Dual Panel1"Ap sa Allah umalikisi ikni roho fer enesug laruhuk peruk lit wereg ahun inowen yabuk fano anggolowon seneruhuk peruk laruhu," ulug aben uruk ane ari tem toho uruk.
2Ap Allah umalikisi ikni roho fer enesug lit welaruhuwon ino re at fahet abug uruk elehon, uhe misig werehon, indi imbik wamburukon, fuki roho wenggel harukon, indi wirik toho werehon, ap pohon unubam fano ane turukon, ele seleg toho urukon eneg welam teg.
3Ap inowen ik olokon nalug turuk hag toho turuk laruhu fug, olok ane puk fug angge indi wiyig toho werehon, ap hili roho werehon mangno atukon, uang fahet nikni peruk elehon eneg welam teg.
4Ap ino uhe malik men fano werehon umalikisi enesukun fano roho turuk lit nele holtuk lamuhup ulug komo eneptukon inowen Allah umalikisi sen enesug laruhu.
5Ap ino uhe umalik komo eleg angge wereg halug Allah umalikisi nangginoho fer enesug lam teg?
6Ap ket eneg wene holtukon Allah umalikisi fer enesug lit halug awelwel tarukmu Iblisen siyahap tuhu rohon Allah umalikisi ikni roho welaruhu fug.
7Wene holtuk eleg inaben ap ino fahet holuhupteg fano puhup. Fano puk fug angge abug uhupmu Iblisen yebangge reg ambeg luhur aruhu rohon.
8Uang Allah fahet emberukon arimano foroho inap fahet tu imin: Inindi wirik toho werehon, enembilik piren toho uruk elehon, ik olokon nalug turuk inap hag toho turuk elehon, mun angge man angge fahet enesehet teg elehon eneg in amuhup.
9Allah wene fag toho hiyag isarisiyon it arimanowen inindimu fano roho foroho lamuhup.
10In enebuhup inap arimano unubabut tam yer isalug aben fano peruk halug unduhuk feseruk lamuhup.
11Unuhesi oho inindi wirik toho wereg lit sibiling-sibiling ane uk fug angge inindi imbik wamburuk lit fano werehen iren turuk ane fahet aben fano peruk lamuhup.
12Uang Allah fahet emberukon foroho inap arimano uhe misig og talug lit uhe umalikisi men fano roho wereg lamuhup.
13Uang Allah fahet emberukon arimano indi wirik toho foroho lit weregma aben yet hahupteg fano puhupmu at inowen Kristus fam tem toho peruk lahi ulug ele ine roho ap hiyag isaruk laruhu.
14Folo-folo hambeg pen hiya waruhuk angge famen ihiyon obog toho aru suwesingga fam tam emberuk lahi.
15Amusun toho welatug waruhuk halug suwesingga imbihiyon ari fam Allah ibam nangginoho foroho lamuhup ulug holuk toho welaruhun. Allah ibam uruk lahiyon ari Allah oluk werehon ino helep ubule hag toho o uwag hag toho weregma umalikisi at apma fano welamuhup.
16Wene nit uruk laheyon Allahn map toho foroho latfahon ketiya fag toho hiyag nisarisi ane aru uruk lahe: At ino ap kinangmon atfareg inam atfagma Allah hime fanowon fam fanowap tibag. Malaikat iniline oho ebenam atfagma o pumbuk Allah unuk enepeleg ambeg oho At fahet hiyag isaruk lit ap kinangmonen At fahet tem toho perusama At wel tuhup ulug Allahn fanoma unduhuk fibag.