Dual Panel1Nori, henenggengge anggolo wereg hinap welahebonen holeg lamok. Alem siyahon hunubam aruhuwon fahet henehummu siyag haruk lit uba yatuk lamuhup.
2Foroho lahep angge arimano filik tehen henesum oho mabiliyen narisi.
3Ili ruruk angge men umbagpag turuk angge men ip orohole atisi. Ip orohole atisi ane ariyen hit siyag ulug inamap tirisireg hit hununu indoken naruk hag toho hinahu. Obog aruhu sambil ino horog arik ohoma mun angge man angge nungge fahet tug toho emberikip?
4Hit henemingmingangge arimano yatuk angge yahal hisaruk lit anggen kong toho kilap heneptuk latuson fahet onggo og isarikip fugmu enele hum toho uruk lit ya nga uruk latusa ane ari Allah otsi sehelimu werehon ino Isanggoma kirisi.
5Henenggengge anggolo werehen tung ninap welahe ulug winon hik-hak isaruk latikip. Wam esetuk sambil henehiyeg toho wereg lit turuk hag toho turuk latikip.
6Ap fanowon fam hiren un ane ubam lombohap tirikipteg ebe pinggi watukmu aren hunubam ele irisi fug.
7Nori, ari fahet hinindi yuwag toho wereg lit Nonowe waruhu ane fahet yet teg lamuhup. Suburu yabuk wituk ahunen ebe wirik atukon fahet mangno reg lit wereg. O hibi anggolo laharuk li suburu ei yabuk fug angge osit mangno ruruk lit wereg.
8Ari hag toho Nonowe waruhu li horog tehen hiren oho hinindi wirik toho wereg lit mangno ruruk lamuhup.
9Alem angginon hunubam umbuk nowen honori men henele siyag toho uk fug angge welamuhup. Alem kong tuhu Ahun ino sokolma unduhuk lit werehen honoluk toho welamuhup.
10Nori, Allahn ap atam mon enepfagma wene hiyag isaruk latfag inap nabi arimano alem siyahon unubam atukmu inindi yuwag toho welatfag hag toho hir oho ari roho welamuhup.
11It arimano alem siyahon unubam atukmu inindi yuwag toho welatfag ane fahet niren it fano peruk lahe. Hun Ayub ino siyahon ubam atfagma indi yuwag toho werehen Ninikni Allahn fobik fanowap tibag ane hit honoluk toho welahep. Ninikni Allahn inilaheg ulug Indi anggolo nisaruk lit wereg.
12Nori, mondabi palimu werehon iminon tu holeg lamok: Pohol men kinang men kinangma wereg angge winon ununuk fam tik tem toho ehe ulug henele anggolo uruk lamuhup fug. Alem angginon hunubam aruhu rohon yu halug yu eneg uruk lamuhup, fug halug fug eneg uruk lamuhup.
13Hit sehelimu ap misig asengseng toho turuk laruhuwon inowen sembahyang uruk lamag. Ap misig ahiyeg toho welaruhuwon inowen sini yunggultuk lamag.
14Ap misig ouk waruk lit welaruhuwon inowen penatua nubam sembahyang ulusareg Nonowe unuk uruk lit ahaluwe fanowon nubam are nabusa ulug wol enebuhu.
15Indimu tem toho peruk ahun inowen sembahyang urukmu ap ouk warukon ino Nonoweyen let turukmu fano atuk. Ap inowen siyag ane turukon Allahn ambolmayap tuhu.
16Ari fahet hit fano amuhuben siyag ane turuk lahebon fag turuk lit honori hit men werehon ambiyeg mango roho sembahyang uruk lamuhup. Allahn ap tu fano peruk ahun inowen sembahyang uruk halug alem fanowon teko lahu.
17Hun Elia ino nit ap kinangmon hag toho welatfag. At ino wereg lit osit nahu rohon ulug sembahyang ele ine roho irikim mo lahakeg wambeheg turukmen hunduko hinahan atfagma uhanehon minggiroho hibi eneg welatfag.
18Hibi eneg welatfagma nin sembahyang ibagma poholman osit pilabik watfagma naruk angge kinangman wilip atfag.
19Nori, hit henesehelimu werehon misihen Allah wene embeselug ambol yig utuk halug hit winonen at ino suhuloho Allah olohotma wamag ulug wol tuhu ahun ino fahet iminon tu:
20Ke hareyon laruk ahun famen areyen wol tuhumu suhuloho waruhu halug, at inowen are mondabi ap war atuk ambehen windaruhu. Ari tuhu ane inowen siyag ane anggolo hondo rebesuhu.