Dual Panel1An Simon nunuk eke Petrus Yesus Kristus amingmingangge weregma yonggo laruk laruhun ulug mon naptisiyon inowen suwesingga aru emberuk lahi. Niren peruk lahe ane men ambi roho wenggel haruk lahebon hunubahet suwesingga tu emberuk lahi. Ninikni Allah pikir ane turukon ino men Yesus Kristus nit windat nenepfahon ino menen wene ino onoluk amag ulug ninindimu emberusa.
2Ninikni Allah men Nonowe Yesus ino men fahet honoluk toho welahepma Iren inindi henesug lit hinindi yuwahap heneptuken sembahyang uruk lahe.
3Ninikni Allah ine roho werehon inowen mun ane man ane niren nenesehet peruk angge og nisarisimu At umalikisi hag toho welahe. At ebe suwon Ine roho werehon inowen wol neneptisimu niren At fahet nonoluk toho welahe ane ariyen Aren nininggikmu emberisi.
4Atam sali ibahon hikit toho mondabi fano ane suwon nininggikmu emberisi. Fano ane nininggikmu emberisi ane ariyen Allah ubabut fanowonen peruk ane hag toho hiren oho peruk lahep. Siyag ane ap inindimuwen tila peruk ane o mondabi siyahap turuk ane ari hiren tila peruk lahep fug.
5Nori, alem ihiyon aru fahet Allah fam wenggel haruk lahep ane weregma nin sebe roho fano ane hininggik fam turukon hinine roho yami ruruk lamuhup. Hininggik fam turuk ane ino weregma nin sebe roho onoluk atuk ane alem yami ruruk lamuhup.
6Onoluk atuk ane alem ino weregma nin sebe roho hunubabut hal taruk ane yami ruruk lamuhup. Hunubabut hal taruk ane weregma nin sebe roho hinindi wirik atuk ane yami ruruk lamuhup. Hinindi wirik toho weregma nin sebe roho Allahn peruk ane hikir amag ulug yami ruruk lamuhup.
7Allahn peruk ane hikit toho turukon ino weregma nin sebe roho honori hinindi enesug ane yami ruruk lamuhup. Honori hinindi enesug ane weregma ap obog toho hinindi enesug ane yami ruruk lamuhup.
8Alem ihi ane obog toho aru hunubam wereg halug hiren oho saplangge welam fug angge anggen fanowon yihik feruk lit Nonowe Yesus Kristus honoluk toho welamuhup.
9Ap sa ihiyon obog toho aru indimu wereg eleg halug il hupnig lit seleg yet ha fug angge werehon hag toho welaruhu. Siyag ane aren tam turuk latisiyon Allahn elehap tirisi angge famen apeleg atisireg wereg.
10Nori, Allahn wol heneptisireg hiyag heneptisiyon arimanowen yami ruruk lit senetuk lamuhup. Hiren ari senetuk lamuhupmu salog-malog angge roho hunusuhu fug.
11Henebe kolo roho wereg lit Nonowe windat nenepfahon Yesus Kristus ino wereg ambeg fanoma ino hir oho kuk teg lamuhup.
12Tem toho uruk ane aru tam hiyag hisaruson holtikip angge famen anden hiyag hisaruk lahi ane obog toho aru nirim puk fug angge nin sebe roho honolukap heneptuk lahi.
13Nonowe Yesus Kristus inowen hiyag nitisiyon hikit toho tot welaruhukteg war aruhuk ane ninggareg noluk tehen an noluk welahi li ariya obog toho aru honolukap heneple peruk lahi.
14(1:13)
15An funggalem larukmu hit henemu wereg lit hiyag hisaruk lahi ane aru obog toho honoluk toho welamuhuben yami ruruk lahi.
16Nonowe Yesus Kristus ino ap suwon hag toho Ine roho waruhu ane fahet niren hit tam hiyag hisaruk lit aben suwit inindimuwen milaloho uruk hag toho hiyag hisarukuk fug. At ino Ebe suwon wereg ane ninil fam yet haruk uwareg hiyag hisarukuk.
17Nit weregma Ikni Allah inowen At hi ruruk lit suwap tibag. Mondabi palimu werehon inowen Ele Ubam uruk lit, "An namloho nindi reg lahiyon tu fahet Nahiyeg toho welahi," ibag.
18Ele ibag ane aru pohol filen urukon At men tom Allahn ngi reg antom fam ambiyeg wereg lit holtuk uwag.
19Allahn tam mon enepfag inap nabi arimanowen hiyag isibag ane ketiya teko laruk ulug niren tem toho peruk lahe. Hik teg ambeg iral umbagpag turukon ari fam fano kim haruk lahep. Sakan tirikim seleg aha ulug embeseruk lahep. Suhal yali filen lahik waharukon inowen hinindi selehap tuhu. Iral seleg teg ari hag toho hiyag isibag ane fahet fano wenggel haruk lamuhup.
20Allah wene tam hiyag isaruk latfag inaben fobik teko lahu ulug haharoho imbibag ane ino ap kinangmon ininggareg inindi fam wenggel harukon ariyen seleg am fug teg.
21Fobik teko lahu ulug hiyag isaruk ane ap kinangmonen perukon fam wilip atuk eleg. Allah hime fanowon inowen mingming eneptukmu eneg Allahn hiyag nisaruk uk teg.