Dual PanelLa diputtai tu mintu’ kamenomban lako deata sia pa’nubua’ tang tongan
1Allo iato la tibungka’ tu misa’ kalimbuang lako bati’na Daud sia to lan Yerusalem la umbasei sia usseroi kasalan.
2Sia allo iato, kadanNa PUANGna mintu’ ma’dandan maritik, la Kuputtai tu sanga dipa’deatainna lan mai tondok iato, naurunganni tae’ lenmo nala ungkilalai tau iato mai; sia ia duka tu mintu’ nabi sia penaa bulituk la Kupa’dei lan mai tondok.
3Ianna denpa misa’ tau ma’nubua’, manassa iatu ambe’na sia indo’na, tu undadianni, la ma’kada lako nakua: Tae’mo mula tuo, belanna mangkamoko ma’kada tang tongan tete dio sanganNa PUANG; ondongpi iatu ambe’na sia indo’na, tu undadianni, la untobokki, ke ma’nubua’i.
4Allo iato iatu mintu’ nabi pantan la masiri’, diona mintu’ patiro mendeatanna, ke ma’nubua’i, sia tae’mo nala ma’bayu lamba’ kebulu la ma’kada tang tongan.
5Sangadinna pantan la ma’kada nakua: Tae’ aku kumisa’ nabi te, aku te misa’na’ to mukkun padang, belanna bitti’pa’ naallimo’ tau.
6Sia iake ma’kadai tau lako nakua: Ma’apari tu mintu’ bangke dio alla’ takia’mu? la mebali nakua: Iatu iannato, belanna dibambana’ lan banuanna sangmaneku.
Iatu to mangkambi’ dibamba natisambo’ mallai tu pangkambi’na
7E pa’dang tinonokko, ta’pai tu to mangkambi’Ku ta’pai tu muane marengke’Ku, kadanNa PUANGna mintu’ ma’dandan maritik; ba’tai tu to mangkambi’, naurunganni sisarak-sarak tu domba; sia la Kubalik tu limangKu unta’pai tu bitti’na.
8Lan lu mintu’ tondok, kadanNa PUANG, duang taanna tu la disabu’i sia la ka’tu sunga’na, apa iatu sangtaanna la torro lan tondok.
9Iatu taa tallunna to, la Kupatama api, sia la Kupakombong susito salaka napakombong tau, ondongpi la kusudi, susito bulaan nasudi tau. La nasa’bu’ tau iato mai tu sangangKu sia la Kuperangii. La ma’kadaNa’ Kukua: Iatu tau iato mai taungKu sia ma’kada duka tu tau iato mai nakua: Iatu PUANG iamo Kapenombangku.