Alkitab Mobile SABDA
[VER] : [ABUN]     [PL]  [PB] 
 <<  1 Tesalonika 4 >> 

1Sane, men bi nji, men bi nyanggon, men duno nin su sukduno gato kadum os wa nin subere nin jam suk gato ndo wa nin ben tepsu Yefun Allah mit it. Nin benbot sukduno ne napyo it. Sarewo su ré men kiwa nin jammo sukduno gato men bi Yekwesu Yefun Yesus tarubot men ne. Nin jammo ete nin werwa nin benbot sukduno mwa ne sino wai kadit nyim neya o re.

2Nin benbot sukduno mwa ne, we nin jam do, sukduno gato men duno nin su ne ma kadit men bi Yekwesu Yefun Yesus.

3Yefun Allah mit iwa nin ben nin bi suk-i sare do, nin ben Yefun bi suk-i tepsu Yefun mit petok sor, kwa gato ibit yo mo nde, nin mewa nin nggwa subere nin ben siri su yu nde, nin ben siri su yu wam dik yo dom nde.

4Nin yebris, nin gedik-gedik mewa nin nggwa subere nin si nin bi nggon kem not sor. Nin bi nin nggwa mo Yefun Allah wa ben suk gato ndo sor tepsu pe gato Yefun Allah si yetu mwa ne sino iwa et.

5Nin da bro wa nggon tepsu ye gato jam nde Yefun da bro ne nde.

6Sane nin ben siri su nin bi nji mo Kristus bi rus-i ne bi nggon nde. Nin kidar yé ne dom nde. Tomga nyim men ki suknapa wa nin wam bok yo mó re, sare do, bere Yefun Allah syo sukye nai ye gato ben suk siri kadit sukduno ne.

7Yefun Allah nai men sok mo An bi rus-i subere yebris si nggon men sem su yu daret nde, wo An nai men subere men ben men bi suk-i ndo sor, sukibit wokgan yo dom nde.

8Sane ye gato bariwa sukduno ne it yo, án bariwa yetu bi sukduno-i nde, wo án bariwa Yefun Allah bi sukduno-i. Yefun Allah anato bok An Gen mo nin, sane nin bariwa An bi sukduno-i nde.

9Nin bi sukjimnut sye kas subot ye gato onyar kem mo Yefun ne, sane men yo mitwa men krom subot sukduno ne wa nin jam o nde. Yefun Allah dakai duno nin mó re, sane anato nin bi sukjimnut sye kas subot yu sisu ndo it.

10Sane dom, nin bi sukjimnut sye kas subot yé mwa gato onyar kem mo Yefun Yesus ne sino mo bur Makedonia re. Sarewo men bi nji, men bi nyanggon, men kiwa nin wergat nin nggwa wa nin ben suk sane mwa wai kadit nyim ne o et.

11Nin nai sukjimnut do, ndo sa nin kem not sor. Nin dakai ben nin bi suk-i, nin iswen ye yi mo an bi sukdu-i nde, wo nin wergat nin nggwa, nin ben suk su nin samok subere nin meret suk gato nin yewa ne, tepsu tomgatu men duno nin mó re.

12Nin ben suk sane sor, subere nin yo git mo ye yi syim nde. Sane bere ye gato jam nde Yefun un nin gum mone o re.

13Men bi nji, men bi nyanggon, men mitwa nin jam sukdu gato sangge subot ye gato kwop ne. Men bariwa nin kwabom dek subot yekwop teker tepsu ye yi neya gato yo kwabom kam mo Yefun subot suk ne nde.

14Men jam do, Yefun Yesus kwop, orete Yefun Allah sun An kadit sukkwop re. Sane anato men kwabom kam mo Yefun Allah do, bere Yefun Allah sun ye gato onyar kem mo Yefun Yesus kadit sukkwop, orete An kar ye ne ma kem su Yefun Yesus mo Yefun Allah bi de-i.

15Tepsu Yefun bi sukdu gato An ki nai men, men waii ki rer nai nin jam sare do, men yé gato mbau su kam gato Yefun Yesus satu ma mo bur ré yo, men yo it mo gu nyim kadit ye gato kwop nyim ne nde.

16Bere malaikat bi yekwesu dik yo saiye nggi, ete yé jam Yefun Allah bi trompet ba, subere yé jam do, Yefun Yesus ma it anane. Orete Yefun Yesus dakai is ma kadit gu. Yefun Yesus is ma, ete ye gato onyar kem mo Kristus gato kwop nyim ne yo, Yefun sun yé mwa ne, ete yé mwa ne it mu nyim mo gu.

17Orge men yé gato mbau tó si yé gato kwop nyim ne it mu sino ku men bi Yekwesu Yefun Yesus mo nyotem mo gu. Orete men si Yefun Yesus kem sino sane sor to kapyo mato kapyo.

18Saneyo, nin ki sukdu ne nai yu, subere nin ós yu subere nin kwabom dek subot yekwop teker o nde.



 <<  1 Tesalonika 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel