Alkitab Mobile SABDA
[VER] : [ABUN]     [PL]  [PB] 
 <<  1 Petrus 5 >> 

1Ji ré anato tepsu yekwesu mo nu ari dik yo. Ji dakai me sukye gato Kristus ku su ji gro re. Bere mo Yefun Allah bi nat-i ji sisu Kristus ku suk gato ndo wai o mone. Sane ji kiwa nin, yekwesu mo nu ari, nin jammo suk gato ji ki ré et, sare,

2nin mewa Yefun Allah bi rus-i gato An syo nai nin sisu ndo et. Yefun Allah iwa nin mewa An bi rus-i sisu nin mit iwa sor, nin bariwa nde. Nin mewa Yefun bi rus-i, nin gro sye wa nin ku suk mwa wa nin dakai sor nde, wo nin dakai mit iwa nin ós Yefun bi rus-i ne, ete nin mewa Yefun bi rus-i mone sor.

3Nin mewa án yo, nin bes nin nggwa kok tepsu nin gum yepasye gato jom án nde, wo nin ben nin bi suk-i ndo subere nin kadum os ndo wa án benbot et.

4Sane bere, Kristus gato gum kok sye wai kadit yekwesu mwa ne sino ma ne, Kristus gato mewa Yefun Allah bi rus-i sisu ndo ne do bor mo bur ré it yo, bere An syo suk gato ndo wai nai nin yekwesu mo nu ari mo suk gato nin ben ne o re. Bere, ri ma, suk gato nin ku ne, kem ndo gesyos sor, suk yo ben ibit wokgan dom nde.

5Sane dom, nin yemsok si nggonnak, nin jammo ye gato ka yenggras et. Nin sino ben suk njep nai yu et. Nin bes nin nggwa kok dom nde, we mo Yefun Allah bi sukdu, ye krom sare do, "Yefun Allah bariket ye gato bes nggwa kok, wo An ben An bi suk-i ndo su ye gato ben an nggwa ga tepsu pa wokgan."

6Sane nin ben nin nggwa ga tepsu pa wokgan mo Yefun Allah gwem et. Nin ben nin nggwa ga mo Yefun gato nggiwa mewa nin sisu ndo wai ne. Bere An dakai bes nin gum kok tepsu bi kam gato An fro ne.

7Yefun Allah iwa mewa nin, sane suk gato nin nutbot teker eta, nin nutbot teker sane sor nin bi sukjimnut waiyu nde, wo nin ki subot sukjimnut mwa ne sino nai Yefun Allah jam subere Yefun nai sukjimnut ne wé kadit nin et.

8Nin kem su nin fra et. Nin fro nin nggwa petok sor. Biris bi yekwesu iwa ben sukibit nai nin. Biris bi yekwesu muya-muma sato suge krok gato mise, gato gum do singa. Biris bi yekwesu ne meret yetu ge dik yo wa ben an sukye nai, tepsu suge singa sok suge dik yo wa an gu kwop, ete an git.

9Sane dom, nin gato onyar kem pe mo Kristus ne, nin mise wa biris bi yekwesu ne, nin syun biris bi yekwesu wé kadit nin, subere sukye gato biris bi yekwesu mitiwa ben nai nin ne yo kas nde. Nin ben sane, we nin jam do, yé mwa ne sino gato si nin onyar kem mo Yefun Yesus mo bur ré iwedewe ku sukye sagato nin ku ne dom.

10Nin ku sukye mone bergan sor re, orete yo, Yefun Allah dakai nai nin wé kadit sukye subere nin kem ndo kadit sukye gato nin ku ne o re. Yefun Allah ben An bi suk-i ndo su men dakai yi sor, sane bere Yefun ben nin onyar kem mo An nggi wai o. Bere Yefun ben nin bi sukjimnut kem mo An nggi wai o. Bere Yefun ben nin bi sukjimnut yo kas ram kadit An o nde, wo kem pe mo An sor. Nin tepsu Kristus bi yetuge-i ne anato Yefun Allah fro nin subere nin ku suk gato ndo wai mo Yefun bi nat-i to kapyo mato kapyo.

11Yefun Allah ete nggiwa jowa men to kapyo mato kapyo. Sangge.

12Silas anato ós ji krom surat wokgan ré wa nin. Ji nut do, an sa, ye Kristen gato ben an bi suk-i ri-roi tepsu Kristus mit. Ji iwa ji frot sukdu bok ré subere nin jam do, sangge, kapre nin yo ben suk yo nyim wa Yefun Allah nde, An dakai bi sukjimnut sye kas subot nin sor. Ji krom sukdu subot sukndo gato Yefun Allah ben dakai yi su nin subere nin bi sukjimnut kem pe mo An. Sane nin bi sukjimnut ut krat mo sukdu ne

13Yé gato onyar kem mo Yefun Yesus mo kota Babilon, yé gato Yefun nai sok mo An bi rus-i tepsu Yefun nai nin ne yo, yé mwa ne ki ndo mo nin. Sane dom, Markus, gato ji jimnotku tepsu ji bi pa ne, an ki ndo mo nin.

14Nin ku yu yo, nin kambrut yu e, nin i yu tepsu nin yedik mo Kristus. Nin yé gato tepsu Kristus bi yetuge-i ne, Yefun Allah ete uttok nin sino sor. Ndo mo nin sor, kadit Petrus



 <<  1 Petrus 5 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran