Dual Panel1Nori, hit fano wereg lit turuk lamuhup ane fahet Allahn fano puhuwen niren tam hiyag hisarukmu holtikip. Ketiya fano roho welahep angge famen nin anggolo sebe roho yami ruruk lamuhuben nit Nonowe Yesus alukema wereg lit nenele ine roho komo heneptuk lahe.
2Niren Nonowe Yesus unuk uruk lit hit fano roho welamuhup ulug komo heneptuk latukuk ane honoluk.
3Allahn hit fahet peruk ane Numalikisi fano ane turuk lamuhup peruk lit werehen pabi ane til noruk lamuhup fug.
4Hit wal tanehen hunuhesi wal taneg hilaruk lit Allahn fano puhuwen honorohole seleg toho it men henele fano roho uruk lit inindi fanowap eneptuk lamuhup.
5Ap Allah unuk enepeleg inaben unuwali inahanen turuk hag toho hiren oho turuk lamuhup fug.
6Honori unuhesi umung eneptuk lit henele si ane tihi fug ulug enele ying eneptuk lam fug. Ap san siyag ane turuk halug Ninikni Allahn alem angginon ubam umbuhu ulug tam hiyag hisarukuk hag toho ketiya oho hiyag hisaruk lahe.
7Niren siyag ane turuk lamag ulug Allahn wol neneptisi fug, Allah olohotman fano ane turuk lamag ulug wol neneptisi.
8Ap san ihi ane aru apmayap turuk halug ap kinangmon apmayap turuk eleg, Ninikni Allah ahime fanowon hunubam emberisiyon ino apmayap turuk.
9Hit-hit hinindi roho welamuhup ulug Allah inggarehen milal heneptisimu anden alem ari fahet hahatmin fug.
10Hiren honori Allah umalikisi o Makedonia kinang fam werehon obog toho ler eneptuk lit hinindi enesug ane noluk atisi. Noluk atisi angge famen hininggik ine roho seneg lit nin sebe roho anggolo turuk lamuhup ulug komo heneptuk lahe.
11Henebe yuwag toho wereg lit ap winonen turuk ane pen isa fug angge hininggarehen tohon yami ruruk lamuhup. Niren tam komo heneptukuk hag toho hininggareg hininggik fam turuk lamuhup.
12Hininggareg hininggik famen tuk fug angge ap winonen og nisalusa ulug onggot-onggor ane turuk lamuhup fugmu Allah wene enepeleg inaben yet hisahupteg hit fahet fano puhup.
13Nori, ap tam war atuson unubam aruhu ane fahet hit henepeleg toho welamuhup ari ninirim. Ap winonen fobik fanowap nenebuhu ane enepelehen enehummu siyag atuk hag toho hir oho henehummu siyag amuhup tohon ulug tot hiyag husul.
14Niren Yesus war atfareg Oluk atfag ane fahet wenggel haruk lahe. Ari hag toho Yesus fam wenggel haruk latusa inap war atuson arimano Allahn An men mangno roho welamuhuk ulug Yesus men palu enebuhuwon fahet tem toho wenggel haruk lahe.
15Nonowe inggarehen hiyag nisarisi ane hiyag husulon te tu: Nonowe Yesus waruhu sambil it tam war atuson fobik amuhupmu nit nonoluk welamuhukon tam amuhuk fug.
16Nonowe Yesus poholman wambik waruhu sambil ino komo eneptukon ele humon misig urukmu malaikat onowe suwon ekeyen oho ele urukmu Allah ambinggong eke kong turuk laruhu. Kong turuk laruhumu Kristus fam wenggel haruk latusa inap war atuson arimano tam onoluk amuhup.
17Onoluk amuhupmu nit nonoluk wereg lit alindik toho welaheyon oho it men ambiyeg hina feneyen Nonowe men salkal ukag ulug Allahn lisoho og nenebuhu. Og nenebuhumu Nonowe men mondabi ambiyeg welamuhuk.
18Ihi ane ari wenggel haruk lit hit-hit onggon-onggon atuk lamuhup.