ullaoi Ai. Manassa la Kusorong tama limammu tu datu Ai, sia mintu’ taunna sia kotana sia tondokna.

2La mupogau’ lako Ai sia lako datunna, susitu mangka mupogau’ lako Yerikho sola datunna; sangadinna iatu mintu’ pangrampa sia mintu’ sapi sola domba sia bembe’ ma’din miala. Melo ke mupannii ba’tu pira-pira to mangamu’ dio boko’na tu kota iato.

3Ke’de’mi tu Yosua sola mintu’ surodadu anna male lako Ai. Napileimi Yosua tallungpulo sa’bunna tu surodadu lalong, nasuai tonna mabongi,

4anna mepasan, nakua: Manassa la miodo’ tu kota ammi laoi dio mai boko’, da mitarru’ mambela dio mai kota sia la sakka’ nasangkomi.

5Na aku sola mintu’ to kusolan urreke’i tu kota. Ianna tassu’ tu tau la urrapaikanni, susito dolona, la mallaikanni dio mai tingayona.

6La tassu’ tu tau iato mai la unnula’kanni, kiurunganni umpasisarakki kotana, belanna la natangnga’ tau iato mai, kumua: mallaimo tu tau iato dio mai tingayota susito dolona. Iake mallaimokanni dio mai tingayona,

7attu iato la tassu’komi lan mai inan pangamurammi, ammi taloi tu kota, belanna PUANG, Kapenombammi, la ussorongi tama limammi.

8Iammi mangkamo untaloi tu kota iato, la miballa; la mipogau’ tu iannato susi kadanNa PUANG; manassa iamote tu pepasanku lako kalemi.

9Mangkato nasuami Yosua male tu tau iato mai lako to’ naninna mangamu’, anna torro dio kasiallaranna Betel na Ai, rampe matampu’na Ai. Apa iatu Yosua torro dio lu to’ to buda to bongi iato.

10Iatonna tibangka’mo masiang naparessami Yosua tu surodadu, anna male ullaoi to Ai undoloan mintu’ to buda la ia la mintu’ pekaamberan to Israel.

11Ia duka tu mintu’ surodadu nasolan, male anna reke’i sae lako sitingoan kota sia ma’tenda rampe daanna lu Ai, naurungan den misa’ lombok nasialla’i tau iato mai na Ai.

12Naalami tu surodadu agi-agi limangsa’bu nasuai mangamu’ dio kasiallaranna Betel na Ai, rampe matampu’na kota.

13Naato’ susimoto tu mintu’ to buda, naurunganni iatu mintu’ surodadu rampe lu rekkena kota sia iatu to dio boko’na rampe matampu’na kota. Apa iatu Yosua ullendu’i lombok to bongi ia dukato.

14Iatonna tiromi datu Ai, tassu’mi sasa-sasa tu to lan kota tonna tibangka’ masiang untammui to Israel la sirari, la ia la mintu’ taunna lako to’ kasirampunan sitingoan rante; belanna tae’ naissanni kumua den to mangamu’ dipadio boko’ kota.

15Naangga’imi Yosua sia mintu’ to Israel natalo ualinna, anna mallai ma’palulako padang pangallaran.

16Iamoto ditambaimi tu mintu’ tau lanpa kota, anna pada unnula’i tu tau iato; iatonna marassan unnula’i tu Yosua, dipasisarakmi kota.

17Moi misa’ tau tae’mo torro lan Ai ba’tu lan Betel, tassu’ nasangmo la unnula’ to Israel, napopa’elo’nai tu kota tibungka’ dio boko’, tonna marassan male unnula’ to Israel.

18Attu iato ma’kadami tu PUANG lako Yosua, Nakua: Angka’i tu doke lan limammu mupatingo lakoi Ai, belanna Kusorongmo tama limammu. Naangka’mi Yosua tu doke lan limanna mentingo lako kota.

19Iatonna angka’mi tu doke iato madomi’mi ke’de’ tu tau lan mai to’ pangamuranna, ma’dondo-dondo sae mengkareke’, natama kota tu tau iato, nataloi sia madoi’ naballa.

