Dual Panel1Numalikisi, hiren siyag ane tehep ha nowen alem tu suwesingga aru fam haharoho emberuk lahi. Ari reg angge famen ap misihen siyag ane turuk halug Nonowe Yesus Kristus pikir ane turukon inowen ninibil atuk lit Allah alukeman ili og nenebuhu.
2Niren siyag ane turuk laheyon fahet At ayeg waroho watfagma niren turuk ane Allahn apmayap tibag. Apmayap tibag ane ari niren turuk lahe ane eneg apmayap tibag fug, ap obog toho kinangma werehonen siyag ane turukon apmayap tibag.
3Allahn komo neneptuk ane fano holtuk lahema At fahet nonoluk atuk ane inam atuk.
4Ap san, "Allah noluk nahun welahi," uruk angge famen komo neneptuk ane fano holtuk eleg halug at ino tem toho peruk ane indimu alem yaho elehen ele si ane uruk.
5Ap san Allahn ele urukon hikit toho turuk halug at inowen Allah fahet indi anggolo haruk lit wereg. Ari roho turuk ane ariyen Allah men sebe roho welahe ane inam atuk.
6Ap san Allah men sebe roho welahi uruk ahun inowen aren oho Kristusen turuk latfag ane hikit toho turuk laruhu.
7Nindi henesug lahiyon nori, komo heneptuk ane alem keron haharoho emberuk lahi fug, komo heneptuk ane tam holtikibon ino fahet uruk lahi. Ihi ane ari Allah wene atam holtikibon ino fahet uruk lahi.
8Ari reg angge famen komo heneptuk lahi ane aru keron hag toho emberuk lahi. Ketiya emberuk lahiyon aru Nonowe Kristus inowen fano peruken hit sehelimuwen teko lahu ane fahet emberuk lahi. Hik teg ambeg welatukuk angge famen sakan atisimu o seleg fanowon ino fam welahe.
9Ap san seleg tegma welahi uruk angge famen are fahet nirim peruk halug at ino o hik teg ambeg weregman eneg wereg.
10Ap san are fahet indi roho wereg halug at ino ketiya oho seleg tegma wereg. At inowen ap winon inindi nonghongap eneptuk eleg.
11Ap san are fahet nirim peruk halug at ino hik teg ambeg wereg. Hik teg ambeg ino wereg lit il hik tehen ke kemane lamin ulug indi nonghong uruk lit wereg.
12Numalikisi, siyag ane turuk lahebon Kristus inowen elehap turuk lit Ambolma embeserisi ulug suwesingga aru emberuk lahi.
13Iniknisi welahebon nori, wal tibag sambil welatfag Ahun ino fahet honoluk toho welahepma suwesingga aru emberuk lahi. Hit kabiniyon nori, siyahon ino apmaya feserikipmu suwesingga aru hit fahet emberuk lahi.
14Numalikisi, Ninikni fahet honoluk atisimu suwesingga aru hit fahet emberuk lahi. Iniknisi welahebon nori, wal tibag sambil welatfag Ahun ino fahet honoluk toho welahepma suwesingga aru emberuk lahi. Hit kabiniyon nori, hit hinine reg lit wene fanowon hinindimu weregma siyahon ino apmaya feserikipmu suwesingga aru hit fahet emberuk lahi.
15Mun angge man angge kinangma wereg angge fahet hinindi ha fug. Ap misihen kinangma wereg angge fahet indi haruk halug at inowen Ninikni indi haruk eleg.
16Mun angge man angge kinangma wereg angge Ninikniyen peruk elehon tu imin: Ap inindimuwen tila peruk ane men inil fam yet halug nangge lalep perukon men unubabut wereg ane hemet turukon men alem obog toho aru Ninikniyen peruk elehon kinangman inam atuk.
17Mun ane man ane aben tila peruk ane kinangma werehon eleg aruhu angge famen Allahn peruk ane hikit toho turukon ino mondabi weregman eneg welaruhu.
18Numalikisi, nit ketiya welaheyon obog aruhu li horog toho welahe. Kristus men seli roho werehon tam waruhu ulug hiyag hisarukmu holtikibon ino ketiya waharuk. Kristus men seli roho werehon arimano ketiya anggolo inam atuk. Inam atuk ane ariyen obog aruhu li horog atuk ulug ninindi anggar atuk.
19Kristus men seli roho werehon arimano nit sehelimu welatusa angge famen it arimano nit nonori hag toho welatusa fug. Nit nonori hag toho welalepma nit men mangno roho welala. Ap obog toho nit men ambiyeg welaheyon arimano winon nonori hag toho wereg eleg ane ari ketiya seleg atuk.
20Nonowe Yesus Kristus inowen Allah hime fanowon hit og hisarisimu hit obog toho At fahet honoluk atisi.
21Tem toho uruk ane hit henepeleg ulug anden suwesingga aru emberuk lahi fug, honoluk teg lahep ulug emberuk lahi. Tem toho uruk ane inowen si ane urukon wilip am fug teg ane ari hit honoluk.
22Ele si ane urukon ino ap sa hag toho wereg? Allahn fanowap henebuhuwon misig monde fuhuk ulug sali ibahon ino Yesus fahet ibag fug ulug awiya waruk ahun ino ele si ane uruk. Ele si ane uruk ahun inowen Ninikni Allah men Amloho men fahet awiya waruk lit Kristus men seli roho wereg ahun ino wereg.
23Ap san Amloho fahet awiya waruk ahun inowen Ikni faher oho ngi reg lit wereg eleg. Ap san Amloho fahet fag toho uruk ahun inowen Ikni faher oho ngi reg lit wereg.
24Nori, atam hiyag hisarukmu holtikibon ari hininggik ine roho senetuk lamuhup. Atam hiyag hisarukmu holtikibon ari senetuk lamuhup halug Amloho men Ikni men mondabi hininggik ahandip toho welamuhup.
25Yesus inggarehen hit mondabi honoluk welamuhup ulug sali emberuk lit hiyag nisibag.
26Hit hinindi ninap henebul ulug til noruk inap fahet suwesingga tu haharoho emberuk lahi.
27Kristus inowen Allah hime fanowon og hisarisiyon hunubam weregma ap winonen milal enebuhup peruk lahi fug, Allah hime fanowon inowen mun ane man ane fahet milal heneptuk lit un ane milal heneptuk eleg. Indam milal heneptuk latisi hag toho ketiya oho milal heneptuk ane ari fam hinindi wenggel haruk lit Kristus men hininggik ahandip toho welamuhup.
28Numalikisi, ketiya Kristus men hininggik ahandip toho welamuhup. At waruhu sambil ino nenembong se roho nininggali eleg toho At waharukmu Olohotma welamuhuk.
29At Kristus inowen pikir ane eneg turukon honoluk atuk halug ap obog tohowen pikir ane turukon arimano Aren indag eneptisi ane honoluk atisi.