20Iatonna messaile tu mintu’ to Ai sia mentiro, mangngami, iatu rambu kota te’dek langngan langi’, sia tae’mo lalan la naola sule lako ba’tu lu dio mai, belanna iatu surodadu mallai lako padang pangallaran tibalikmo sule la unneai tu to mangula’.

21Iatonna tiromi Yosua sia mintu’ to Israel, kumua iatu to mangamu’ untalomo kota sia te’dekmo langngan tu rambu kota, nasuleammi anna taloi tu to Ai.

22Iatu to tamamo kota tassu’ urrapai tu tau iato mai, naurunganni iatu to Ai naparitangnga to Israel, den rampe diona lu den rampe indena mai, anna patei tu to Ai, na moi misa’ tau tae’mo torro, tu mallai ba’tu ullendokan kalena.

23Apa iatu datu Ai natingkan tuo, anna baai lako Yosua.

24Iatonna mangkamo to Israel umpatei tu mintu’ pa’tondokan Ai dio lu padang sia dio lu padang pangallaran, tu nanii unnula’i tu tau iato mai, sia iatonna songka nasangmo nakande pa’dang, namoi misa’ tae’mo tuo, sule nasangmi tu to Israel lako Ai, napatei pa’dang tu mintu’ tau lan.

25Iatu mintu’ to tibambang mate allo iato la muane la baine den sangpulo dua sa’bu, mintu’nato pa’tondokan Ai.

26Tae’ nakondoranni Yosua tu limanna, tu naangka’ untoe doke sae lako puranna nasabu’i tu mintu’ pa’tondokan Ai.

27Apa mintu’ sapi sia domba sia bembe’ sia mintu’ apa dirampana kota iato, naala to Israel susi kadanNa PUANG tu mangka Napasanan Yosua.

28Naballami Yosua tu Ai, napadaun lauan sae lakona sia napopempadang talo sae lako allo iate.

29Natoke’i tu datu Ai lako misa’ lentong; iatonna la lambunmo allo, mesuami Yosua unnalai tu batang rabukna dio mai lentong, anna pembassananni sikandappi’ to’ babangan kota; mangkato napabendannimi tau misa’ tombonan batu dao, tu dio sia, sae lako allo iate.

Inan pemalaran dao buntu Ebal; Yosua umbasan Sukaran aluk to Israel

30Napabendanammi Yosua misa’ inan pemalaran tu PUANG, Kapenombanna to Israel, dao buntu Ebal,

31susitu napasan Musa, taunNa PUANG, lako to Israel, situru’ tu apa disura’ lan sura’ Sukaran alukna Musa; iamotu misa’ inan pemalaran dio mai batu tang dipa’, tu tae’pa nadiparumbui bassi lako. Dao inan pemalaran iato dinii umpemalaran pemala’ ditunu pu’pu’ lako PUANG sia untunu pemala’ kasalamaran.

32Indeto dio napallemba’ lako batu tu sukaran alukna Musa, tu nasura’ dio tingayona mintu’ to Israel.

33Mintu’ to Israel sola mintu’ pekaamberanna sia mintu’ pangulunna sia to ma’paolainna salu bendan nasang dio kanan kairinna patti, sitingoan mintu’ to minaa to Lewi, tu umbulle patti basseNa PUANG, la to sae la pa’tondokan; iatu sesena sitingngoan tanete Gerizim sia sesena sitingoan tanete Ebal, susitu napepasanan Musa, taunNa PUANG, dolona, la umpassakke to Israel.

34Mangkato nabasami tu mintu’ kada Sukaran aluk, iamo tu kamauparan sia tampak ropu, susitu mintu’ apa disura’ lan sura’ Sukaran aluk.

35Dio mai mintu’na kada tu napepasanan Musa, moi sangbuku kada tae’ tu tang nabasa Yosua lako mintu’ kombongan to Israel, sola mintu’ baine sia pia sia to sae tu male sola tau iato mai.


  Share Facebook  |  Share Twitter

 <<  Yosua 8 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran